2008年11月29日(星期六)
噢! 今日要返工, 都好的, 如果無人嚟counter,
咁我就可以做自己嘢lu..
所以今日可以好好咁update有關媽咪的情況,
唔駛各位朋友仔擔心.
放工約咗奶奶係新墟街市到買打邊爐材料,
買完嘢之後, 就入天水圍lu....
2008年11月30日(星期日)
今日當然係同阿榮老公好好咁訓一覺啦,
呢個係我哋的指定放假動作,
訓到十二點左右, 起身嚟做好少少家務,
阿榮因為早過我起身, 佢又再訓過,
阿榮老公真係好鬼好訓,
我都好想好似佢咁呀...
今晚我同阿榮當然係打邊爐啦,
每次打邊爐一定會食淨嘢的,
所以我哋又開爐了...
給各位好友,
很想在這裡向大家說: 多謝你們的支持,鼓勵!
很想向邀請我飲宴的朋友們, 說聲對不起, 因為我不能夠出席你們的婚宴. 感謝你們的體諒, 明白, 包容.
尤其是好友GIGI的婚宴, 臨時做不到你的SISTER, 希望沒有帶給你太多的不便,真的很想見証你最重要的時刻, 記得我向你說過, 若果我到時真的可以出席,我一定會盡量出席的, 請記著預留最佳坐位給我啊!
在這段日子, 要你們擔心, 有的為我找資料, 有的為我飲食問題, 而買了一些簡便而有足夠營養的食品給我. 有的為我哭泣, 有的為了我而可能暫時不可放假的同事, 或者增加了他們的工作量, 有的為我經濟方面擔心, 有的為我身體擔心, 有的為我情緒擔憂, 在這裡的而且確真的非常感謝大家. 要大家為我而擔心, 我實在很不安心, 但我感受到你們對我的愛.
真的再三感謝大家對我和我的家人關懷, 愛心, 包容, 體諒, 幫忙,安慰, 細心! 老實說: 真的沒有你們在身邊或背後支持. 我也不知可以撑得住麼!
其實要多謝的朋友, 家人, 同事, blog友實在太多了, 我不會一一在這裡講名字了, 但我相信你們明白的.
還想感謝的是我阿姨及姨丈, 要你們擔心, 真不好啊...
最重要感謝的是....一直都在我身邊的阿榮老公, 我知你很擔心我, 幸好有你在, 有很多的事情我都好放心. 我知你不喜歡我向你道謝的. 但是...我真的心存感激, 我知無論發生任何事, 你都會在我身邊, 照顧我, 為我分憂. 所以我甚麼都不怕.
謝謝大家!
**特別感謝, 叻叻的朋友, 因為我們只見過一次面, 當叻叻告訴你有關我的事, 你沒有因為與我不熟落, 反而送來兩本有關癌症的書本給我和家人, 真的非常感謝你啊!
2008年11月28日(星期五)
由於下星期媽咪要開始做化療,所以媽咪趁有呢幾日, 佢就立刻返上大陸, 因為我知媽咪好想見阿婆, 而且媽咪都知之後有排都返唔到去住. 咁我都好明白一個做女的感受.
都好的,等佢做化療前見咗阿婆, 咁佢都放心啲, 咁下個星期就可以專心同啲癌細胞對抗.
今日LUNCH, ADAM同叻叻好好, 約我去食飯,其實我都真係好耐無同啲同事或者朋友仔見面及食飯, 我都知大家好關心我. 今日ADAM請客, 請咗我哋兩位靚女去食蛇呀...食完超暖胃呀. 而且仲飽到死呀...攪到我哋兩個成個下午都好想訓呀. 哈!
放咗工, 專登去荃灣到接阿榮老公放工, 一齊坐巴士返去老爺同奶奶到食飯LU.....
雖然佢哋無專登問我媽咪的嘢, 不過我睇得出佢哋好緊張我哋, 同好關心我哋, 成日都叫我哋小心啲呀, 好好保重身體, 唔好凍親呀...
跟住知奶奶明天放假喎, 我就叫咗佢哋入嚟天水圍到打邊爐, 因為天氣凍咗, 我最鐘意打邊爐嫁啦..而且因為我哋前排買咗樣新產品, 好想試用呀.....係咩嚟....明天用咗, 下期告知大家, OK.
