2008年12月29日(星期一)
終於都放完聖誕假了,
嘩咁快又要返工,
由於老細放咗假, 所以今日好free呀.
放咗工返媽咪到食飯,
24號媽咪打咗第二次的化療針,
今日返到去, 媽咪話好精神,
今次無嘔, 無頭暈, 無好唔舒服,
反而仲好好餵口添....
見到咁我當然好放心咁開心啦....
希望一切安好.
2008年12月31日(星期三)
今日係除夕, 沒有特別的節目,
因為好想留係媽咪身邊,
我只想與家人渡過.
放工回家, 與媽咪一起吃過飯,
大家有說有笑,
然後我同阿榮老公就返天水圍lu...
都無咩做....因為唔知點解好眼訓,
返到去, 沖過涼, 剛到12點....
就去搵周公了.....
一切都從簡, 好好休息吧...
因為明天同媽咪一齊出去行吓....
好了, 祝位新年快樂!
下次再見啦！
2008年12月28日(星期日)
今日係老公的鄰居國璋結婚,
所以我哋一家人都去飲宴啊....
今次係屯門美心皇宮酒樓, 好近啊...
今日的婚宴, 有幾個位我都感動到喊,
一part係一對新人致詞,
新郎講咗幾句之後, 就開始喊了,
我都係第一次見到新郎喊炸,
之後, 新娘又喊喎...而且佢哋講的說話真係好感動,
我感受到佢哋倆位一定經歷過好多的嘢,
先可以行到今日.
第二part係, 新郎拿著999枝玫瑰花,
一路唱歌入場, 然後在新娘面前正式求婚,
現場同新娘講: 由佢答應同佢結婚一刻, 到今日, 佢咩都無做過.
原來係無同新娘子求婚,, 新郎想補番.
呢一part佢哋倆個又一齊喊了......
對結婚公仔好得意呀...
你哋睇清楚啲...個枱號牌係有埋花邊嫁...
好細心及好心機呀
美心皇宮酒樓
我都未睇哂佢哋啲靚相呀
我睇咗幾本, 影得好靚, 好型
睇吓呢張油畫, 男女主角都好cool好型
又一張今年收到的靚喜帖,
佢哋倆個真係好有心機有心思呀,
當我收到時, 我好驚喜, 呢張美心喜帖,
我之前都收過, 但係....你哋睇吓...
佢哋自己加工咗,
仲要係立體嫁, 唔係就咁貼上去嫁.
張張咁整, 都幾花時間同心機啊...
未入席前, 我哋去咗屯門市廣場到行咗一陣,
見到有啲聖誔景, 影吓相先...
2008年12月26日(星期五)
Boxing Day
今日係boxing day, 我無拆禮物,
因為我同阿榮大家都無再因為啲咩節日而專登買禮物比對方了.
唔係無情趣, 而係我哋大家都知對方係需要啲咩.
最重要係每一日我哋都過得甜蜜溫馨,
咁就係我哋最好的禮物了.
今日我哋倆口子有咩攪呢...
哈哈...就係各自各做自己想做的事,
阿榮係到計數.....而我咪就係趕工整我哋去日本旅行的日誌放係blog到囉.
超忙呀....
2008年12月27日(星期六)
今日阿榮老公要返工啊....好可憐呀.
而我咪係屋企到訓覺囉...
不過我都係訓到十點啫, 比起平時的我,
早咗好起身了.
起咗身, 又開始做家務了,
之後等阿榮老公放工返嚟, 我地就去嘆番個下午茶先.
跟住我哋就買餸, 行咗一陣就返屋企lu...
睇下今晚食咩先...
花少爺及花少奶又出場了.....
