考敬倆老之干燒甜豆炒蝦球+清湯牛腩煲(內附食譜)

 

2009年11月14日(星期六)

 

嘩....天氣凍咗, 瞓覺係最大享受

少爺今早出門返工

蕭c奶只係瞓到九點半左右就起咗身

今日好有mood呀, 一起身即刻換床單

之後仲全部衣櫃大執位

跟住就掃地, 拖地, 洗咗兩機衫

收衫, 摺衫, 晾衫, 仲抺埋傢俬

好乾淨啊.. 望吓個鐘...

蕭c奶都好快手呀, 做咗以上咁多家務

都係用咗兩個半鐘頭到啦...

跟住開始就諗吓今日煮咩餸了

是關奶奶今日放假

蕭c奶請咗佢倆位老人家上嚟食餐飯

因為新抱仔好耐都無好好咁煮過餸比佢哋食了

 

今日無煲湯

諗起而家咁凍, 又諗起奶奶鐘意飲蕃薯糖水

一於就煲定煲蕃薯糖水比奶奶嘆吓...

 

蕃薯糖水

加多啲薑就夠辣, 飲咗個身都暖啲啦...

奶奶嚟到一見到有得飲蕃薯糖水, 開心到佢呀...

係通少到見到呢個餸唔錯, 一於今日試吓先

干燒甜豆炒蝦球

有係蕭c奶最愛的茄汁, 酸酸哋, 呢碟餸好正呀

有豆有蝦又有洋蔥, 好有營養喎...

 

材料: 中蝦 一斤 (20隻左右)

甜豆 一包 (7 蚊),  蒜蓉  適量

洋葸  一個, 去皮, 切絲

 

汁料: 茄汁 4湯匙, 糖少許, 辣豆板醬 1湯匙 (我無落), 水 1/4杯

(其實我無跟佢的份量, 我自己調較咗)

 

做法: (1) 蝦先用生粉搽勻, 再用清水洗淨, 抺乾後,

用少許鹽, 胡椒粉, 生粉醃10分鐘備用.

同時甜豆切頭切尾, 去絲, 飛水2分鐘, 盛起備用,

然後快火落油起鑊, 將蝦炒熟, 盛起備用.

(2) 快火落油起鑊, 先落蒜蓉炒香, 加入洋蔥加少許鹽炒至軟身,

加入甜豆炒一會, 再加入蝦和汁料炒勻至熟, 即成.

跟住又諗起好耐無煮過牛腩, 又係通少到學吓嘢先...

 

清湯牛腩煲

第一次煮就咁成功, 都咪話自己讚吓自己....真係好好味

而且原來咁容易整, 仲有個牛腩湯真係好好飲, 好香蘿蔔味

及濃的牛腩味啊....

 

材料: 牛腩 (40蚊左右)

芫茜 2條切段, 薑片 數片),  蒜蓉  5粒, 拍扁

八角  2粒至3粒,  白蘿蔔 1條, 去皮切件

 

汁料: 牛清湯 / 雞湯 1公升

紹酒 2湯匙, 冰糖 1嚿, 鹽 少許

 

做法: (1) 先將牛腩連蔥和幾塊薑出水, 用凍水洗淨, 隔好水備用.

(2) 快火落油起鑊, 先落薑片蒜茸炒至金黃色, 加入牛腩, 贊酒炒香,

再加入牛清湯, 八角, 冰糖和水至蓋過牛腩,

待湯一滾轉細火炆45分鐘至一小時 (自己調較呀),

再加入白蘿蔔炆20至30分鐘, 熄火焗15分鐘,

加鹽 (不過我無加), 再灑上芫茜即成.

蒸黃花魚

奶奶最鐘意食細條魚, 老爺比較少整細魚,

所以新抱仔知道奶奶鐘意食

咪買咗幾條細的黃花魚囉...

最後, 奶奶見到都話..正呀...

焗魚腸

係老爺係屋企到整咗帶嚟的

個樣唔係好靚呀呵...

不過唔好望外表啊..最重要內在美啫...

4個人, 4個餸....夠哂啦...

哈哈....好似偷影咁...

 

好開心, 見到自己的家人

食到自己親手做的菜

仲要食到係咁話好食好食

蕭c奶見到老爺, 奶奶及少爺食得咁開懷

咁開心咁滿意

蕭c奶就算要做好多工夫

都值得啦....