天氣涼了, 請大家保重呀!
2008年11月27日（星期四）
今日約咗2點鐘到屯門醫院的腫瘤科醫生，回覆用新藥定舊藥。
今日我無出席，只有阿榮老公及哥哥陪媽咪返去。因為只係答用藥問題及睇吓佢哋幾時安排開始做化療. 咁阿榮老公話唔駛我去喎, 佢陪媽咪去就得了.
但係根據阿榮老公的報告, 指屯門醫院係藥的方面, 同張醫生的有少少分別, 所以阿榮老打算呢幾日要搵到張醫生, 想問清楚啲.
今日屯門醫院就替媽咪做咗心電圖,量血壓及驗血,要再到下星期二回去看報告.若果一切的報告結果都OK, 最快下星期三或四就可以安排做第一次的化療.
係量血壓方面,因為始終都係偏高,醫生寫咗封轉介信比媽咪, 叫佢一定要看普通科或出去睇私家醫生, 要攪好個血壓問題. 所以睇完屯門醫院後, 媽咪就去咗睇私家醫生----胡醫生. 胡醫生就問咗啲血壓藥比媽咪, 不過胡醫生都話, 唔係食一,兩粒就降到啲血壓, 都要食成十粒八粒先有效.
今日心情仲好呀, 連我老細都話, 比起前排,一睇就知我個擔心樣, 今日佢知我媽咪的情況, 無癌細胞擴散, 佢都好替我放心. 而且佢話我今日講嘢都多咗,笑容都多咗.
梗係啦,我最擔心的事都出咗好結果, 我真係成個人鬆哂,安心好多. 呢幾日我啦, 媽咪及家人都可以輕鬆幾日, 到時媽咪做化療, 又係另一件令到我哋擔心的事, 但係唔諗住了, 到時再算啦.
只係想趁呢幾日, 等媽咪輕鬆吓, 等佢心情開朗啲啦.
由於今日佢哋都好早就可以走得,所以阿榮老公就番去媽咪到攞咗啲湯水及少少餸, 可以早啲番入天水圍. 阿榮老公好好呀, 洗好菜, 仲拖埋地添, (不過係拖咗成個幾鐘囉, 所以水費係佢交的係無錯..)
我見橫掂好多嘢都安排好, 心情又好咗, 我怕下個星期無咩時間番去見奶奶同老爺, 又怕佢哋擔心我. 所以決定明晚回老爺到吃飯, 等佢哋見到我, 咁佢哋個心都會安心啲, 而且我都真係想番去見吓佢哋呢.
2008年11月26日（星期三）
琴日照完p.e.t. scan，今日需要返去張醫生到睇報告。當然我琴晚巳知結果係好的。 但我都未講比媽咪知，唔知呢。。。或者我想由張醫生把口講出，媽咪的心會更加安定吧！
約咗下午三點半，當我放咗工後，去過銀行，等阿榮老公來接我一起吃個LUNCH，才去車站接媽咪。其實我哋都三點多上到張醫生的診所，入到去，巳經有好多人坐响到等了，以為最多等一個鐘左右啦。。。點知， 我哋三個人由三點半坐到。。。係六點半先見到張醫生。但都無辦法啦，眼見啲姑娘同張醫生跟本都未停過手，未休息過。而且我都明白，嚟得睇張醫生的，都係關於乳腺有問題的，我諗每位病人及其家屬都會好想問清楚呢方面的事。
終於都見到張醫生，張醫生同媽咪講， 唔駛驚，報告的結果係‘無癌細胞擴散’，媽咪聽到個安心樣都出哂嚟。 然後，張醫生問我哋星期一去屯門醫院到開會講咗啲咩。 咁我哋咪話比張醫生聽，佢哋問我哋用新藥定舊藥。 咁我哋今日嚟見你， 就係想問吓張醫生你的意見。
張醫生就唔建議用新藥，因為新藥要打多兩針，除咗要多收兩次錢外，由於多兩針，時間又拖遲咗，所以唔建議用。咁我哋問佢舊藥OK嗎， 咁張醫生就話OK的，叫我哋放心。 但打到第三針呢，就要番一番嚟覆診，張醫生話要睇吓個腫瘤的反應程度，如果有縮細，就繼續打，但若果無反應，就要安排替媽咪做手術。
我哋問清楚好多問題後，就返屋企LU。。。。。
今晚就真係好似夜咗了，返到屋企都成差不多八點，在媽咪定吃過晚飯後，又要起程回天水圍LU。。。。今日就真係攰咗啲， 好了， 要休息LU。。。
明天又要回屯門醫院。。。。
媽咪，放心啦， 最重要的擴散問題，都攪掂咗，你要好好養好身子，因為嚟緊你要準備打仗了，而家咩都唔好諗，我哋會係你身邊支持你。加油啊！
2008年11月25日(星期二)
今日約2pm去養和醫院到替媽咪做p.e.t. scan, 照清楚有無癌細胞擴散. 呢一樣亦係我哋最擔心的嘢...因為萬一唔好彩, 癌細胞擴散咗...我諗我會受唔到呢樣的打擊, 我諗我媽咪都係.
