這個星期超黑仔

呢個星期真係黑到都無得再黑了.

話說星期一, 一返到公司,

由九點左右就比兩位老細煩到我收工,

當天巳經令到我超忟憎, 超煩.

諗住到星期二會好啲啦....

點知到咗第二日, 即係星期二, 1月20日,

返到公司, 我老細都煩咗我一陣的,

但跟住就無了, 心諗應該無事啦...

哈...dada幫我買咗啲盒, dada就打比我問我想點攞,

咁我話, 剛好今晚回媽咪家吃飯,

咁我的巴士會經過咗dada屋企先到我媽屋企的,

咁我話不如我係佢屋企的巴士站落車,

但係就要麻煩dada攞落嚟, 因為我攞住啲好重的菜比媽咪,

唔想走嚟走去, 咁dada話, 無問題, 到時我差唔多就比個電話佢,

佢就落定樓下, 等我.

點知....差不多到時...我的電話服務無咗, 打唔到出, 又打唔入,

我心諗...唔係呀....玩嘢咩, 而家打唔到, 咁我咪聯絡唔到dada.

全程車, 超忟憎, 唔係呀, 咁黑仔. 最後真係攪到我係dada屋企到落咗車,

再轉輕鐵返媽咪到, 跟住咪打番比dada, 唔好意思呀, 我攞唔到, 我當然係話比佢

知我發生咩事啦, 佢都係搵唔到我.

我即刻打去CSL問佢咩事, 攪咗一輪, 原來係佢同事上次無講清楚比我知,

因為我唔見咗張信用咭, 上兩期的台費係要親自去交錢. 佢地以為我唔交,

咪cut咗我條線囉....真係比佢哋吹到咩一聲呀.....

好啦, 黑開有條路....到咗星期三, 返工都無事發生的.

到咗放工, 返到去買餸囉....行到樓下, 發覺.....

吓...無帶鎖匙...心諗...唔係真係咁黑仔呀....咁都得...

最後咪係樓吓到坐咗半個鐘等阿榮老公返嚟救我囉......

三日了, 黑足三日呀, 明天星期四,

好....終於都放一日假...開開心心, 約咗gigi同阿ying番琛圳吃好嘢,

準備出門, 檢查有無帶齊嘢先......

一檢查發現...唔係呀....張回鄉証呢??????

唔見咗.....諗吓諗吓...唔通留咗係公司的一個手袋仔到.....

即刻打咗比gigi先, 佢一聽到...唔係呀....咁我通知阿ying唔好出門先,

等我打番公司, 叫個可靠的同事幫我睇吓, 係咪真係留咗係個手袋仔到.

打番去...真係留咗係個手袋仔....點解會留咗係到, 係因為我不嬲有個咭片套,

係放啲証件的, 有時食完中午飯, 我同gigi落街行吓,

我咪會將個咭片套, 銀包及電話,

放係呢個專係for公司出街時用的手袋仔到囉...

可能係早幾日, 我出咗去, 返到公司,

攞溜咗出嚟囉....你哋話...我係咪黑仔呀.....跟住我咪唯有千里迢迢咁,

又坐車番去公司到攞番...跟住再約佢哋兩個係上水到等囉....

終於攞番張回鄉証啦, 以為ok啦.....呵呵.....

去到上水火車站, 同gigi講開帶咗啲人民幣, 諗住係個袋到攞出嚟啦,

 搵呀搵呀....我望住giigi, 我話....成個人民幣銀包唔記得囉呀.....

gigi望住我, 笑咗出嚟, 又好無奈咁....唔係呀...你真係.....勁黑喎....

阿ying嚟到, 講比佢聽, 佢話你咁黑仔, 就唔好叫我哋出嚟啦.....

就係咁....我真係黑足咗四日....我同佢哋講, 死啦, 聽日係星期五,

又唔知會發生咩了....又唔知黑啲咩了....

最後, 我哋係琛圳到, 佢哋兩個全程都要睇實我, 因為我實在太黑了.

都好彩我哋無事發生, 仲好好玩添.

 

嚟緊就快新年, 希望我的黑仔係黑到今日,

新的一年, 希望我自己事事順利啦!

都祝各位: 身體健康, 心想事成!