豉汁帶子蒸滑豆腐
有機菠菜炒肥牛
豉汁帶子蒸滑豆腐食譜請click:
http://hk.myblog.yahoo.com/jobechan0911/article?mid=3093
豉汁帶子蒸滑豆腐
材料 :
豆腐、帶子、蒜蓉、豆豉
(如想滑啲可買百褔蒸煮豆腐,但就無咁重豆味)
("帶子"凍肉舖頭有售)
調味料 :
(1)生抽、少許雞粉、熟油
(2)蒜蓉豆豉加入少許糖攪勻
做法 :
將豆腐切件，然後將帶子放上面
將蒜蓉豆豉平均放上帶子面
水滾後大火蒸約8分鐘，熟後加入(1)調味料即成，亦可加幾棵芫茜做裝飾
日本九州之旅--由布院(又名湯布院)
2008年11月16日(星期日)
(第四天)--Part I
晨早起床, 再次享受展望露天風呂之樂.
最可惜真的不可以拍照啊...因為我們的露天風呂可以觀看日出啊...
真的很美...令人有種新一天的感覺.
自助早餐於杉乃井酒店內. 早餐後, check-out,乘的士到JR別府站.
從JR別府站乘JR日豐本線.
再轉乘久大本線特急(所需時間1個鐘21分鐘),
前往溫泉出水量全國第三的由布院.
到達由布院JR站, 一落車, 望過對面月台...啊...原來哥哥巳經到咗了.
我哋會合咗後, 寄存行李於站內Lockers, 然後在由布院站影相留念.
出發了, 開始我哋的由布院旅程.
聽人講話由布院有一間好好食的布甸, 嚟到當然要試吓啦, 每人一瓶, 食落真係又香又滑, 甜味剛好, 若加埋一啲蕉糖, 又另外的味道, 食落苦中帶甜, 好味!
臨走前, 我都買咗兩個返嚟香港食呀....呵呵...
乾杯.....這次以布甸代酒啊...
由布院的兩旁都是商店, 好多各式各樣的商品, 有食的, 有玩的, 有裝飾的, 有新奇的, 總之多到你係行唔哂嫁....
而且仲可以坐馬車參觀添!
沿途見到有棵咁靚的樹影吓相先, 走了, 因為我哋要去搵午餐的地點啊.
終於見到我哋想去的餐廳指示牌, 一路行一路欣賞周圍的環境.
無高樓大廈, 只係遠望見到山, 天空. 真係好舒服啊!
到咗了....到咗個餐廳了....
由布院最著名的係走地雞及豐後牛.
我哋梗係要試吓啦...
(1) 哥哥的---天婦羅定食
(2) 叻叻的--天婦羅壽司定食
(3) 我, ivy及經理的 - 走地雞定食
(4) 阿榮的--豐後牛鐵板燒食定
天婦羅炸得好香好脆, 而且份量好足.
走地雞真係走地雞..因為肉質鮮嫩,仲要係好彈牙, 好爽口, 唔係平時係香港食的質地, 好特別, 而且夠味. 值得一試!
豐後牛, 唔怪之咁著名, 未到和牛咁入口即溶, 但差不多接近, 肉質鮮嫩且多肉汁, 唔食真係走寶啊...
叻叻同哥哥的表情...超攪鬼呀! (好喜歡這張相啊.....)
當然唔少得合照啦....
午饍後, 我們要出發到由布院著名的'金鱗湖'欣賞湖景及拍照.
沿途都有很多大街小巷...
很喜歡這張, 因為拍得很自然啊....
你們找到我們五人嗎????
很喜歡這裡的屋頂.
原來由布院的街道非常長啊, 而且還有分叉路....
我們走了一會, 仍未見到有金鱗湖的指示啊, 領隊叻叻提議, 時間有限, 這裡又大又多商鋪, 各自各活動, 約定時間在由布院站等.
而哥哥及叻叻仍想找金鱗湖, 所以他們繼續前往, 而我們四人就決定不去, 在這裡購物...
後記: 好開心可以一邊享用露天風呂, 一邊觀看日出啊..真的很美.
可以嘗到當地著名的走地雞及豐後牛, 在香港吃不到啊.
還有那美味的布甸啊.....諗起都好想食啊...
由布院 Part I完了, 等我下篇啦....
