2010年2月25日(星期四)
呢排天氣真係勁潮濕呀,
從來都未試過呀. 早兩晚間房啲牆出哂水, 天花板滿哂水珠
今晚放工一返屋企, 嘩....望個廰的天花板...
oh no....好似西米露咁大粒的水珠,
即刻call少爺, 即刻去買抽濕機...
嘩...勁多人係到搵抽濕機啊. 想買部三千幾蚊的日立,
可惜有錢都買唔到, 全線斷哂貨之餘,
就算想買第二款, 都全部無哂貨
最後搵到一間, 都只係淨番惠而浦及飛歌,
最後買飛歌, 因為佢容量最大. 價值係1980.
即刻放入房, 又真係幾好喎, 全間房乾番了...
出面走廊又係勁出水
每日出門及番嚟屋企
都行到仲慢過隻螞蟻
因為好驚滑倒, 跌親
各位朋友/bolg友, 如果你哋果度都係咁
就要小心啲了
咁大個女都係第一次用抽濕機
唔用唔知, 抽濕機又真係幾好用喎
抽一陣就巳經好乾爽了
不過屋企又會多咗一件電器囉
其實一個屋企, 真係最好有一個收納雜物的雜物房
咁就成間屋都可以好整齊又乾淨俐落啦
(有一個露台及雜物房, 係蕭c奶的夢想啊...)
唔知你哋屋企又有無我哋咁潮濕呢?
蕭C奶往年都無專登買利是封
因為媽咪以往都有好多利是封
咁因為環保的問題
無奶油唔用咗啲舊的
又走去買啲新嫁嘛
經過咗兩年的派利是新涯
舊有的利是封終於都用哂了
今年終於可以用自己喜愛的利是封了，YEAH！
今年有三款利是封，
因為數量有限，
所以限量發售呀
只會係好friend好friend的朋友仔先會收到啊
收到的朋友們，你哋就知你係蕭C奶心目中的地位了
蕭家姐用開Bioderma的護膚品，
Bioderma今年派咗勁Sharp的顏色利是封
好靚好型啊。。。
不過每隻顏色得十個咋
ICBC (工商銀行) 每年的利是封都好靚,好得意嫁
其實呢款係上年嫁了, 不過為咗要用哂舊有的利是封
今年終於可以用了.....
而呢款係今年ICBC (工商銀行) 的款式
不同國籍的公仔
今年得一PACK咋, 所以真係好少朋友先會收到啊
仲有只得少量的叮噹利是封
都係限量發售嫁...呵呵
唔記得影相留念添.
２０１０年２月１８日（星期四）
年初五
是日天氣依然寒冷
琴晚係譚魚頭到有三樣火鍋料打包咗
諗住今晚放咗工去超市到
買多少少材料整個日式鍋嘆吓
但係當蕭ｃ奶係巴士到落車時
發覺好凍呀．．．．
諗起要洗嘢．．ｏｈ．．打退堂鼓
咁橋行過大快活
見人係到烚吓烚吓．．．
靈機一觸，不如比錢人賺啦
即刻打比少爺話唔係屋企煮了
不如去大快活到烚吓烚吓啦
最攪笑係．．．．蕭ｃ奶學咗少爺的同事咁
學咗咩呢．．．就係．．
叫少爺落車後， 先返屋企攞番琴晚係譚魚頭打包咗的火鍋料
到大快活到食埋佢．．．．嘻嘻
我都係第一次咁做咋
原來係好普通的事
因為有其他人都一樣係咁，
自己帶咗少少火鍋料係大快活到打ｂｉｎ ｂｉｎ啊！
咁都無咁驚．．．不過真係好好囉
比幾十蚊人哋， 自己又唔駛做餐勁的
幾好呀．．．加上自己帶少少火鍋料去打， 仲正啊．．
以下的相片係來至於我部手機, 所以影得麻麻哩.
我哋要左一個皮蛋芫茜湯底
要咗一份隻拼 - 肥牛及黑豚肉
及少爺喜愛的金菇
而個湯底仲包埋幾片生菜及木耳, 兩隻餃子及一個生根
又幾好喎, 仲以為得個湯底, 啲火鍋配料係要自己買添
呢張影時, 唔知係心慌慌呢!
影到震哂, 因為呢碟係......譚魚頭的澳洲A級肥牛粒
仲有少少粉絲添呀....
之後我哋再追加配料
oh.....唔係嘛....咩都買哂
得番西洋菜及黑豚肉咋....咁都照要囉..
大快活的打bin bin最特別係...
仲會跟埋烏冬或拉麵或米線或泡飯
不過少爺order時, 所有麵類都買清
只係淨番泡飯....
