閒日放假輕鬆煮II@豉椒炒蜆,咸檸檬蒸烏頭 (內附食譜)

 

2009年3月17日(星期二)

話說琴晚瞓唔著

半夜起咗身....雖然到五點幾我番入去瞓

但係....都係瞓唔到啊....

直到鬧鐘響起...老公要起身返工

咁我就即刻起身

當然係要整個'正'早餐比阿榮老公食啦...

咪就係琴日我自己巳經試咗的 Kaya 多士'啦

老公出門返工之後

我都係無即刻瞓喎

因為真係唔鬼想瞓呀...點攪

咁咪又係係到唔知做乜囉...

後來好似有啲攰攰哋..咁我咪番入房瞓一陣囉

後來瞓到中午一點就起身

打個電話比媽咪

約佢入嚟飲茶兼且約埋晴晴及晴媽

我都巳經兩個星期無見晴晴呀...

其實好鬼屎掛住佢啊...

呢個妹妹真係超得意呀...

抱咗佢之後

我簡直唔捨得放佢落嚟呀

飲完茶之後, 我就同媽咪去咗元朗行一陣兼買餸

嘩..元朗好鬼多嘢買啊...

我哋兩個都滿載而歸

睇吓今晚煮乜餸

琴晚先食完帶子, 本來都無諗住今晚又食海鮮類,

但係....見佢啲蜆好新鮮又得10蚊斤, 忍唔住買1斤囉..

呢個炒法係我上網搵到的...真係好似去咗大排檔到食呀..

阿榮老公都話好得呀...我自己都覺得啊...

豉椒炒蜆

材料 : 鮮蜆 1斤, 蒜茸, 豆豉茸, 紅椒絲, 米酒,

薑絲, 豆瓣醬 (可以唔用都得, 我今次無用)

調味 : 蠔油 1湯匙, 鹽 1/4茶匙
糖 1茶匙 , 生粉 2茶匙
老抽 1湯匙 , 胡椒粉 少許
麻油 少許 , 水 1/2杯

做法:

(1) 鮮蜆放清水內浸數小時吐沙並瀝乾水.

(2) 放入大鑊滾水內, 直到蜆開半口, 撈起,

開水喉沖乾淨, 瀝乾水份, 備用

(3) 燒熱油, 爆香蒜茸、豆豉茸、薑絲及豆瓣醬,

即下蜆炒勻, 灒酒, 加入調味料,

炒至汁收濃, 加入紅椒絲, 炒勻後上碟.

 

 

諗住唔駛帶飯, 我通常都一定會食魚

以前好唔鐘意食烏頭, 覺得佢啲味好難頂,

但係大吓大吓...又改變咗喎...而家又鐘意食喎...哈

除住年紀....真係有好嘢都會變

見啲烏頭咁靚, 又得12蚊條

我又未試過自己整喎...問咗媽咪點整之後

今晚一於試吓先...

 

咸檸檬蒸烏頭

材料：烏頭一條、咸檸檬1個、蔥適量

預備：洗乾淨魚抹乾、下少少胡椒粉及少少海鹽 (但我無用)

將咸檸檬切片

做法：放魚在碟上，將咸檸檬放在魚上及底部,

淋蒸前加入少少油,

鑊加入水, 水滾後將魚蒸約7分鐘, 即可.

 

 

 

蒜茸炒勝瓜

 

唉...話咁快又放完兩日假

好唔捨得呀....

好想一直係咁唔駛返工

好想唔駛趕頭趕命

好想..好想....可惜...我要生活費啊...