搬後感

 

昨日入伙好順利, 亦都好開心, 奶奶今日第一次見新屋, 佢話無諗到我哋整得咁好咁靚咁實用, 十個讚呀.....還有我的好友叻叻到來, 勁開心囉。 感謝您呀. ^^

媽咪就話見到我哋裝好哂，有齊哂啲家具，反而仲大間個吉屋。又係話好靚，啲顏色好舒服，好實用。又係勁讚囉。

好友叻叻都係咁講，估唔到可以將原本的500幾尺的所有嘢，搬到嚟一間只得200幾尺的地方，仲要係估唔到可以咁大，亦都好欣賞我同少爺的收納方式。

各人亦都讚，新屋的各方面的配套都好好，無論交通，食店，買嘢，通通都好方便。因為我的村係上咗少少山，加上屋的方向向東，各人琴日可以親身感受不用開冷氣的FEEL，仲要各人都話，係勁涼爽，好似打八號咁。。哈哈。。

以前返工放工來回連等車要成2個半鐘，而家返工放工連等車都只係最多一個鐘多啲啲，時間慳咗成半。 車資每人每日以前要40零蚊，而家又慳咗一半有多。 好明白時間=金錢的道理，更加明白點解市區的樓價咁值錢。

慳咗的錢可以足夠比我用係手作仔到囉。。。WAKAKAKA

 

係天水圍到住咗三年，唔多唔少都有啲唔捨得，始終都係有感情的。係呢三年裡面，住咗係到，甜酸苦辣樣樣齊，帶咗好多回心憶比我同少爺。 因為呢到地方大，蕭C奶又愛煮嘢食，所以經常都會同家人及朋友開大食會。其實好感恩，可以三年住咗間大屋，好舒服，可以同好友晴晴媽咪見面。 亦都因為呢到地方大，滿足我結婚後, 可以同少爺及媽咪一齊生活過一段少少時間.

搬咗出去市區, 最不理想係要同老爺及媽咪兩家人的距離遠咗, 不過針係無兩頭利嫁.  唯有搬咗之後, 要KEEP住一星期要有一天返去兩邊屋企,見吓老人家啊... 做女的, 當然最唔捨得離開媽咪咁遠啦, 不過咁,好彩我哋有直接車, 一程就可以返到兩邊的屋企啊...

終於成為MTR人, 唔再去邊都要坐長程的巴士, 亦都唔駛再咁浪費啲等車時間.  亦都好開心, 以後約朋友仔食飯, 只需要大約半個鐘左右就返到屋企.  唔駛再眼紅某啲朋友, 次次同佢哋食完飯, 我仲係啱啱上車, 佢哋就返到屋企, 到我返到天水圍屋企, 人哋就準備瞓覺了. ><

亦都好興奮可以去APM呀, 德福呀, MAXGA BOX呀, 旺角呀, 尖咀呀, SOGO呀等等這些地方, 以後可以去完街街都可以半個鐘就返到屋企了.   ^o^

 

當然住新界區都有好多優點, 起碼人少啲, 空氣都清新啲, 呢個係真的.

不過我自己總覺得新界區適宜啲退休人士呀, 或者有車出入呀, 咁就會正到爆.

但係我哋呢啲無車, 又要日日返工的人, 真係好辛苦嫁, 未返工, 就巳經比個車程攞咗半條命啦, 就算有位坐,其實真係好攰囉.  我真係唔想再咁了. 

最重要係車資的問題,  住咁遠, 啲車費呢頭增值, 無幾多次, 就巳經用哂了. 而家車錢真係慳咗一半呀. 慳咗嚟夠我蕭C奶買一餐餸啦.

加上購物, 真係無市區咁多種類及選擇.  而且係新界區,其實買嘢仲貴過市區呀.