所以我哋都無得擇啦.
佢係會送上一碗白飯及一隻雞蛋
少爺問員工應該點食???
員工教路: 你哋食哂啲火鍋配料後, 咁個湯就會變咗做精華,
係呢個時候, 就打隻雞蛋落去個湯到, 然後攪勻個蛋,
跟住隨即倒入碗白飯, 再攪勻佢, 滾後, 關火焗一會,
咁就變成一煲泡飯了.
哈, 咁又比大快活諗到喎.
大快活比的果碗白飯, 其實望落去好細,
但結果整咗之後, 係會變成一煲仔喎
你都咪話都幾多嫁!
我哋仲留咗啲澳洲A級肥牛粒係啲泡飯到
嘩....食時...一流呀. 又估唔到個泡飯真係好好味.
不過....當然係好肥啦....但係食得就唔好咁煩了,
又驚呢樣又驚個樣, 係咪先!
仲有啲皮蛋係到.....嗯....YUMMY YUMMY.
哈...真係好驚喜呀, 平時去開大家樂的打bin bin嫁
今次第一次係大快活到打bin bin
又係估唔到咁好喎, 下次都會幫襯啊.
下次要帶多少少自家配料先...呵呵...
原來返公司同gigi講起, 佢話自己帶配料去大家樂呀,
大快活到打邊爐, 係好平常嫁喎...
oh..原來人家一早就係咁...係我哋一直都唔知!
2010年２月１７日（星期三）
年初四， 開工大吉
是日氣溫依舊得８度左右
很冷
蕭ｃ奶講明這幾天都不會下廚
天氣這麼冷， 打ｂｉｎ ｂｉｎ最好不過啦
所以昨晚約好了少爺
原本約好了在旺角的稻香漁港打ｂｉｎ ｂｉｎ
可惜太多人了
有見及此， 立刻過檔
走到譚魚頭博一博
哈．．．竟然有位喎
就是這樣， 第一次到譚魚頭打ｂｉｎ ｂｉｎ了
牛魔王海鮮盆， 價值２８８元
好大份量， 足夠二人食用
呢個盆的火鍋料全部都好新鮮及好味
不可不提的是， 譚魚頭的招牌花蓮魚頭真係不可不吃
若果愛吃魚頭的朋友們， 真係要吃啊，
仲有分辣或不辣
牛魔王海鮮盆，總共有十三樣食料
樣樣都係蕭ｃ奶的至愛
譚魚頭蕃茄鍋
８８蚊， 成鍋紅卜卜
譚魚頭蕃茄鍋
嘩．．．係咪好似好恐佈咁呢．．．
放咗啲火鍋料入去影的
我想講呢個蕃茄鍋勁好味呀．．
唔駛點豉油嫁， 個蕃茄鍋好夠蕃茄味
好濃味嫁， 超正！
同少爺食到個拼盆無咩食時
又好似覺得好唔夠食咁喎
咁就另外ｏｒｄｅｒ咗三款火鍋料
澳洲Ａ級肥牛粒
１３８元一碟， 一個字．．．正！
肥牛粒， 半肥半廋，食落有即溶感覺，
但又可以有啲咬口感， 肉質肥美及ｊｕｉｃｙ，
仲要好重牛牛味．
魷魚鬚
無記錯應該係３８元一碟， 見人哋ｏｒｄｅｒ咗
個樣幾新鮮， 就ｏｒｄｅｒ咗一份
灼完之後， 魷魚鬚捲埋一圈， 食落去，
好爽口，真係估唔到， 一啲都唔會韌，真係好新鮮．
無叫錯， 下次都會叫呀．
牛脷
３８蚊一碟，蕭ｃ奶好鐘意牛脷
所以忍唔住要咗一份呀
少爺一食落口， 即刻讚口不絶，因為除咗有牛味，
最重要係牛脷的厚度，即係食時的質感，厚度適中
有咬口，好好味．
真係估唔到譚魚頭的火鍋料咁新鮮
其實上網見有人比食評話譚魚頭唔好喎
但都係果句啦， 個人口味唔同
我自己親身去試， 眼見其他枱的火鍋料都係好新鮮
下次一定要同朋友仔一齊嚟， 咁就可以一齊食多啲食物啊
不過老實講， 食物好， 但係因為譚魚頭的員工唔夠人
所以係服務方面就要有耐性
但係你又會睇得出， 須然佢哋唔夠人， 但係就個個
都好忙， 好勤力的， 而且都好有禮貌．
所以都無影響到我的心情， 而且仲要再幫襯添！
其實最後ｏｒｄｅｒ的三樣火鍋料
都食唔哂啊．．．嘻嘻
所以最後將未食的打包咗
就等聽日睇吓點煮埋佢啦．
呢一餐盛惠６７０蚊
好似好貴咁， 其實跟本個牛魔王海鮮盆
就夠食， 係自己眼濶肚窄
所以當初我哋唔再ｏｒｄｅｒ之後的三樣
埋單都只係４百幾蚊
下次都係唔好咁貪心ｌｕ．．．
譚魚頭火鍋
地址： 旺角彌敦道639雅蘭中心５樓食閣全層
電話 : 2381 2000
香煎羊扒伴意式鯷魚汁及薯茸
材料 (4 人份量)
12件 羊扒
意式鯷魚汁:
1 粒 蒜頭, 剁茸
6條 油浸鯷魚柳
1 湯匙 法國芥未
1 湯匙 白酒醋 (可改用lemon 汁)
50 毫升 初搾橄欖油
少少 沙糖
尼斯薯茸:
1 隻 黃肉薯仔
4 粒 去核黑橄欖,剁碎
2-3湯匙 橄欖油
1 湯匙 剁碎意大利蕃茜
1湯匙 lemon 汁
鯷魚汁做法:
將所有材料用攪拌機打勻, 之後加入適量胡椒粉調味, 完成.