今日去到p.e.t. scan的部門, 係counter到有三位counter staff, 當我登記時, 坐中間個位小姐, 係咁望住我, 我咪又望吓佢囉. 跟住counter位小姐要收錢, 咁我諗住碌咭的, 點知佢話碌唔到喎, 咁我心諗, 係喎, 呢張係附屬咭, 唔通唔夠額? 咁無法啦, 我咪同位小姐講, 咁算啦, 我碌EPS啦, (不過其實我自己都唔知有無咁多錢...), 哈. 點知佢話呢到收唔到EPS, 如果要交EPS要落番去地下到交喎...咁我等媽咪入咗去, 我先慢慢去交都未遲. 因為做p.e.t. scan係要兩個至三個鐘的時間. 而且家人係唔可以入去的.
待媽咪跟姑娘入咗去後, 我咪立刻落地下, 打比阿榮老公, 叫佢跟一跟附屬咭點解碌唔到.
老公跟咗後, 無問題又加大咗額, 方便我呢排為媽咪的嘢而用, 攪掂咗, 我咪又上番去p.e.t. scan到交錢囉, 點知個位小姐唔知係咪有啲誤會定攪錯啦, 佢同我講, 呢到交唔到呀, 要去落番去地下, 我哋截咗數了. 咁我咪又去番地下囉. 見到個A counter, 我話要交p.e.t. scan的費用, 咁呢位小姐就話, 唔好意思呀, 要去B counter到交呀. 咁我咪又走去B counter到交囉. 去到B counter, 點知呢位小姐呢, 問我攞單, 我話, 單, 咩單呀, 佢哋無比我喎. 咁佢話無單我唔可以收你錢喎. 咁呢位小姐就立刻打去p.e.t. scan到問清楚, 總之攪咗一陣, 都係要我去番p.e.t. scan到交錢啦. 可能當中有啲誤會, 咁唔緊要啦, 我咪又上番去囉.
真係天註定...去到p.e.t. scan, 唔見咗兩位小姐, 淨係得番頭先係咁望住我的小姐, 咁呢位小姐就問我,
你係咪姓陳嫁? 咁我話係.
咁你係咪叫jobe呀? 咁我話係呀.
跟住佢話我係: 阿珊呀.
原來佢真係阿榮老公的堂妹.
咁跟住佢咪問我係咪我媽咪有事, 傾咗一陣, 佢了解咗我媽咪的事後, 咁我就同佢講, 頭先你同事話張咭碌唔到, 不如你試吓而家得唔得啦.
跟住阿珊好好, 佢話不如我入去問醫生, 可唔可以收少啲. 咁我話, 好呀, 唔該你呀. 咁佢都又講, 唔知得唔得嫁.
過咗一陣, 阿珊出嚟搵我, 比張單我睇, 我一睇下.....
係收少咗五千元....足足收少咗三分之一呀. 阿珊好好, 好客氣咁講, 我而家只可以幫到你咁多炸..但我同佢講, 真係好多謝您, 巳經幫到我好多.
