咖哩烏冬+蒸八珍蘿蔔糕

2009年1月23日(星期五)

終於都過咗黑仔日了...

今日無事發生喎, 仲好happy添,

可能因為返埋今日就放假啦, 大家都好輕鬆囉.

叻叻年年都會送蘿蔔糕比我的,

今年仲送八珍的牌子,

我未食過喎, 但係對八珍呢個牌子好有信心,

今晚我又諗住食蘿蔔糕了...

我就唔會悶, 但唔知阿榮老悶唔悶呢....又食蘿蔔糕?

好彩阿榮老公唔悶喎..

今日一於蒸蘿蔔糕, 咁淨食蘿蔔糕好齋的,

上次送粥, 今次送咩好呢....

諗吓諗吓....一於煮咖哩烏冬啦...

叻叻果然無介紹錯呀,

八珍的蘿蔔糕真係好好食,

一打開盒糕, 見個樣都知好食過美心,

再切埋落去, 用手去feel到啲糕好軟, 好正,

跟手再蒸埋出嚟食....好味到不得了,

足料, 足味, 好多蘿蔔絲, 好香好軟, 味道剛好,

下年我都要呀....叻叻多謝您啊!

準備煮咖哩烏冬的材料,

有日本的魚蛋, 獅子狗魚蛋及魚片頭

早前係jusco的十元店見到呢款咖哩烏冬好似好好味,

咪買嚟試吓囉...今晚終於都有得整嚟試吓了..

就係呢碗了....好香咖哩味嫁 不過成十元一包都幾貴,

試一次就夠, 下次自己買啲咖哩磚自己整...