尼斯薯茸做法:
1. 薯仔連皮烚熟後,去皮及用叉壓成茸.
2. 薯仔+黑橄欖+蕃茜+少少鹽+橄欖油+lemon汁 拌勻
(薯茸可以加入鯷魚柳拌勻, 另外怕薯茸凍, 可用熱水坐熱)
煎羊扒做法:
1. 羊扒用鹽及黑胡椒粉調味.
2. 燒熱煎pan, 加入2湯匙油, 將羊扒煎熟, 大約三至四分鐘.
3. 羊扒上碟, 與鯷魚汁及尼斯薯茸伴食.
去核黑橄欖
係Great, City Super等地方有售
大約20元, 一罐有好多的
鯷魚柳
我係towngas到買的
36元一樽, 唔好見佢好細樽
其實佢係一條一條咁圍住的, 入面有好多嫁
我咗六條都仲有好多呢.
脆皮煙肉炸生蠔
材料:
10 隻 生蠔, 去殼及抺乾水份
10 片 煙肉
麵粉 上粉用
1 隻 雞蛋, 拂勻
適量 乾麵包糠 (我用日清)
適量 日式沙律汁伴食
什菜沙律:
50克 什菜沙律
1 湯匙 意大利黑醋 (Balsamic Vinegar)
2 湯匙 橄欖油
適量 鹽及黑胡椒粉
做法:
1. 生蠔用煙肉片包住.
2. 撲粉後沾上蛋汁, 然後黏上乾麵包糠, 再用牙籤穩固煙肉片.
3. 於煎鍋中放入約1吋深的炸油, 油要夠熱, 有小小氣泡就ok,
燒熱後將生蠔用中火/慢火半煎炸至金黃, 取出.
4. 沙律菜與油,醋半勻, 適量鹽及黑胡椒粉調味.
** 唔用有殼生蠔, 可以改用日本的廣島蠔,
又方便, 又夠鮮甜, 隻隻size又一樣, 唔會話有啲大有啲細,
1kg都只買120蚊左右, 由排食呀.
炸蠔與沙律菜及沙律醬伴食
焗洋蔥湯
(Onion Soup Au Gratin)
材料: (8 人份量)
1 公斤 洋蔥, 切幼絲, 直紋切
4 湯匙 初搾橄欖油
1 茶匙 乾百里香 (Thyme)
1 湯匙 麵粉
1 公斤 清水
1 1/2粒 牛肉湯精 (OXO牌子)
200 毫升 白酒
8 片 法式長麵包
2 湯匙 油
1 粒 蒜頭
100 克 Gruyere芝士, 刨碎
做法:
1. 燒熱油, 加入洋蔥炒至透明, 轉慢火慢慢煮至軟身及呈淺啡色,
需要時間大約20至30分鐘. 記得不繼炒, 唔好停手呀.
2.加入麵粉 , 拌勻, 再煮2分鐘
3. 倒入白酒, 用中火煮至差不多全蒸發掉, 加入牛肉湯精, 水及
百里香, 煮滾後收慢火煮約30分鐘, 以鹽及胡椒粉調味.
中間如果覺得唔夠水, 就自己加減了.
4. 洋蔥湯盛於湯碗內, 蓋上一片巳塗油及擦上蒜頭的法式長麵包,
灑上芝士碎, 用焗爐焗至金黃色便可趁熱飲用.
牛肉湯精 (OXO牌子)
係百佳,惠康都有得買