佢仲話如果有咩需要,打比佢, 如果佢可以幫到我的會盡量幫我. 真係好多謝阿珊呀...
諗走時, 我仲請咗阿珊, 如果今日知道咗結果, 如果係唔好的, 我請佢今晚打過電話比我, 我唔想比我媽咪知. 到咗佢放工, 佢真係好好, 打咗嚟, 叫我放心, 因為報告出咗, 啲癌細胞無擴散....聽到之後, 我真係個心比前更加定更加安心. 太好了, 無擴散到, 咁媽咪就可以有救了.
** 有時真係天註定, 係呢個過程, 大家諗吓, 我足足想交錢交咗好多次, 都收唔到我的錢, 最後要到見到阿珊先收到. 如果第一次就佢同事就碌到張咭, 咁我就無得少五千元了.
其二, 到咗最後我番上去p.e.t. scan, 又註定得番阿珊一個人, 咁先可以相認到.
今日真係個心情好好, 因為出門遇貴人. 而且媽咪因為知道收少咗咁多錢, 佢個心都安落咗, 好開心. 我仲叫媽咪更加唔駛諗錢的問題.
總之, 我哋有好的開始, 希望之後的嘢, 都可以一一順順利利.
2008年11月24日(星期一)
今日真係超激死我哋呀, 話就話約下午兩點半見腫瘤科醫生開會, 好啦, 我, 媽咪, 阿哥及阿榮老公, 大家都兩點多就到了.
但係我哋足足等到三點多就先見一位臨床心理醫生, 見呢個醫生的作用係, 等醫生睇睇個病人及家人係得到呢個消息後, 係心理上有無一啲問題.
見完之後, 都只不過係三點半多啲啲, 跟住又再等, 等等, 一等...就等到成四點半先有得見醫生. 啲時間就係咁用嚟等....
好啦, 入到去, 見到幾位醫生, 好似有專業, 但係當佢哋一出聲, 就真係比唔到我哋的信心, 一來啲醫生太年輕, 好似好無經驗. 二來係佢哋講的嘢, 真係無說服力. 我問咗一啲問題, 佢哋係完全係答咗就得於無答, 講咗就等於好似無講. 有時真係係到諗, 都好難怪啲人對政府無信心. 所以我同我的家人都有啲怕.
醫生解釋咗做化療有新藥及舊藥, 新藥仲係試驗當中, 所以我問咗佢哋攞啲藥名, 我想到星期三去見張醫生時, 問問張醫生係有咩分別. 就咁分柝, 我哋應該係會擇舊藥, 因為新藥仲係試驗, 而且好似都唔係太多人用, 所以有啲怕, 我覺得難聽啲講句, 佢哋都係想我哋參加'白老鼠'. 我又點可以咁樣比我的媽咪去冒險呢?
見完都巳經係六點, 番去媽咪到食過飯, 就立刻回家, 因為坐得車返去天水圍, 都成八點幾嫁啦, 好想早點回家, 休息. 好了, 明天要和媽咪做p.e.t. scan的檢查了, 希望一切順利.
2008年11月23日(星期日)
今天真的好好在家休息, 和老公一睡就睡到中午十二點多. 今日心情唔錯, 或者因為接受咗媽咪的事, 而且可能因為見咗張醫生, 又去咗黃大仙求到好簽, 或者係我的情緒上得到輕鬆咗, 心理上好似好啲.
今日媽咪約了朋友去澳門玩, 我希望媽咪好似平時咁, 咩都唔駛理, 一於玩個痛快, 吃過痛快, 我好想媽咪趁而家仲未做化療前, 輕鬆啲, 等個心情輕鬆吓, 因為我知一開始咗個化療, 媽咪到時一定好辛苦, 無得四圍去. 所以好想佢今日放開心情, 唔好亂諗嘢. 我深信我媽咪一定做到的, 有其女必有其母呀嫲....哈哈...
而我呢...今日決定要好好執好間屋呀...因為實在太亂lu. 起咗身, 係日本到買咗兩罐罐頭麵, 係咪好得意呢.....其實可能有好多人都買過. 汽水機我哋香港就見得多, 但係日本呢, 除咗飲品外, 好鬼得意, 粟米湯有, 罐頭麵有, 貪得意咪買咗兩罐囉. 帶番嚟香港, 今日有心情, 一於同老公開嚟試吓先.
