羅漢果水的新聞

之前蕭c奶介紹過羅漢果水

今日見到blog友的這樣一篇報導

copy了過來

其實每樣嘢都係要適量

若果發現飲咗有不妥, 就要停了

又或者真係問清楚你的中醫師

而我...係睇過另一個版本

都好長的, 係話可以幫助到有糖尿病的人

所以我自己就一心係煲比我奶奶及老爺的

如果令到大家唔舒服,

在此向大家say sorry呀, 我都唔知嫁.

 

 

 

最近好多人都會煲來飲，我諗大家要聽下不同的意見啊！

appledaily.com

羅漢果煲水

2010年05月14日

一位老友突然打電話嚟，批評某人推介日日飲羅漢果煲水。左丁山聽到摸不着頭腦，因為根本不知誰人推介羅漢果煲水，而且羅漢果煲水有清熱作用，自己就曾經飲過十幾劑清熱羅漢果沖劑，消除咗熱咳與喉痛，做乜要鬧？

老友大喝一聲：「你有冇中藥常識，淨飲羅漢果煲水，與羅漢果沖劑係唔同 o架。我就有一位女性朋友相信某人之言，日日飲，卒之在中環昏倒街頭，送院救治，我幾乎嚇死咗。羅漢果性質寒涼，唔係個個人可以長期飲用，女士尤其小心，常吃就要請教中醫，千祈唔好迷信名人名氣，人講你又信。」

俾佢一鬧，搵番盒「清熱羅漢果沖劑」（潤喉止咳配方）睇清楚，原來係按照中國 衞生部藥品標準，中藥成方配劑製成，內含羅漢果、枇杷葉、白前、桔梗、百部、桑白皮等中藥，並非獨沽一味羅漢果。中藥講究藥物互補，以得中和，以免產生副作用，羅漢果不是不好，但單單飲羅漢果煲水，會產生甚麼效果，確實要請教中醫師至得。譬如好多人話飲苦瓜乾煲水，可清血糖，防止糖尿，一位男士飲咗好耐，感覺良好，介紹畀一位女士飲，女士飲咗五日，就話頭暈企唔穩，唔敢再飲，以此類推，某人飲羅漢果煲水話好掂嘅話，你飲就未必掂！難怪老友打電話嚟警告，收線時仲講多一句：「拜託你寫清楚，以免再有人偏飲羅漢果煲水，因而出事。」

呢位老友相信中醫已久，曾用名醫配方，搵著名藥材行配藥，再製成膏丸，送贈親友，作補養之用，故此佢痛言齋飲羅漢果煲水之副作用，並非無的放矢。此外，據已故名醫江一葦醫師之《食療保健集》所講：「羅漢果多食令人脹悶，因含糖重，可致中滿」也，羅漢果嘅含糖量有幾多？據講羅漢果嘅甜度係蔗糖嘅 300倍，直情可以做代糖，作糖尿病輔導藥之用。不過咁，有甚麼疾病要吃羅漢果藥之前，最好都係問吓中醫師，先至穩陣。