蒜茸粉絲蒸蝦

又來LC無水蒸煮意....
一直也想試煮這個蒜茸粉絲蒸蝦
昨晚媽咪來吃飯, 就事先請媽咪幫我買定啲中蝦先
媽咪代買代洗代切代準備
我一回到家, 只需要煮...哈哈...(有媽咪實在太好, 好想住近媽咪一點啊!)




媽咪昨天買了十隻中蝦
媽咪找不到新鮮蝦, 唯有買了海鮮檔的冰鮮蝦
這一碟蝦, 都只買了75元
若出街吃...OH....又要花你百多元呢...
又是那句, 在家吃海鮮最平宜!



原本我打算把蝦只在中間切開不切斷
可是...可是...媽咪太快手了..
我回到家, 媽咪剛好把蝦切斷了一半...(@@)
不過當時我無出聲, 因為媽咪都係諗住幫輕我啫...哈哈...
加上自己又無一早同媽咪講我想點切.   
無所請啦, 最多無咁靚仔啫...味道一樣係...頂瓜瓜!!

********************************************************

看看我的做法吧....

材料:

新鮮 / 冰鮮中蝦                   10隻
粉絲                                         1包 (大包小包也可以)
蔥花                                       適量

蒜茸醬:

蒜茸                           可以準備多一點                           
薑茸                           半湯匙左右  
辣椒                             1隻    (切碎)       
豉油                             適量
糖                                 少許
鹽                                 少許
胡椒粉                         少許
麻油                             適量
油                                 1-2湯匙

(以上醬料, 自行調配啊...自行試一試味.)

準備蒜茸醬:
先把一半的蒜茸及薑茸, 在小鍋中加入油爆香, 盛起再加入餘下的所有蒜茸醬材料及調味料, 拌勻, 備用.




做法:

(1)  中蝦洗淨, 剪去蝦鬚及頭的尖的部份及蝦腳, 切開兩邊備用.

(2)  粉絲用水浸軟, 用凍開水過一過冷河, 備用.

(3)  準備一隻碟 / LC BUFFET 鍋, 把粉絲鋪在鍋底上, 然後加入少許蒜茸醬拌勻.

(4)  然後把中蝦平均鋪在粉絲上, 再平均的把蒜茸醬鋪在蝦上, 最後灑上蔥花.

(5)  LC BUFFET 鍋, 開中小火, 三分鐘, 再轉小火四分鐘, 熄火焗三分鐘, 完成.

(6) 上碟前我自行再放了卷型的蔥花在中間, 上碟. ^^


REMARKS:

**  粉絲用凍水浸軟, 盡量不要用熱水啊.  因為用熱水浸, 巳經把粉絲浸到熟咗少少, 再去蒸, 就會好淋身, 而且用熱水浸, 粉絲巳經吸飽了水份, 會令到粉絲吸收不到蒜茸汁.

**   蝦買回來, 若未到煮的時候, 請先放雪櫃保持新鮮, 煮前才清洗及劏啊, 才可以KEEP住鮮味.

**  若沒有LC BUFFET 鍋, 燒熱一鑊熱水, 水滾後放入蒜茸蝦, 用大火隔水蒸5-8分鐘, 完成.



蒜茸粉絲蒸蝦, 十分容易, 而且自家煮, 除了便宜外, 最重要是吃得健康!

LC buffet 無水蒸

在我這麼多Le Creuset的鍋中

出鏡率最多的是這個'26cm buffet"淺鍋

好用到不得了.  實在沒有浪費金錢及地方

很多朋友看見我買完一個又一個的LC鍋

問了我很多問題:

真係好好用嫁???

有咩好處呀, 吓吓都千幾蚊一個嫁喎???

其實佢咁多SIZE, 顏色, 係咪有分別嫁???

咁如果我都想試用, 咁第一個, 你會見議我買邊個款呀???

***************

鎖水高囉, KEEP住個保溫囉, 慳一半時間囉,

同埋佢靚囉, 連餸帶鍋上枱, 靚囉...

顏色吸引囉, 食飯時都會開心好多囉....