不過, 實在太少份量lu..我哋食咗都好似無食. 唔怕....我哋係日本到買咗幾包博多拉麵, 好...一於煮兩個麵嚟食吓先......
嘩.....好好味呀....係到後悔, 點解只買得幾包呀...早知買多啲啦......
我就加咗老爺自己手打錂魚肉, 好好味, 清清哋..咁就係我哋的午餐.
我呢個係博多原味.
阿榮老公呢個係豚肉醬油味
吃過午餐, 開始執屋lu...執吓執吓..阿榮老公又訓咗lu....到咗夜晚, 我就準備咗晚餐.
青椒炒牛肋條及兩碗麥皮
啲牛肋條係訂番嚟嫁, 真係好有肉汁, 而且炒耐咗都唔會韌, 下次要再訂先得.
今日總算執好間屋, 唔駛令我心掛掛....
2008年11月22日(星期六)
這幾天真的很累, 因為睡得不太好, 幸好有老公在身邊陪伴, 人的而且確需要身邊最親密的人支持. 總算到了星期六, 幸好今天未輪到我上班,終於可以好好的睡一覺, 好好休息.
11點多, 電話響起, 接起電話, 原來是同事anita打來, 問候媽咪的情況, 也關心我的身體. 她也認識張醫生, 告訴我原來張醫生在本港是很有名的, 而且養和醫院是有一間手術室專是給張醫生用的, 所以張醫生並不如其他醫生要book期的. 而且anita有朋友都是張醫生替他們做手術, 巳好幾年了. 叫我不用擔心, 這位醫生是很好的. 最重要的是, 她知道我和媽咪的為人, 比較positive, 她都不太擔心, 只說要我好好保重身體, 一定要儲夠精神, 心情盡量輕鬆, 不要以為第三期的癌症就一定比較難醫, 比較麻煩, 一切都要積極,有信心就好了. 我也明白的, 很多謝每次有事, anita的幫忙.
既然醒了, 洗過臉, 打給阿榮老公, 我說想去黃大仙到求簽及求平安符給媽咪, 就約好阿榮老公在黃大仙等....
一向都有睇開陳生的, 求好簽後, 心裡當然也很擔心, 幸好, 這是好簽, 說媽咪會平安大吉, 會回到家, 還會請朋友回來慶祝一番. 陳生解簽時, 不禁也哭了起來, 陳生說, 不要怕, 黃大仙都說媽咪會平安大吉, 叫我不要這麼擔心. 我哭就是因為聽到陳生說媽咪可以平安大吉, 可能心裡的不安情緒立即可以得到鬆一口氣, 我才哭了出來吧!
求到好簽及有平安符, 很想立刻交給媽咪, 於是決定今晚回媽咪家吃飯, 而且還想多點見見媽咪, 我想媽咪也是很想常見到我吧!
回到家, 立即告訴媽咪好消息, 求得好簽, 會平安大吉, 把平安符交給媽咪, 提醒媽咪好好袋在身邊, 一定會好的, 不要擔心. 媽咪當然眼濕濕, 但她也很堅強, 有信心. 看到她這樣我也放心了.
今天總算比前幾天好過, 心情也沒有這麼緊張, 不安, 也沒有前幾天這麼容易想哭了.
好了, 明天媽咪約了朋友去澳門旅行, 希望可以令她輕鬆吓, 不會太多時間亂想東亂西吧!
2008年11月21日(星期五)
今天終於見到張醫生了, 她替媽咪檢查及用超聲波檢查後, 說媽咪的腫瘤比較大, 她也是建議先做化療後再做手術. 張醫生真的很有經驗, 她說要立刻替我媽咪做一種叫做'p.e.t scan' 的檢查, 這是非常重要的, 因為是用作看看那些癌細胞有沒有擴散到去其他地方. 張醫生很想媽咪明天就立即做這項檢查, 但可惜, 真的沒有期, 最快都要星期二, 25號, 所以就約好了25號, 但姑娘說巳通知養和醫院, 若有人臨時取消, 立刻通知我們, 好讓我們可以再早些做這項檢查.
