是但煮意

 

一連幾日都無update吓蕭c奶的煮意

係因為...攰

係因為...無時間

係因為...需要早返啲瞓

最重要係....無咩特別煮意

so 攪到今日先寫吓囉....

2009年11月10日(星期二)

 

今日約了朋友仔係旺角

所以趕唔切買餸煮飯仔

所以叫咗少爺放工去民豐到買定啲

水餃及雲吞

等蕭c奶搵完朋友仔後

返屋企煮水餃雲吞+菜

超級抵呀, 蕭c奶見完朋友仔後

經過旺角街市仲未收檔喎

行過見到7蚊有兩大個生菜

好...返正今晚仲未買菜

跟住見到仲有啲白菜仔

唔買都唔得...因為係2蚊一斤呀...

係2 蚊呀...蕭c奶點忍得手唔買呀....嘻嘻

 

灼生菜

清清哋, 又容易洗又快熟

民豐水餃及雲吞

其實我覺得雲吞皮好食啲, 好滑嫁..

估吓呢款係咩餃....

韮菜水餃

好香韮菜味, 不過食咗幾次覺得太咸了

又估吓呢款係咩餃/雲吞....

冬菇豬肉雲吞

呢個好味呀, 咸味適中, 加上好香冬菇味, 而且仲爽口添, very good.

最後又估吓呢款係咩餃/雲吞....

上海菜肉雲吞

呢款都唔錯呀, 啲菜肉好爽口, 又夠滑, 好食過韮菜呀

 

簡簡單單咁又食咗一餐了

碗都洗少幾個, 少爺就最happy啦...

 

 

2009年11月12日(星期四)

話說早幾日蕭c奶咪去咗個

子宮肌瘤講座x康保雞@Towngas

咪送咗隻康保少爺雞的

今晚終於都有得試煮及試食了

睇吓...隻康保雞真係勁大隻呀...

蕭c奶原本想一邊用嚟冬菇金針雲耳蒸雞的

另一邊用嚟煲粥

不過後來唔想煩, 蕭c奶又懶,

所以索性白切雞就算了

同平時食開的黃油雞好唔同

黃油雞通常蒸完個雞皮係黃色, 同埋多黃油

而呢隻康保雞呢, 好鬼白雪雪, 無咩顏咁

蒸完出嚟嗰下, 蕭c奶個心巳經覺得麻麻哋

嘩...呢隻康保雞, 切雞切到蕭c奶手軟

嘩...佢啲骨好鬼硬嫁, 睇吓...切到都唔靚仔

因為每切一吓, 都要再補切多兩吓先切到呀

最後講吓隻雞好食嗎?

蕭c奶就覺得麻麻了, 有啲 '酥' 味, 仲有啲肉質我覺得實咗啲

少爺就話, 都係少少酥味, 不過就覺得肉質幾滑幾彈

都係果句, 各人的口味不同

但係...蕭c奶都係鐘意食黃油雞多啲囉.

韮己豬潤廋肉湯

見幾日無飲過湯, 因為媽咪去咗旅行

自己又無時間, 見到街市有韮己買

貪夠方便又容易又快手可以滾到個靚湯

少爺返到嚟, 飲咗幾啖, 話個湯好正呀, 好甜, 好好飲

最後再飲多一大碗添...

炒白菜仔

一定唔少得, 每餐要有菜啦...

 

 

2009年11月13日(星期五)

 

今日快手做好公司的工作

準備連放4天

好好休息, 輕鬆吓

放咗工, 照常趕住回家煮飯啦

先去街市行一個圈先

見到有帶子喎, 忍唔住咗

 

蒜蓉豆豉蒸帶子

預備：買番黎洗乾淨，除去腸臟和其他你唔食o既部位

(但係我全部都食的)。預備蒜蓉、豆豉、蔥花

做法：先用幼鹽同胡椒粉醃一陣，

此時可預備醬料：蒜蓉 、整爛左d豆豉(呢兩樣我係用好多的)、蔥花、

油、麻油、酒、糖，撈勻, 形成一個蒜茸豆豉醬汁，

記得油要剛好到啲蒜茸豆豉面啊..

用廚房紙巾索乾帶子啲水份,

然後將啲蒜茸豆豉醬汁鋪上每隻帶子上,

蒸約4-6分鐘即可(視乎帶子的大小)

呢次我就蒸咗有6分鐘至7分鐘.

我通常蒸到仲有一分鐘就完成時, 我會快手打開鑊蓋,

加入蔥花, 蒸埋剩餘的一分鐘, 就關火, 即成..

冬菇炆康保雞

因為覺得有啲酥味, 唔係幾好食, 所以琴晚食剩咗少少

今日蕭c奶就加咗啲冬菇去炆番佢

加番啲老抽變吓啲色水, 再加番啲酒,

今晚好食好多, 用咗啲酒贊吓, 果然係捌走啲酥味

炒白菜仔

 呢斤菜咪係2蚊囉...好扺呢.

 聽日開始放假了

一連放4日, 希望可以好好咁

做哂啲家務及休息吓啦....

呢幾日的自家煮

真係好求其, 唔係太滿意囉...

希望明天可以煮番啲靚餸先...