左髀 ● 入廚樂

2009年3月27日星期五

好鬼普通的自家煮...

2009年3月24日(星期二)

琴日唔想煮飯, 所以同咗老公去咗樓下到試下間泰國菜,

住咗係到咁耐, 一次都未幫趁過呢個泰國餐廳,

琴晚終於第一次去...唔錯呀...

免收加一, 而且仲好好食添

我哋第日會再幫趁.

今日無得唔煮啦...

睇吓今晚食咩餸:

梅菜蒸豬肉

炒青瓜

燒肉

突然好想食...所以經過時, 買咗啲...

2009年3月25日星期三

煙肉迷迭香雞柳伴黑醋汁

其實好早前在家開了派對

那次的食物

一直都很想寫回食譜出來

但一直未有心機也沒有有時間

直到最近好友‘暑媽’留言給我

想要這個‘煙肉迷迭香雞柳伴黑醋汁’的食譜

這時我又怎能再拖呢。。。

這款食物，可以當餸也可以當小食

尤其適合開派對來招呼好友

酸酸的味道好胃口啊。。。

大家不妨試吓啦。。

好容易整嫁。。

煙肉迷迭香雞柳伴黑醋汁

材料：雞胸肉，煙肉

醃料：黑胡椒，迷迭香

汁料：黑醋，橄欖油，黑胡椒

做法：（1）先將雞胸肉用黑胡椒及迷迭香醃20至30分鐘。

（2）將醃好的雞胸肉用煙肉卷好，可用牙簽吉實。

（3）起鑊，不用加油，因煙肉會出油。

將煙肉雞柳卷兩面煎熟。

（4）準備汁料，把黑醋及橄欖油撈勻，

加入少許黑胡椒，即成汁料。

（5）將煎好的煙肉雞柳卷除走牙簽，上碟，

倒入黑醋汁料，即可食用。

可以加入沙律伴食。

** 有朋友問過我，卷住雞胸肉會否難熟，請大家放心，只要慢慢煎，差不多時，可用叉吉進雞胸肉內，可以看到是否巳熟。

卷煙肉雞柳時，個塊雞胸肉通常我會切做兩至三份，因為一件雞胸肉可能好大件好厚，咁就真係會好難卷同埋難熟。

若果用啲比較平的煙肉，會比較難卷，因為比較容易散開，（不過我都係照用平煙肉，慳家呀嘛），如果用啲貴少少嗰啲，會靚啲及無咁容易散。

2009年3月24日星期二

321@3月21日

321這三個數字

不是三圍數字

也不是某某家人或朋友的生日日子

更加不是我和老公的甚麼紀念日

通通也不是

究竟321代表著甚麼呢

意義重大

是我今年的目標其中之一

今年所定下的目標

剛好在3月21日達成今年的第一個目標

當我能夠達成這個目標

看了看日曆

3月21日

心想.....321...多順序啊

上天知我是一位容易忘記日期的人

上天給我指引

給我在這天達成第一個目標

不早不遲

就在3月21日

這樣我便容易記下這個目標

是幾月幾日達成的

3月21日當晚

心情很好, 很開心

能夠完成自己定下來的目標

那種感覺真的不知怎樣去形容

只感覺很有滿足感

很有意義!

2009年3月22日星期日

New Shoes@Jelly Beans and Minx (made in Japan)

2009年3月22日(星期日)

今日約咗阿姨同媽咪飲茶

所以瞓到10左右就要起身lu...

出咗去上水到飲茶

見到細表弟....超高啊...好似仲高過阿榮老公咁喎...

飲完茶, 就同阿姨及媽咪行咗一陣

買咗兩對鞋...需然係貴咗啲, 因為係日本鞋

但係對於而家超難買鞋的我

要買到一對又舒服又平的...而家無我份lu....

唔係我巴閉呀....係真嫁...

以前平貴都可以, 唔鬼知點解近呢兩年

好難買鞋啊....因為好容易鬆腳

而家多數要著一啲有少少魷魚的鞋或者有帶扣著的

今日好開心..因為比我買到兩對心愛鞋...

真係好舒服, 一對係有少少踭, 呢對係Jelly Beans,

聽到好多人話呢隻牌子的鞋, 好舒服, 而且仲有好多款式,

嚟自日本的, 聽就成日聽, 但係我跟本都未試過去買

今次竟然比我買到, 呢對係阿姨一見就好LIKE,

叫我試比佢睇, 一著上去..真係好舒服啊...而且有特別, 唔怕會同人撞.

呢對係阿姨送比我的.

另一對, 都係日本牌子---Minx

係一對平底的open toes的鞋, 有少少魷魚, 所以唔鬆鞋

一著上去, 我好鐘意啊....心巳經係到諗....買梗.

買完之後....行行吓...又見到另一間有一對都好靚嫁...

都有去試...真係好靚好舒服...但係....買咗兩對lu...算數啦...

有時就係咁...

當你想買的時候, 就一對都搵唔啱,

但係你無諗住買時...

又會比你睇中咁多對嫁喎.....

真係唔知係好定唔好lu.....

星期日之煮@媽咪

2009年3月22日(星期日)

同阿姨行完街之後...

我就同媽咪去買餸了

今晚叫咗阿哥及嘉豪過埋嚟一齊食飯

不過...阿哥後來有啲朋友約佢

咁就得嘉豪同媽咪了

仲諗住炒碟蜆比阿哥試吓添...

算啦....留番下次...

蕃茄暑仔排骨湯

食譜請打開: http://hk.myblog.yahoo.com/jobechan0911/article?mid=121

碎豬肉煮豆腐

豉椒炒蜆

食譜請打開:

http://hk.myblog.yahoo.com/jobechan0911/article?mid=4228&prev=4248&next=4195

煎魚

趁媽咪係到....我要食煎魚啊...

因為我最唔識煎魚嫁...唔好以為我咩都攪得掂.

灼菜心

今日阿榮老公就因為要剪頭髮

所以佢無同我哋去飲茶

佢自己起身煮啲嘢食

跟住就先返去老爺到

由於我知奶奶好鐘意食雞腳

所以琴日專登試整沙薑雞腳

咁今日阿榮老公可以幫我攞啲比奶奶乃食了

等到奶奶放工返屋企

我打電話比佢，問佢好唔好食，

佢同阿哥都話：正呀。。。好好味。

奶奶仲話下次可唔可以加點辣喎。。

我話好啦。。。下次再整。

2009年3月21日星期六

沙薑雞腳(內附食譜)

早前買咗兩磅雞腳

因為好想試吓整沙薑雞腳

今日星期六, 比較有時間

一於試吓整先...

材料：

急凍雞腳 (我買左20隻)

鹽焗雞粉（3-４包）

做法：

-雞腳徹底解凍，煲滾水，下雞腳，水要足夠蓋過所有雞腳

-蓋上煲蓋，煲約5分鐘，同時準備一盤冰水

-撈起雞腳，即放進冰水中，至雞腳完全冷卻，倒去冰水備用

-鹽焗雞粉用水開好（先開３包），煲另一煲水，水要足夠蓋過所有雞腳，水滾後下粉液，試味(如不夠味就多下一點鹽焗雞粉)，因人人口味不同，可按自己口味加減。

-下雞腳，轉中火炆約４５分鐘 (可撈起一隻測試夠不夠"林"，鐘意"林'd開再炆多一會)，再熄火，揭起小小煲蓋，浸起碼一小時，可令雞腳更入味

-臨食再加熱，撇油(會標好多油架)，撈起上碟，加麻油便可

**剩下的汁可用密封容器盛好，放進雪櫃，留一至兩星期再用。