張醫生的說法, 其實與博愛醫院的袁醫生及曾姑娘的都是一樣. 所以張醫生建議做化療可以在政府做, 因為若在私家做, 真的的貴. 而且做化療的, 私家同政府的是一樣的. 我們要考慮的是當要做手術這部份, 擇政府的, 還是私家. 其實我昨晚與哥哥及老公商量, 我們其實九成九都選私家的, 而且現在這位張醫生, 原來是本港最top的一位乳癌醫生. 所以我很信任這位醫生.
而且, 當見完張醫生時, 我問媽咪: 你唔好理錢這方面, 你琴日見咗博愛的醫生, 今日見到呢位張醫, 咁你心裡信任邊位. 咁媽咪好老實的說: 我而家見完張醫生, 我個 心真係定咗好多, 安心咗好多. 咁我就同媽咪講: 咁就得了, 最緊要係你信邊個, 呢個係一個好重要的要點, 至於錢的方面, 你唔好諗咁多, 我哋會攪得掂, 唔好因為錢而擔心. 錢可以搵到番嚟, 但係阿媽只得一個. 媽咪聽到我咁講, 佢個心都安落咗好多, 而且我知佢知我有信心, 咁堅定, 我比佢好大的信心. 咁佢都輕鬆咗啲. 我個心都安落咗好多, 我自己都定咗好多.
一切又要到星期三睇'p.e.t scan'的報告, 其實我是很害怕, 心裡很擔心, 不安, 但是我也知道我真的是擔心不到, 有些事我真的擔心不來. 我真的很害怕那些癌細胞擴散, 我真的很怕, 這是我現正最擔心的事. 這幾天相當難捱, 每一天都很難捱. 但又如何.....
我知道很多朋友都很關心媽咪的情況, 有時想打來問我, 但又不想打擾我, 而另到大家都常記掛著, 真的不好意思, 也很坦白說, 我也沒有這麼多時間, 或者逐一逐一的打給你們, 把同樣的說話, 說幾十次. 所以我會透過blog來講一些我們正在做的事, 好讓你們也不用常常擔心.
2008年11月20日(星期四)
今日一大清早,陪伴媽咪去博愛醫院看針活細胞報告, 當未到今日的時候, 心情很不安, 腦海總想著, 如果是良性的, 當然會好些. 但若果是惡性的, 我應該如何面對呢? 想這想那, 但心裡想, 求上天不要這麼殘忍吧! 求上天不要把這些帶給我的母親吧! 自己也作好最懷的準備, 同自己說: 無論明天結果是好是壞, 一定不要在媽咪面前喊, 知道麼, 我是這樣的對自己說. 只可惜, 當袁醫生說出媽咪証實是患了乳癌時, 是惡性腫瘤時. 媽咪不禁落淚, 我的心非常難過, 傷心, 我也強忍著淚水, 只管不段的問醫生我們現在有什麼可以做. 因為我知道我唔可以喊, 我要堅強, 若果我只管喊, 那我媽咪又如何呢?
醫生逐一逐一的告訴我和媽咪, 由於腫瘤比較大, 所以經過他們商量後, 要媽咪先做化療, 做化療的作用是, 利用化療將腫瘤縮細, 才可以做切割手術, 這是對媽咪最好的方法. 而且袁醫生也告訴我們, 約了屯門醫院腫瘤科的醫生, 於下星期一下午要與媽咪及家人一同開會, 到時腫瘤科醫生會再進一步解釋有關化療藥物的事給我們知.
當清楚知道後, 醫生交由另一位護士長, 曾姑娘給我們再作進一步的了解有關媽咪的情況. 曾姑娘很詳細的解釋了乳癌的問題給我們知後, 因為我想要有關媽咪的所有報告, 因為我急需要找另一位私家醫生的意見.
當然, 對於要向政府立即取報告, 除了要付錢外, 還要時間, 但是當我去到所謂的醫療報告組申請時, 他說要40天, 我心想, '有冇攪錯呀, 40日, 可能人都唔係到啦'. 但因自己都是打政府工, 我也沒有難為那位同事, 我只是請他替我做urgent.
