2010年7月12日(星期一)
天氣真係好熱啊...
原本又係因為天氣熱, 再加上好攰, 唔想煮飯嫁
不過...諗起出去食, 又唔知食咩
算啦...辛苦啲, 都係自己煮啦
突然好想食節瓜
呢味餸我都係第一次炆嫁咋...
又幾好味啊...嘻嘻, 又自己讚自己了
今晚打過電話比媽咪
問媽咪今晚煮咩餸???
呵呵呵....我哋倆母女真係心靈相通啊
都係煮節瓜炆排骨喎
真係橋了...
節瓜茶樹菇炆排骨
材料: 節瓜 2條, 排骨 15至20蚊, 冬菇 6隻
茶樹菇 適量, 竹笙 適量, 蒜蓉, 薑 數片
調味料: 蠔油, 生抽, 老抽, 水
準備工夫:
排骨用薑汁, 紹酒, 生抽, 生粉, 糖醃一會, 備用
節瓜去皮, 切件備用
冬菇浸軟後, 加入少許生抽及糖醃一會, 備用
竹笙浸軟, 切去頭尾, 備用
做法:
(1) 起鑊加入油, 先爆香排骨一會, 盛起備用
(2) 起鑊加入油, 爆香薑片及蒜蓉, 加入冬菇及茶樹菇爆香,
再加入節瓜炒一會
(3) 加入調味料加蓋片刻, 待汁料滾後, 加入排骨及竹笙
一同炆煮, 煮至節瓜及排骨轉腍後, 加入蔥段炒一會, 即成.
** 茶樹菇及竹笙可以不加，以上材料可以自行搭配啊。
同場加映
好正呀!!不過...要買冬菇又要買茶菇同竹笙...老公實會話煮第二樣,佢驚買咁多野用唔晒,放埋一邊又變壞>.<
回覆刪除[版主回覆07/13/2010 09:57:00]冬菇你咪去媽咪到攞幾隻囉。。。哈哈
我呢篇BLOG， 加咗最後**， 茶菇及竹笙可以唔加入去嫁。 可以自行改嫁。又可以加啲瑤柱又得，無咪又唔加囉。淨係節瓜炆排骨都得嫁。
我都係諗起仲有淨啲茶樹菇及竹笙咪加埋入去囉。。我好鐘意煮餸，係因為可以有好多變化，咁咪唔駛成日咁悶囉。係咪先。
但多D唔同菇,好似好味好多咁~~~
回覆刪除[版主回覆07/13/2010 10:19:00]咁又係呀。。。正好多嫁。
點解我整親排骨都好un.係乜野問題呢?火太大?
回覆刪除[版主回覆04/05/2011 21:57:00]你點整啊...我都無咩特別啊...都係 排骨用薑汁, 紹酒, 生抽, 生粉, 糖醃一會, 就係咁去煮.
嗯..你係咪都同我一樣用以上的調味料去醃啊... , 唔通真係煮得太耐..定係你用的部位問題呢...我通常用腩排或者買有骨連住的排骨啊...你試吓...
tks a lot~~~
回覆刪除