閒日放假輕鬆煮@蒜蓉豆豉蒸帶子,酸梅麵醬蒸梅頭豬肉(內附食譜)

2009年3月16日 (星期一)

 

今日放假啊...勁好...因為唔駛趕頭趕命囉..

其實如果唔要求高, 只要足夠三餐, 有間細細哋的屋,

再加埋可以一年去旅行仔...

我真係好想唔鬼做嘢啊...

其實我真係好適宜退休生活..或者做家庭主婦囉.

真係一早係到發白日夢...

好了..今日都係訓到十一點左右,

起過身, 食啲嘢, 就開工了..

好彩係下就兩點半就做完, 比我想像中做快囉...

跟住同啲朋友係msn到傾吓,

因為佢哋都話好耐唔見囉...

傾吓傾吓...要出去買定啲餸返嚟了...

通常放假我都會好好餸的,

因為有時間慢慢整呀嫲...

不過...做做吓有啲肚餓,

記得朋友Adam哥哥早前同佢老婆仔去咗新加坡玩

佢真係好呀...特別買咗手信比我

就係 '加映多士醬', 係新加坡都幾出名的.

我無諗過佢買手信比我嫁...好多謝佢呀..

去到玩都仲記得有我呢....好有心

所以諗到呢個...去買餸時, 順便買包麥包嚟試吓食先

先先預熱咗個焗爐先,

跟住 '看' 吓塊麥包先...

然後就 '茶' 啲KaYa 醬...食了....唔...果然無得頂啊...

塊包脆脆哋..啲醬又甜甜哋...下次要加埋啲牛油先..

聽日可以一早起身, 整定比老公做早餐先....

就係呢樽了...有朋友去新加坡玩

不妨叫佢哋買來一樽啊...

聽聞話佢要呢隻牌子係好好嫁喎...

亞坤加映多士醬 (Ya Kun Kaya Toast)

唔經唔覺又到六點幾了...

要準備晚飯lu..睇下有咩食先..

 

原本想買啲中蝦..但係我哋個街市無喎...

次次都係咁...想要個樣就無個樣囉...比佢激死!

咁行過見到啲帶子又靚又大隻又新鮮兼得二十蚊有七大隻

就買咗帶子囉..仲好, 一定平過中蝦..

 

蒸前個樣都好靚..所以都忍唔住要影相...哈哈.

 

蒸好lu....仲係好大隻..無咩縮喎...勁正呀...

食時好鬼彈口又夠味仲好新鮮...不過今次唔記得加少少辣椒...

不過因為有用咗少少胡椒粉, 所以都有少少辣辣哋啊..

20蚊真係好抵...如果呢碟出街食.....又收貴你lu..

蒜蓉豆豉蒸帶子

預備：買番黎洗乾淨，除去腸臟和其他你唔食o既部位

(但係我全部都食的)。預備蒜蓉、豆豉、蔥花

做法：先用幼鹽同胡椒粉醃一陣，

此時可預備醬料：蒜蓉 、整爛左d豆豉(呢兩樣我係用好多的)、蔥花、

油、麻油、酒、糖，撈勻, 形成一個蒜茸豆豉醬汁，

記得油要剛好到啲蒜茸豆豉面啊..

用廚房紙巾索乾帶子啲水份,

然後將啲蒜茸豆豉醬汁鋪上每隻帶子上,

蒸約4-6分鐘即可(視乎帶子的大小)

呢次我就蒸咗有6分鐘至7分鐘.

我通常蒸到仲有一分鐘就完成時, 我會快手打開鑊蓋,

加入蔥花, 蒸埋剩餘的一分鐘, 就關火, 即成..

 

平時我最拿手就係整呢個

梅子蒸排骨, 但係唔想整排骨,

不如試吓整梅頭豬肉啦...

我好like酸梅味嫁...酸酸哋好開胃....

不過...我都係覺得蒸排骨正好多...蒸豬肉都係嫲嫲哋

都好食..但係排骨再正啲...超容易整...

酸梅麵醬蒸梅頭肉

梅頭豬肉$20       酸梅 2粒       麵豉一包(約兩平湯匙)

糖2湯匙       粟粉1茶匙     油一湯匙

做法：

梅頭豬肉洗淨切薄片，用酸梅(壓爛)+麵豉醬+糖拌勻，

最小要醃20-30分鐘，臨蒸時下小去粟粉，拌勻，最後加油拌勻，

蒸約12分鐘便可。

蒸完記得試下味先上菜，如太鹹可多加糖，因為每個人的口味都唔同。

 

蒜茸炒生菜

仲有飲淨的瑤柱魚翅瓜煲豬骨湯

 

食完飯, 今晚我哋倆口子終於可以好好咁享受個晚餐

及輕輕鬆鬆咁坐係張梳化到睇電視及談心呀

而且仲可以早啲瞓添...

老公真係好攰呀....我都唔捨得佢洗碗,

我自己都好懶囉...所以今晚...我哋無洗碗就瞓咗了..

因為幾晚都開夜...好攰. 體力透哂支了....

趕好工...個心情係唔同啲...輕鬆哂!

嘻嘻..不過其實我寫呢篇blog...

大家都會見到個日期同時間,

係半夜嚟啲...唔知點解瞓到三點幾醒咗喎

唔想瞓..咪出咗呢個blog先囉..

好彩我聽日唔駛返工咋....

唔係如果要返工..一定屎梗呀...

好了..都成差不多五點lu..

我都係要返入去瞓一陣先...

bye bye!