自由的星期四+星期五自家煮

2009年3月5日(星期四)

 

今日放咗工要急急腳返屋企

原因:

一. 因為天氣唔好, 又凍又落雨

二. 因為今日有mood, 想整蛋糕

三. 因為阿榮老公今晚約咗朋友食晚飯, 留吓我一個人,

好自由, 想做咩都得

四. 屋企有兩機衫要洗

由於以上各種原因...我就要急急腳囉....嘻嘻

 

 

返到屋企, 第一件事我就即刻沖個靚涼

等個人relax啲, 舒服啲

跟住就即刻煮少少嘢醫飽個肚就算了

跟住就要開始開機洗衫

然後就開始一路睇電視同整蛋糕了

由於最近有兩位朋友都整蛋糕

攪到我又想整

即刻今日買定材料

整番個藍莓芝士凍餅先

好耐無整了.....今次都好滑, 但我嫌唔夠soft囉

同事食了, 好食好滑, 佢哋話我要求高喎....

但事實真係未做到最好, 一定要再整.

剛好整完蛋糕

老公返到....咁就過咗我一個自由的晚上

  

  

 

2009年3月6日(星期五)

 

嘩...今日啲天氣真係好凍呀

無端端又凍番, 好似係冬天咁

有冇攪錯啊....我都將啲褸洗咗了

真係比佢激死囉

啲厚褸就無攞番出嚟著呀

只係著啲薄薄哋頂住先呀...

天呀...希望你唔好再咁凍啦....

今晚清清哋煮咗以吓兩個菜:

 

黑椒牛肋條粒

 

超好味, 有好多肉汁, 又有牛味喎

最重要係只需要用一種調味料就夠了

 

做法:  買啲牛肋條, 洗好抺乾水份, 然後切成粒粒,

加入黑椒醃15分鐘左右, 開鑊, 落油,

加入牛肋條粒炒至八九成熟即成.

 

 

自家製咸豬肉粉絲娃娃菜煲

何謂自家製呢? 今次的自家製來自我老爺的,

老爺久不久就會自己整咸豬肉嫁了

老爺自己曬的咸豬肉好好食嫁, 又夠味

用嚟炒菜, 炒瓜, 炒豆好正嫁

但今次唔想食炒的, 突然想整番個類似雜菜煲咁

見到有粉絲, 又有木耳, 就地取材, 就完成咗我呢個煲仔了

清清哋, 仲可以當湯咁飲添

 

做法:  木耳用水浸軟及發大,

粉絲用水浸軟及切段,

娃娃菜洗淨切件,

咸豬肉切件及出水, 備用

煲內加入適量水, 加入少許鹽及雞粉,

滾後, 加入咸豬肉滾一會,至成湯底,

再加入娃娃菜及木耳, 滾一會,

最後加入粉絲滾一會, 即成.

**若不想加雞粉, 可以只加入鹽作調味.

 

食完飯, 我同老公就煲咗'笑著活下去'的劇,

足足睇咗三集, 夠皮了, 因為巳經係零晨一點半鐘多啲了,

真係要訓了...好彩明天我唔駛返工,

可以訓多啲, 不過因為明天都約咗媽咪去街,

所以明天都唔可以訓到好晏呀.

好了, bye bye.