擔心阿哥

前幾排阿哥因為工傷,經常都要出入醫院, 嗰排真係好忙,又要幫阿哥跟工傷的事. 講真,我真係好擔心阿哥,佢呀,傷到個右邊面及右邊的眉的位置. 當日,阿哥諗番轉頭都好驚, 出事的時候,傷口係咁流血,我阿哥當時仲攪笑,以為: 嘩,咁大雨的, 即刻上番地面先, 一上番地面,佢另外三位同事見到我阿哥咁樣,佢哋都呆咗一陣,先有反應,阿哥見到佢哋咁的樣,打開隻手睇吓啦.....嘩, 咁多血的,先知道自己原來傷咗. 咁啲同事咪立即送佢去醫院囉! 去到醫院阿哥都未知自己有幾傷,個傷口有幾深, 當係醫院時,阿哥照吓鏡,一睇: 阿哥個心就開始驚,原來眉頭個到傷到見頭骨呀!哎呀,好恐怖呀! 阿哥開頭同我講,又話無咩事啦....當我去到見到佢, 哎....其實個心好痛囉! 而我媽咪見到阿哥,其實個心又係好擔心阿哥,又好心痛.

由於阿哥係將軍澳到番工,所以要送阿哥去最近的醫院.大家都知我住邊區啦! 所以好唔方便囉,同埋真係好遠,我就嗰幾日都放咗下午去探阿哥,而阿媽就辛苦啲囉! 好彩住咗幾日就出得院了.

其實自從阿哥工傷之後,我感覺到阿哥變咗少少,老實講,以前阿哥唔會講好多自己嘢比我知,無論開心定唔開心,有事定無事,小事定大事,阿哥都唔會主動同我傾. 我記得細個的時候,阿哥好錫我,阿哥有好多時都會同我傾吓的,但係到咗大個之後,阿哥就唔係點理個屋企,無關心屋企的人或事,係呢十幾年裡面,其實我都好唔開心呢方面,有時諗,一家人點解唔可以開心見成講呢?有咩嘢係唔可以解決呢?一家人係可以共患難的?我其實好嬲阿哥,係呢十幾年裡面,佢咩都唔理,做任何事都只係為自己,永遠都唔會諗吓身邊人的感受,好自私呀! 但係好奇怪,無論阿哥點都好啦,佢都係我阿哥,係我的親人,我愛我屋企人,所以我知道只要有'愛',咩都可以解決到.

而家阿哥都好啲,佢都會主動同我傾吓,同我講,都會肯聽吓我呢個妹妹講. 不過,我唔敢諗得太多,或者太好,因為我怕,我怕到頭來有係得個'吉'字.我唔想希望完又失望,有時我真係受唔到咁的刺激. 我真係好希望阿哥識得諗,為吓我呢個妹妹著想吓,又為吓媽咪著想,為吓嘉豪仔著想. 平平淡淡過啲安穩的生活,一家人開開心心,健健康康就最good了.