2010年2月14日
年初一及情人節
蕭c奶及少爺今日中午返咗去奶奶老爺到
坐咗幾個鐘後, 五點左右就返屋企了
因為要準備情人節大餐啊...
早前係towngas到學咗個情人節餐
蕭c奶因為而家好忙, 好耐都無咩下廚
一於趁情人節好好咁為少爺下廚啦
焗法式洋蔥湯
其實好想買兩個新的西式湯碗, 不過無時間去買,
攪到呢兩日去咗吉之島都買唔到心水的
就用咗屋企的飯碗
唔靚囉....不過第一次整呢個湯都真係幾好飲喎
又唔難, 只係花少少時間啫
第日搬去新屋, 一定要買番兩個靚靚西式湯碗先得!
個芝士真係好濃好香, 導師真係無介紹錯呀!
脆炸生蠔伴尼斯薯茸
唉, 呢款炸生蠔....哈...失敗咗
其實原本我預咗每人三隻
不過...個三隻, 炸到濃鬼咗, 唔見得人
而呢三隻都唔係好得好多
睇吓...炸到都唔似蠔, 扁扁平平,
呀導師炸得圓卜卜嫁嘛, 好靚仔嫁
導師用咗煙肉, 不過我就無用到
oh...炸嘢第一次整, 真係好難撐握呀...
睇嚟...蕭c奶又唔知邊日有心情
要再接再勵!
好彩的係....個薯茸好得, 好好味,
因為實在太容易了.
香煎羊扒伴意式鯷魚汁
好彩預咗9件羊扒, 長長久久!
羊扒是用上紐西蘭羊扒, 肉質鮮味又夠juicy
第一次整呢款鯷魚汁
好成功, 少爺都話好有新鮮感
平時多數就咁點芥辣醬
而呢個鯷魚汁, 多咗一份酸味及鯷魚味
好開胃!
其實情人節有時出去食
都唔一定係好貴
就算一個情人節餐
收幾百蚊, 我覺得都好抵
因為老實講, 自己整係有心思
不過用料相對哋係靚
所以都唔係平嫁
出外吃, 唔駛煮, 唔駛洗喎
所以我同咗少爺講
下年一於出去慶祝啊...
少爺...情人節快樂啊
下年我要收到份大的情人節禮物嫁
仲要食餐勁的情人節餐嫁
2010年2月2日(星期二)
浪漫情人節餐@Towngas
今晚約咗三位朋友仔
一齊到Towngas上示範班
主題為: 浪漫情人節餐
Towngas的示範班真係好抵學嫁
每次都有贊助商
只需要每位90元
除了即場有導師教整三款菜式之餘
仲即場有得試食
最重要係......可以得到贊助商的禮物添
真係又食又攞又有嘢學
今次的贊助商係 --- 刀嘜
所以大家睇吓我哋的禮品
係咪好抵呢.
仲有三份食譜
今次要教的係:
法式洋蔥湯
脆皮煙肉炸生蠔
香煎羊扒伴意式鯷魚汁及薯茸
睇吓導師的製成品啦
法式洋蔥湯
呢個湯, 我一直都好想試整, 不過都次次都提唔起勁去煮
今次有導師示範, 更加清楚個步驟
原來都有少少難度的, 就係係煮洋蔥的時候
一定要有耐性
脆皮煙肉炸生蠔
炸物蕭c奶一向都唔煮的, 因為好怕食炸嘢同埋要用好多油
加上又驚自己炸得唔好喎.
今次呢個炸生蠔, 導師用咗日本的廣島蠔
的確肥美及鮮蠔味
而且導師教的炸法, 又的確好easy, 所以一定要自己試整一次
香煎羊扒伴意式鯷魚汁及薯茸
到咗主菜, 有羊扒, 正呀, 我同少爺都好like的
除咗炸物之外, 另一樣蕭c奶又係唔會整的係薯茸
因為一向麻麻哋, 怕太漏及太肥
但係導師今次教整的薯茸, 又唔難整之餘,
導師係薯茸到加咗幾款配料入去, 食法好新鮮好味
加上平時食羊扒, 唔係點薄荷醬就係點芥辣
反而今次導師教整一款叫意式鯷魚汁
勁好味, 酸酸哋又有啲酒味, 好特別啊.
睇吓我哋上堂的情況
今堂勁爆呀, 有成70個人呀....
更係啦, 咁抵喎, 有嘢食, 有禮物收, 又有嘢學
通常導師教哂三款菜式之後
就輪到啲阿姐好忙了
今次要分70份喎
你都未話唔心急
一啲都唔馬虎嫁
仲有埋法式洋蔥湯最關鍵的芝士法包啊...
睇吓...好忙呀..好多人呀, 勁熱鬧
仲有好多年件的羊扒要分呀...
幾位阿姐真係好忙
又要分沙律菜
跟住又要分埋炸蠔啊...
Towngas其實好揼本
廣島蠔都唔係平, 但每人真係一人一隻嫁
終於等到我哋試食的環節了
先嚟碗法式洋蔥湯
飲落去真係好重洋蔥味
而且仲係好甜添呀
再加上呢片焗到香噴噴及充滿芝士味的法包
真係...真係...好味到不得了.
仲有脆炸生蠔
個廣島蠔的確好鮮味
不過導師用咗一條煙肉包住
我就覺得厚咗啲, 下次自己整就用半條
而且會用肥少少的煙肉, 我覺得會更香口
炸咗出嚟, 唔會食到成口油, 炸得好乾身,
而且導師上個炸粉上得好好
唔會厚身, 好好味呀
最後到品嚐羊扒了
個薯茸真係好味, 唔漏, 仲有好香的黑橄欖及蕃茜味, 好正
個鯷魚汁用嚟點羊扒, 勁配勁夾,
其實就好easy, 只係要花啲工夫及時間去整啫
Blog友仔, 有機會都參加吓啦
真係好正嫁
蕭c奶就成日都參加的
睇吓下次又有咩學先.
真係好, 教咗呢個情人節菜式
咁今年的情人節一於照板煮碗
整一次比少爺食啦