回到家, 我待媽咪休息, 我便立即找細老細鄧小姐, 因為她說, 若有任何需要, 想要一位這方面的私家醫生, 她說她有資料. 當我得到醫生的資料後, 我便立即預約, 幸好的是, 張醫生可以給我明天下午帶媽咪應診.
一切的事又要到明天才可以安排.
今天真的很難過, 當聽到醫生說媽咪証實是乳癌, 心裡很不好受, 在外等曾姑娘的時候, 我不禁哭了出來, 這樣一哭, 令到在旁的媽咪也哭了起來. 有時真的很恨自己, 為甚麼這麼容易哭呢? 我知我一哭, 會令媽咪心裡更難過, 更害怕. 在離開醫院時, 沿途和媽咪行的時候, 我用手答在媽咪的肩膀, 強忍眼淚, 告訴她, 我有多需要她, 所以無論發生任何事, 面對甚麼, 我都會陪著她, 好讓她心裡安定些, 不要害怕. 我知道我是媽咪的支柱, 我一定唔可以有事, 我可以做的, 只有好好保重身體.
癌症....這兩個字對於我來說,
常在報章雜誌看到,
常在電視電台聽到,
也常在別人身上看到.
雖然常看到, 常聽到,
但對於這個名, 我還是一直都很陌生, 很不了解,
但原來一直很陌生的, 對於現在的我,
要開始了解它, 接近它, 面對它,
真的...從來沒有想過會與'它'有這麼近的接觸, 真的沒有想過.
但事實的是, 我必須要了解, 接觸, 面對'它'.
一聽見這個'它', 心裡真的很焦慮, 疑問, 不安, 害怕, 百感交集.....
中國有云: 針唔咭到肉係唔知痛.
我想現在我就是這樣吧....
我很怕別人問我: 為什麼會這樣的?
我真的很不喜歡別人這麼問我.
算我得罪及坦白說: 若果我真的知道為什麼,
我就不會這麼煩惱吧!
更何況的是, 要我怎樣去答你這個'為什麼'的問題呢?
請不要再問我'為什麼會這樣的?', 好嗎?
我真的很討厭這麼問我....真的求你們不要再這樣問.
因為跟本沒有原因, 沒有答案的.
你們可以問我, 最新的情況, 最好的方法,
說一些比較正面的說法, 想法, 方法, 還好.
我想這是我現正最需要的力量.
真的很感謝, 身邊的所有朋友,
你們的關心, 體諒, 細心, 包容, 開解, 安慰等等
對於我來說, 真的給予我和我的家人很多力量去支持下去.
幸好的是, 我和我的家人做事都是較正面, 較積極的,
我也相信有你們的支持, 鼓勵,
再加上我和家人共同努力, 加油, 積極地去面對,
我深信我最愛的媽媽一定會打勝仗的.
媽咪...有這麼多人在背後支持你和我...請信我這個囡囡,
我一定會好好保護妳, 照顧妳, 陪你渡過這個關口.
當中的路, 無論有多難捱, 多苦, 我和你都一定可以安然渡過的.
我相信每一樣事情, 只要有愛, 盡管有多難多苦,
一定可以衝破所有障礙.
媽咪....有我在, 不用驚.
今日心情不好, 心裡很多疑問, 很多擔憂,
前天剛回來的第一個早上,
收到哥哥打來的電話, 說有事要告訴, 非常嚴重,
不幸的消息....終於都發生在我的家.
從來沒想過的事.....終於都發生在我的家.
當知道這個消息後...我心裡有問過一吓蒼天,
為甚麼要發生在我家, 為甚麼要發生在我的至親身上.
但當冷靜過後...我知道不應該問為甚麼,
我知道有很多事情要發生的, 怎樣擋都擋不住,
不如好好冷靜地處理在你面前的事吧!
心....難過.
心....痛.
心.....攰
心.....不知所措.
心.....充滿擔心.
心.....充滿疑問
心.....害怕失去至親的人
一切一切的不安, 即時湧上心頭,
但我清楚知道, 我更加要好好保重,
要堅持, 頂住.
