順利完成第一次化療針

 

2008年12月3日(星期三) 

今日約咗11點做化療, 媽咪早咗半個鐘到,

早啲去到辦登記手續, 我就吃過早餐, 坐車去醫院到搵佢哋了.

去到4樓化療部, 入到去, 比我的第一印象係:

環境舒服, 清靜, 整潔,

唔似去咗醫院, 令到病人及家人都無一啲懼怕感.

可以令到病人得到放鬆, 順利完成化療.

當我見到有咁的環境, 我的心又定咗好多,

安心好多, 我諗媽咪都係咁諗.

到咗十一點半, 終於都到媽咪了,

姑娘叫我同阿哥係出面等,

不過, 我哋可以係出面到望到佢哋的,

見到姑娘開始捉住媽咪的手, 係到搵血管, 好似都搵咗一陣,

又試咗幾次, 我同阿哥係出面到又有啲擔心喎,

我哋倆兄妹自言自語咁講: 唔係話, 姑娘, 唔好搵咁多次好喎, 阿媽痛嫁.

好彩都ok, 因為見阿媽同個姑娘有傾有講, 咁我哋都放心啲.

其實所謂的化療, 就好似吊鹽水咁的,

時間好快咁過, 無驚無險見到媽咪吊住的藥水用咗45分鐘到就注哂入去身體了.

之後, 我就入埋去, 姑娘見到我, 就話比我知要注意啲咩.

呢位伍姑娘好好人嫁, 好詳細咁講咗好多嘢比我哋知.

跟住量埋血壓, 就走得lu....

離開咗醫院, 我哋三個人慢慢行番去屋企,

係途中, 我哋同媽咪傾, 頭先做化療針, 痛唔痛, 有無咩特別的反應呀.

咁媽咪話當然有啲痛啦, 同埋佢feel到啲化療藥係個喉嚨走過,

跟住又係個腦到走過, 跟住其他地方就feel唔到了.

可能係第一針的關係啦, 加上我買咗一隻好貴的止嘔藥比媽咪,

伍姑娘都話, 食咗呢隻咁有效的藥,

佢估計我媽咪應該無咩問題的, 不過都要睇多幾日先知.

因為啲副作用無咁快出現,

見到媽咪暫時無咩問題, 望吓個鐘, 可以趕得切返下就,

咁我就叫阿哥好好睇住媽咪, 咁我就返工了.

返工時, 有打過電話比媽咪, 佢就無事, 咁我都安心.

放咗工, 又打比佢, 媽咪都話暫時未有咩唔舒服,

咁都好, 希望上天好好眷顧及保佑媽咪.