金銀蒜茸蒸茄子(內附食譜)

平時不太喜歡茄子, 阿榮老公更加不喜歡.

因為覺得茄子好索油, 出到街食飯, 但唔知點解朋友仔叫魚香茄子，

又幾好食嗰喎, 不過我都唔係好like, 因為都係嗰句....太多油了,

由於我哋倆公婆都唔係好like茄子, 所以一直以來我都唔會主動煮茄子,

直到早幾日, 媽咪同我去街市買菜時, 媽咪話比我知茄子係好有營養,

佢叫我要得閒煮嚟食吓喎....

後來媽咪介紹我食以下呢款長而廋的茄子, 媽咪話好好食喎,

咁佢又帶我去買, 咁我又點好意思推媽咪呢.....

所以今日就試吓整啦...媽咪教我蒸茄子, 佢話咁樣會無咁多油, 而且仲好好食.

做法:

(1) 將茄子梅花間竹去皮切段用蒜茸蒸

(2) 蒸好後加略炒過既蒜茸連少少熟油, 灑蔥花、最後加豉油，

      加豉油要由圍住茄子邊加，如果由面淋下好易過量會變鹹

       而且圍住茄子邊加豉油會容易混合茄子晌蒸既時候流出茄子汁

       唔好蒸太耐剛剛熟就要熄火，如果唔係會變色

 

金銀蒜茸蒸茄子

      

注意:

(1)茄子想蒸到靚顏色，千其唔好蒸太耐，大火蒸5~8分鐘，大約4分鐘就要睇下茄子皮有無轉色，當茄子皮由深紫轉成淺紫，茄子肉已經稔就好熄火，蒸太耐肉爛皮又會色變

(2)一定要加少少熟油，蒸好淋熱熟油上面，如果要做金銀蒜，就要將少量蒜茸加油一齊炒，至到蒜茸變金黃就熄火，連油帶炒好蒜茸淋上面，油唔需要太多，但一定要有

(3)茄子要梅花間竹去皮

(4)豉油一定要圍茄子邊淋下