我清楚知道, 我還有更多的事情要我處理,
要作決定.
還好的是, 身邊有老公在, 有好朋友在,
當心裡情緒不安, 只要有他們在身邊支持我, 開解我,
我知道我一定可以渡過難關, 一切的事都可以好好解決吧!
各位朋友仔...
哈哈...呢幾日唔可以update個blog 了,
而且仲唔可以去你哋到參觀了.
因為我同老公要出發去日本了.
11月13日至17日在日本,
我哋遲啲見啦....
返嚟再同你哋分享我哋的日本九州之旅.
遲啲見.....
2008年11月9日(星期日)
嘩...超好訓呀, 今日訓到10點起身,
老公仲繼續訓, 見佢訓得咁冧,
唔敢叫醒佢, 想佢好好咁訓吓, 休息吓,
其實我好鬼鐘意睇見阿榮老公訓覺個樣嫁,
因為平時呢個男人好鬼man,
但係訓覺個樣呢...成個bb咁, 好鬼可愛...
起咗身, 寫吓blog先, 然後check吓日本的天氣,
因為今日的目標係要拾少少行李了,
因為星期四就要出發了.
寫吓blog, 寫寫吓開始有啲肚餓添,
咁咪開始整個lunch了, 洗好哂, 準備哂,
阿榮老公就起身, 終於可以煮lunch了,
簡簡單單, 煮咗個
蒜蓉炒翠玉瓜及豉椒炒豬腸
食完飯, 諗住開始拾行李, 阿榮老公就去洗碗啦,
但係拾咗都無幾多嘢, 周公又開始急call,
好眼訓呀....心諗.唔係呀話, 咁快又想訓,
琴日巳經訓咗啦, 而家又想訓,
但真係無辦法了, 我真係要去訓一陣先,
老公入嚟睇報紙,陪我啦,,,哈哈. ..
陪陪吓, 連佢都訓埋, 就係咁, 我哋兩個
一訓就訓到晚上六點半了,
原本諗好咗今晚煮嘢食, 但係我呢個老婆仔呢,
好懶呀, 唔想煮, 我話不如買mc donald啦,
就係咁老公就落咗去買lu...
食完嘢, 今次真係要認真啲拾嘢了
唔係的話, 真係拾唔切了.
終於拾咗啲好了, 有啲一定要早一晚先可以拾.
嘩.....好興奮呀, 返多三日就去日本
勁玩, 勁食, 勁享受..yeah....
2008年11月8日(星期六)
最近實在太忙了, 之前都講過,呢個星期日日都約咗朋友,攪到我都未煮過飯,就連老爺及媽咪買咗的菜,我都係要留到星期六及日先可以煮囉..終於都到咗星期六, 今日好好訓呀,因為連續四日放咗工都去咗街街,所以超級攰,超級想訓覺囉.不過我都只不過係訓到12點啫,然後快快咁做家務, 整定個lunch等老公返嚟.
今日食咩呢...
炸菜蒸牛肉及兩碗麥皮
清清哋....唔駛食得咁飽囉...一路食一路睇'鬼嫁日記', 真係好鬼鐘意睇呢套日劇, 因為有好多情節都好似我哋倆公婆, 好攪笑的, 當然我就無劇中的女主角咁兇啦, 都無咁樣對老公的...
睇完鬼嫁...兩個又開始眼訓,.....真係倆隻懶訓豬囉...
跟住我哋當然係又訓啦...哈哈...
我就訓到晚上7點起身, 沖個涼, 又開始整定晚餐lu...
到咗8點左右啦....老公起身, 終於可以開飯了...
金銀蛋浸皇帝菜
冬菜蒸鯇魚
食譜
金銀蛋浸皇帝菜
材料：
蒜頭 兩至三瓣
薑 兩片
皇帝菜
清雞湯
皮蛋 1個
熟鹹蛋 1個
做法：
1）金銀蛋切粒備用。
2）蒜頭去皮，用溫油泡至金黃色。
3）下皇帝菜兜炒一會，下清雞湯、金銀蛋粒，蓋上鑊蓋煮3分鐘即成。
