原定計劃

蕭C奶一直都無諗住買樓

亦都好開心可以抽到一個

地點，方向，環境，方便的‘正’公屋

最近因為房協推出‘夾屋’-將軍澳的叠翠軒

一推出，好吸引喎

好似好平，好似環境好美化，又鄰近地鐵站

130萬就可以上車

300萬唔駛就可以有800幾尺

平過隔離的新都城50至100萬喎

係人云亦云之下

蕭C奶及少爺都覺得好正

好想買呀！

 

後來經過多日的深層考慮

跟雙方的屋企人商量

倆公婆又一齊商量之下

都係決定唔買夾屋了

因為好多朋友都話好多問題

加上我哋間公屋真係太正了

唔係舊公屋， 係剛興建的新公屋

加上交千二蚊，咩都唔駛煩

可以輕鬆啲

而且真係無諗住而家買樓

 

而且諗諗吓，如果要買中層或以上

都要180萬喎，兩房兩廳

如果想要三房兩廳，全部都過200萬

你話好平咩， 諗深一層都唔係話好平

夾屋仲要一定最少住五年，然後補地價

先可以租讓

咁你可能會講， 居屋都係要補地價

無錯都一樣

只要係諗住自住， 其實又真係無所謂

 

最主要係個地點： 將軍澳

我同少爺本身覺得將軍澳的配套及環境都做得唔錯

不過唔知點解， 就對呢個地方無咩興趣

如果用藍田及將軍澳比較

我同少爺個人認為藍田吸引好多

真係好方便， 咩都有， 我哋就覺得好過將軍澳

不過咁， 只係純為個人意見咋

都好老土一句， 住到邊， 自然就會適應。

 

因為我自己諗深一層

若果我真係攞180萬至200萬買一層樓

講真。。人生有幾多個180萬呀？？

我蕭C奶就好坦白的

老實講 ， 自己唔係有錢人， 亦都無咩學識，

唔係搵好多人工的人。

係我人生入面，可能我只會擁有一層樓啫

咁我就係到諗，與其要攞咁大數目

點解唔買一層自己鐘意的地點的樓呢！

加上有朋友識入面的建築師

原來叠翠軒除咗漏水問題， 仲有好多問題

所以朋友仔一知我想抽

即刻SAY NO

咁又係喎， 180萬，仲要係有咁多問題的樓

要放番出去又咁難, 咁煩,

係咪值得買呢？？？

最後分析都係覺得唔多值了。

 

 

再再諗清楚

點解啲人話好平，好抵買

因為有啲人又無資格抽公屋

又可能無首期係手， 加上而家樓市又咁高

啲人就買唔起私樓

咁而家抽居屋或者夾屋

除咗樓價平啲，首期又唔駛比三成咁多

咁啲人就可以上到樓

我自己分析，自己有好多朋友恨都恨唔到

我同少爺可以抽到公屋

因為平， 靚 ，正

雖然係細啲， 但不至於細得好誇張

又係好老土咁講

出面的私人樓, 有啲話係400幾尺

買成200幾萬, 實質個實用面積

咪又係得200幾尺, 但係要成200萬喎

而且我同少爺諗深啲

真係好鐘意而家抽到的公屋

因為各方面都好平均啊

真係除咗細， 但係我都好多謝朋友的支持

細的地方， 都可以裝修得好骨緻

而且咁平宜的租金

咁我哋可以慳番啲錢

寧願可以享受多啲啲

唔駛話買嘢, 去玩要慳住慳住

所以話呢....買樓呢家嘢

都係遲吓先算啦

儲多啲錢, 到時真係覺得OK, 咪買囉,

再唔係諗過唔想咁辛苦揹層私樓

又想住大啲, 咪轉二手居屋市場囉

咁長遠的嘢, 都唔好諗咁多

遲吓先算啦.

雖然有時一見到人有自己的屋

都好羨慕, 妤羨慕咁大, 好羨慕有自己的家

但係背後我都知係要付出

有得必有失!

 

少爺就曾經問我: 你想有自己的大屋? 定係想享受人生?

我心裡掙扎, 便答: 希望有自己的一間小屋及可以享受人生,

兩者都希望擁有啊.

但若兩者要選其一,

我不需要豪宅, 一個小屋都可以了. 總之唔係瞓街就得了.

然後我希望可以同少爺每年都出外旅行, 享受餘下的人生.

唔想有壓力, 有太重的負擔.