2009年7月25日(星期六)
今日有幸請到candy姐山長水遠親身到蕭C奶家
教授牛舌及熱情果慕絲蛋糕
蕭C奶早上起床後
做定所有預備工夫先...
等到candy姐來到, 蕭少爺都放工返到
三個人先去食個下午茶先
然後, 蕭C奶同candy姐就切切切, 煮煮煮....
蕃茄紅蘿蔔燴牛舌
或
蕃茄紅蘿蔔燴牛脷
準備材料:
紅蘿蔔2條, 洋蔥 2個, 蕃茄 6個, 西芹 適量,
蒜茸, 乾蔥 各適量, 薑 數件
先把以上材料全部洗淨, 切件, 備用
蒜茸及乾蔥, 切碎或茸
薑 切一小嚿, 拍扁, 備用
仲有, 一樽洋蔥蕃茄意粉醬 700g
及 一罐茄膏
主角: 牛舌/牛脷 (急凍一條)
我諗大部人愛吃牛舌, 但可以未必睇過佢的真樣...
其實好核突好核突....今次呢條好細條,
上次我買過嗰條勁大條呀....仲核突囉...
唔知鐘意食朋友們, 而家見到個真樣之後, 會唔會唔食呢???
由於係急凍, 所以決定整之前一晚要放定係雪櫃下格
等佢溶定雪, ok. 到咗今日, 攞出嚟, 洗淨, 備用.
用鑊或深大的煲, 放入水, 開火至滾, 然後加入牛舌, 出水一會
出水其間, 要兩邊轉吓舌身
見唔見呀...條牛舌縮咗水lu...所以買大條啲都唔怕嫁...
然後就攞出牛舌, 用一把尖銳的刀仔, 起脷胎, 都要起好耐,
而且真係要用一把尖銳的刀仔先起得到,
記住, 一定要起清佢, 其間如果發現起起吓, 起唔到,
唔緊要, 用番頭個出水, 再放番入去煲吓條脷,
又再攞出嚟, 再起, 會起到嫁
根據candy所講, 呢個原理係熱脹冷縮, 咁起脷胎會easy啲喎
我哋都煲咗佢兩至三次呀....
仲有條脷的下部份, 會見到啲肥脂肪, 要剪咗佢,
因為如果唔係的話, 到時煮出嚟會好肥嫁.
起到咁上下之後, 用另外一個深大的煲,
放入水及拍扁的薑, 放四件左右就夠了, 唔好太多, ok.
薑水滾後, 加入鹽及巳起脷胎的牛舌入去,
再煲滾後,關中火, 煲一個半小時,
(要視乎牛舌的大小, 呢條算細,個半鐘巳ok)
個半小時後, 加入巳切的紅蘿蔔, 滾後, 關中火, 再煲多45分鐘左右
加入紅蘿蔔一來是要順便煮到它淋身,
二來最主要是可以除去牛舌的腥味,
三來是要用來煮湯底
呢一煲很重要啊...中間要注意, 苦牛舌未淋, 紅蘿蔔又未淋,
咁要自己執生加水呀....
另外, 呢一煲的水, 最好煲到牛舌及紅蘿蔔ok後,
淨番適量湯水, 用作一會煮個汁嫁.
所以呢個動作都好重要.
45分鐘左右後, 用筷子吉入去牛舌, 苦果吉得入, 又無血水出,
咁即係煮淋咗了, 順便睇埋啲紅蘿蔔ok未.
若果發未夠淋身, 咁又係執生了, 再煲佢多10至15分鐘....
總之自己控制啦..
ok咗之後, 就要將啲薑掉走, 唔要, 仲有要將面頭的湯油,
全部用隔油工具 '筆' 走佢.
點解食出時候會唔肥, 就係呢個步驟要除去所有湯油...ok.
記住了...
跟住因為無時間影相, 因為candy負責切牛舌,
而我就負責要煮個汁了....
繼續之後的步驟:
起完油, 將牛舌切件, 備用
紅蘿蔔取起, 備用
除去油的湯底, 繼續留在煲內, 備用
起鑊, 加少許油, 先放入洋蔥及西芹炒至軟身, 盛起, 備用
再起鑊, 加入油, 爆香蒜茸及乾蔥一會, 加入紅蘿蔔及炒過的洋蔥及西芹,
炒炒炒, 然後加入茄膏, 炒勻, 加入一樽意粉醬, 再炒勻,
加入湯底, 蓋上蓋, 煮滾及煮一會,
煮到見差不多收汁, 加入蕃茄, 炒勻, 煮多一會,
其間可以試味, 唔夠咸, 加鹽, 覺得太酸, 加糖, 總之調較自己口味,
見夠自己的汁份量, 可以關火, 即成汁料.
煮好個汁, 你可以用一個大碗, 放入汁料及牛舌撈勻,
咁就先上碟做一個餸又得,
或者準備飯或意粉, 淋係面或側近又得,
總之自己攪啦....ok
個汁煮咗之後, 其實你自己鐘意用雞肉, 豬肉, 牛肉, 牛肋條等等
好多變化的....ok.
係咸味方面, 因為之前個湯底, 巳加入了鹽來煲牛舌, 所以牛舌係夠味的,
咁個湯都會有咸味, 所以煮汁時, 要留意, 一定要先試味,
真係唔夠咸先好逐少加入去, ok.
仲有, 嗰汁料如果有多, 又或者煮咗之後, 可以放入保存盒到,
放在冰格, 可以保持多幾日嫁....咁咪唔怕嘥囉...ok.
蕭C奶的完成品
蕃茄紅蘿蔔燴牛舌
出面食都無咁好食呀, 因為好多時出面個汁都肥肥哋
而candy姐的就一啲都唔肥喎...關建咪就係個湯底一定要記得
除去油呀...
出面食都無咁料添啊...嘻嘻
啲牛舌好味呀....yeah...
今日好多謝candy姐,
蕭C奶好開心呀, 學識煮呢個牛舌
因為太鐘意食了...
好...等隔多幾個星期先
等蕭C奶自己一手一腳親自煮番出嚟
到時要請番candy姐食了....
待續........
下集....熱情果慕絲蛋糕
F
回覆刪除