擔心媽咪

最近好唔開心,因為擔心媽咪的身體,點講好呢?當我發現媽咪突然有高血壓,個心沉咗一吓,好想喊,好唔舒服,好心痛.媽咪一直身體都好好的,我知媽咪因為擔心阿哥的事,又擔心阿婆的病,令到佢唔開心,一個人唔開心,就會容易有病,所以我真係好擔心. 我可以做咩呢? 我只可以每天打個電話關心媽咪,叫佢唔好諗得太多,要小心身體. 我見到媽咪唔開心,我自己又唔開心,所以我決定同媽咪去旅行散心,不過,都要等阿婆的病情穏定先,我今晚都有問過媽咪阿婆的情況,媽咪話都係未好番,我諗媽咪一定好擔心,就好似我擔心佢一樣. 所以未知去唔去到旅行,因為我都知媽咪會唔放心阿婆,我都係,所以睇定啲先.

有時覺得自己因為自己的家事,好唔開心,好想同朋友傾吓,但係......又唔知應該點講好?又唔想煩到佢哋?聽得多都煩啦! 好彩而家我有阿榮老公,真係好彩有呢位好好的老公,好似星期六咁,好唔開心,老公訓緊覺,我走入房望住阿榮老公,攬住佢,個一刻我終於忍唔住喊咗出嚟,就係咁,嚇到阿榮老公即刻醒咗,問我做咩呀,做咩事喊呀.....我就只係係咁喊同寧頭,都唔想講,只係好想佢攬住我,當阿榮老公攬住我的嗰一刻,個心舒服咗好多,定咗好多,擔心都少咗,唔開心都無咗九九十十.