日式咖喱雞翼(內附食譜)+醉鴨舌

 

2009年8月4日(星期二)

 

琴日下午三點幾左右

蕭C奶個頭就巳經赤赤哋

同埋眼好攰, 及有啲眼痛了

可能係因為呢排太夜瞓

加上天氣好熱又焗

星期日又出咗去南生圍到影相

唔知係咪焗得滯

因為係影相途中

蕭C奶同芬芬都係有啲頭赤赤

 

所以琴晚係媽咪到食完飯

坐咗一陣, 好想返屋企瞓覺

因為真係唔係幾舒服...

 

到咗今早, 起身個頭都係有啲唔舒服

頭痛, 頭赤赤, 索性唔鬼返工了

唔想自己咁辛苦啊...

所以就打番公司請病假

咁蕭C奶就可以瞓晏啲了

今日全個下午係到又睇

相機資料...可能真係冷靜咗一晚

都諗到好多考慮的因素

其實真係好怕自己handle唔到單鏡反光機

都問咗自己好多次

你會唔會肯帶部大機成日出街先???

真係有無咁的必要啊...

因為...我都未想進入 '敗家' 行列呀...

haahaahhahahahaha

不過....都仲可以好好諗吓先....

通常蕭氐夫婦係咁的...諗諗吓就唔會買嫁了....

唔諗咁多先, 不如諗吓今晚煮咩仲實際.

早前買咗北海道忌廉磚,

當時都買咗一盒日式咖喱磚

一於今晚煮吓...反正仲有材料係到

唔駛專登去買餸了....

見有時間, 又見蕭少爺呢排返工返得唔係好happy

見咁耐無整過鴨舌, 天氣又熱,

不如整個冷盤 --- 醉鴨舌

比少爺嘆吓先...

材料: 日式咖喱磚 一盒

白飯

紅蘿蔔, 薯仔, 洋蔥, 雞翼 切件, 備用

蘑菇 (今次無用)

上面嗰碟係蕭少爺的, 下面呢碟係蕭C奶的.....

 

呢張影得都唔錯呀...哈哈.

做法:

(1) 白飯備用

(2) 雞翼切件後, 用少許鹽, 豉油, 老抽, 胡椒粉, 麻油, 日本酒醃十五分鐘

(3) 鑊加入少許油, 先將雞翼炒一會, 至轉色, 盛起, 備用

 (4) 用番同一個鑊, 加入少少油, 加入洋蔥炒一會, 加入紅蘿蔔,

再加入薯仔炒一會

(5)用一個深煲, 開火, 加入巳炒的紅蘿蔔炒一會, 加入水大約10分鐘,

滾後, 加入巳炒的洋蔥及薯仔, 煮大約15分鐘,

 最後加入雞翼然後加入水, 蓋過材料, 煲滾後, 關小火

(6) 試一試紅蘿蔔淋未, 如果淋了, 關火, 就可以加入

咖喱磚, 自己決定加幾多塊磚, 我加咗四塊

(7) 攪勻佢, 然後再開中小火, 微滾煮多5-10分鐘後, 攪勻, 即成.

 

 

 

醉鴨舌食譜, 請click:

http://hk.myblog.yahoo.com/jobechan0911/article?mid=1239