我只會係甘回答我啲朋友...XDDDDD

****************

至於問我見議第一個LC鍋係買邊款,

經過我年幾多的經驗

(其實也要看本身你多烹調甚麼菜式)

我會見議買這個LC BUFFET (淺鍋)  或者  18CM的 ROUND

若果你八成以上一定煮中式的菜式

肯定你會有很多蒸煮的菜

這個淺鍋必定幫到你...哈哈...

尤其是蒸!!!

連我媽媽也愛上了這個BUFFET

*********************

我大多數平日必煮中菜

因方便可以帶LUNCH BOX

加上我家少爺很愛吃住家菜

而我每餐都必會有一味是蒸的菜式

購買了這個BUFFET回家

基本上每晚也用到它

我最愛用它來做無水蒸煮

我最常用它來:

蒸魚, 蒸菜, 蒸排骨, 蒸肉餅 等等..

甚至乎用它來煎蛋, 炒蛋又得,

煮西餐又得, 例如: Risotto, 意粉等等

還可以用來打邊爐啊....

用途很多, 非常實用.

*********************

我真的十分見議朋友買這個

因為十分喜愛它的無水蒸功能

所謂無水蒸, 就是用蒸的方法

但又不需要蒸隔及水

只要直接將食材放在鍋中,

蓋上鍋蓋, 較好時間, 開火蒸, 就攪掂了.

慳水, 而且還可以保留原汁原味.

****************************

我最愛蒸魚

只要放點蔥段及薑在鍋底

放上魚再放蔥段及薑

就可以蒸了

而蒸魚當中也可以有少少變化

例如: 可以用豆腐, 勝瓜, 竹笙, 菜鋪底, 同魚一齊蒸, 這樣就可以一鍋過, 有菜有魚

而且還要原汁原味, 好鮮甜呢.

***********************

因為朋友見到我平日的BLOG裡的菜式

再經一經我簡單的介紹下

也敗了這個BUFFET 淺鍋了....哈...

可以勸敗到朋友們

真的十分開心

歡迎加Le Creuset 行例啊....

大家一齊努力COOK COOK COOK

分享烹飪心得啦.  ^O^

雲耳肉片炒青瓜

平常上班日子, 每晚的晚餐, 大多數我也會煮中菜,
因為中菜比較快, 又簡單, 加上我和少爺也會帶飯上班的,
所以中菜比較適合我們上班族 (我自己認為, xd)

很多朋友常問我, 為何下了班仍可以做飯???
其實只要你一早想好了今晚吃甚麼,
一走進街市, 就買要用的菜/材料,
不要走到街市才想當晚煮甚麼
買完即走.  就可以慳了很多時間.

加上我每逄星期一至四, 都會做一些比較家常便飯
做一些簡單的菜式,
例如: 蒸, 炒, 而且煮一些大約只需要半小時內的菜式
就會很快就煮好了.
其實一點也不難的啊...

而且也是我的大貫作風, 只要動動腦筋
把簡單的菜式, 只要加一些食材的搭配,
就可以變化出不同的款式啊..

這次為大家介紹一款家裡常吃到的菜式:  

雲耳肉片炒青瓜

********************

材料:

青瓜                 兩條
雲耳                 數件
肉片                 15元
蒜茸                 少許

做法:

(1) 青瓜洗淨, 去頭尾, 每邊磨一磨頭尾, 會有一些奶白色的液體出來, 
      去掉它, 可除苦味.

(2)  廋肉洗淨, 切片, 加入少許鹽, 油, 豉油, 糖醃一會

(3) 雲耳取幾塊, 用水浸一會, 發大後, 洗淨, 切細件, 備用.

(4)  燒熱鑊, 加入油,  先炒肉片至轉色, 直接加入蒜茸炒幾下.

(5)  再加入青瓜及雲耳炒, 調味, 加入鹽, 炒至肉片熟, 就可以了.


