自創沙律汁拼燒雞髀@自家種羅馬生菜(內附食譜)

2009年3月25日(星期三)

 

都未到summer就巳經覺得煮飯時煮到好熱了

好快就到summer....

一諗到係廚房到煮飯, 嗰種熱的感覺...

就知道到時好辛苦啊...

對於新婚的朋友仔

今年會係你哋第一年summer煮飯

到時你哋就知...我講的係幾咁辛苦了

唔好話要煮啲咩嘢....

到時只係煮一啲好簡單的餸...都會攪到你成身汗啊...

到時真係煮完都唔係好好胃口...

我的經驗係...只想飲湯或飲水....

仲有..係咩都唔想做啊...

 

今晚我就真係想整啲比較簡單的嘢嚟食

由於我哋倆公婆係晚上唔駛食飯

只係食菜及肉

所以今日整咗呢一個

燒雞髀+沙律

簡簡單單, 又唔駛食到咁飽啊...

同事CC又送來了自家種的羅馬生菜

剛好....正正可以自製沙律啊...

自家種的羅馬生菜好新鮮...而且仲好爽添

我另外就加咗奇異果及火龍果添

我的沙律汁係由卡夫奇妙醬+少許幼鹽+黑胡椒

將呢三樣攪勻...就成為我的自創沙律醬了,

大家不妨試吓....呢個醬係我自己自創的...

原來咁樣撈都好好味喎...

醃燒雞髀材料：雞髀---2大隻, 胡椒粉---適量, 蒜鹽---適量

汁料: 老抽---適量, 清水---適量, 冰糖---適量

 

. 先將雞髀洗乾淨, 沫乾, 用適量胡椒粉及蒜鹽醃2個鐘後

將老抽加清水及冰糖煮至溶解, 成為汁料

燒紅個Pan, 加油及放雞髀落Pan喥煎兩邊...

將汁掃滿雞髀表面及背面

重覆將汁掃滿雞髀表面及背面煮至雞髀熟透

上碟, 灑上Parsley Flakes....再以沙律伴碟....完成!

 

係咪好簡單呢....而且個食水好靚嫁....

不過如果食開比較濃味的朋友仔

咁可能呢個雞髀你要自己醃重手啲及醃耐了...

我就比較食開淡口的, 所以我哋就覺得ok了.

點解我整咗四隻, 會得番兩隻的..

因為個兩隻係用嚟比我哋明天LUNCH嫁..