芝士粟米釀雞翼 (內附食譜)

 

2009年8月9日(星期日)

 

蕭C奶與蕭少爺整天都係到瞓覺覺豬啊...

嘻嘻...真係好好瞓呀....

大家都早上醒咗一陣

跟住又再瞓過.....少爺仲勁, 瞓到晚上7點呀....

 

呢個餸早幾個星期巳經好想整

不過未有時間又未有mood喎

今日終於都的起心肝, 一於整咗佢

 

雞翼真係相信大人及細路仔都鐘意食

蕭C奶都係, 尤其係大食會

雞翼機乎係大食會的指定食物之一

釀雞翼, 我以前都有整過

係釀火腿及蟹柳, 因為當時侄仔好鐘意食呢兩樣

而今次呢個釀翼, 我就用咗芝士及粟米呢個配搭,

鐘意食芝士的朋友, 一試就會愛上它啊...

 

我都好耐無整釀雞翼了

因為要拆骨呀...好攰好煩啊...

一定要有時間及心機囉...

真係拆到我手仔軟呀, 而且仲流哂汗添呀....

少爺就食得爽呀, 一啖就食咗落肚

但係蕭C奶就做餐屎囉....嘻嘻

不過咁, 見到少爺食得咁開心, 辛苦啲都值得的

 

芝士粟米釀雞翼

 

材料:      

芝士粒  6-7粒 (我用笑牛牌)

粟米  5-6湯匙

雞中翼  12隻

 

做法:

(1)    雞翼洗淨, 起骨, 用老抽, 生抽, 糖, 薑汁, 酒醃半小時或以上

(2)    釀入餡料前, 先將起咗骨的雞翼其中一邊的開口, 先用牙簽封口,

       才用另外一邊的開口釀入餡料

(3)      芝士切細粒, 混入粟米成餡料

(4)    將餡料逐少逐少釀入雞翼內, 然後用牙簽封口, 以免餡料及汁流出

(5)   放入已預熱180度焗爐內焗約10分鐘, 加少許香草在雞翼上,

        反轉再焗10分鐘, 掃蜜糖再焗至金黃色即成

(6)  焗好的雞翼, 將牙簽取出, 放上碟中, 即可享用. 

 

*** 釀雞翼的餡料, 可以有好多變化, 可以釀: 火腿, 蟹柳, 西芹, 冬菇, 青瓜,

       蘆筍, 金筍, 金菇等等....

 

 

 

釀好的雞翼, 放在焗盤上, 未焗前嗰樣就係咁嫁了

焗完了...下次可以加多啲老抽, 等佢個色再靚仔啲

睇吓..脹卜卜, 好鬼得意可愛啊....

將牙簽攞走, 睇吓個開口, 好多粟米呀

咬開咗之後, 入面勁多粟米呀, 食時仲有啲芝士係到....

咸咸哋, 又甜甜哋, 好美味啊...

 

是日晚餐, 仲有:

灼菜心

仲有, 阿哥釣的黃腳立魚

蒸黃腳立魚

 

希望大家鐘意今日的菜色啦.....