** 這菜式最重要是肉片熟, 因為青瓜及雲耳很快熟的.

**  若喜歡吃淋身的青瓜就炒耐一點, 若喜歡吃爽口的青瓜就不需要炒太久,
      反正青瓜可以生吃的.    

**  肉片可以改用魚片, 牛肉 等等, 就可以有不同的變化.

牛油果蘋果龍蝦沙律

左髀一直都好想試整有關龍蝦的菜式
但一次都未整過呀
無論係買雪藏或新鮮也未試過
很多次也沒有機會, 沒有時間去試做

而且一直總覺得劏龍蝦很難很複雜啊
又沒有上過cooking class
又沒有朋友教我...

前幾個星期, 好友來我家開派對
某人說會帶幾隻龍蝦來
左髀聽了, 回答:  吓...我未整過喎, 生定熟嫁?
某人回覆: 熟的.
左髀又回答:  嗯...我有點驚喎, 要諗諗, 不過熟的都好過生.  (哈)
最後我決定用朋友帶來的的熟龍蝦試做沙律啦.
我估唔會唔好食掛, kaka...

一直在想用甚麼來搭配這龍蝦沙律呢?
最後我就決定用牛油果及蘋果來搭配
這個普通配搭, 應該沒有問題吧!!!

至於醬汁, 我只是隨意的,
我告訴朋友, 不知好吃不好吃嫁,
若吃了, 有甚麼身體不適, 就不要怪我好了. :p

說開這個牛油果蘋果龍蝦沙律,
真的不錯呀, 好吃, 我喜歡
熟龍蝦真的很方便
只需要解凍, 去殼, 切件, 就可以用了.


********************

先看看做法:

材料:



熟龍蝦               2隻
蘋果                   3個
牛油果               2個

沙律汁:


BB沙律醬
練奶
黑胡椒碎
檸檬汁
白酒醋
少少PINK SALT / 海鹽




做法;

(1) 先將熟龍蝦解凍, 去殼, 切件, 備用.
(2) 蘋果去皮, 去芯, 切粒, 用鹽水浸著, 備用.
(3) 牛油果切半, 去核, 去皮, 切粒, 備用.
(4) 把以上三種材料放在大碗中, 加入沙律汁料, 拌勻.
(5)  試味後, 啱自己口味, 完成.


**  牛油果要買熟一點的.
**  沙律汁沒有特定份量, 自己調較到喜歡的口味, 就得了.
**  無白酒醋可以改用蘋果醋, 菠蘿醋也可.

豉椒炒蟶子皇

在家自煮海鮮實在太抵

昨天經過海鮮檔

看見又大又肥美的蟶子皇

實在忍不住要買下來

買了一斤多點(大約六至七隻)

都只係百三元

若果到街外吃, 貴到嘔呢!!!

左髀之前做過: 蒜茸粉絲蒸蟶子皇

http://jobechan.blogspot.hk/2013/08/lc.html

從來未試過用炒的方法

平常同少爺出去吃海鮮

都很愛吃豉椒炒蟶子

這次就自己試吓煮吧...

這次我煮的, 有少少不合格不專業啊...嘻

WHY????? ^^

因為...因為我忘記了買青紅椒, KAKA....

第一次煮, 好好味,

以後又可以自家煮了

大家不妨也試做吧.

豉椒炒蟶子皇, 做法容易

就來看看我的煮法吧....

****************************

材料:

蟶子皇                      一斤

青紅椒                      各半個

指天椒                      一隻

洋蔥                          半個

蒜茸                          適量

豆椒                          適量

九江雙蒸酒              少許                           

葸花                          適量

調味料: 以下我沒有量份量, 自行調較到碗中, 試味.

糖

鹽

水

老抽

豉油

蠔油 /  陰油膏      (我就用陰油膏的,  台灣製的, 在九龍城台灣店有售)

麻油

做法:

(1)  請海鮮檔幫忙劏蟶子皇, 回家後, 洗淨, 除去內臟, 瀝乾水份, 備用.

(2)  調較好調味料在碗中, 備用.

(3)  青紅椒切件, 指天椒切粒, 洋蔥切件, 蒜頭切成蒜茸, 豆豉洗淨, 備用.

(4)  先準備一個大鍋, 加入水, 水滾後, 加入洗好的蟶子皇灼一吓,

       大約三十秒啊...(記著不要太久, 這目的只是把沙灼出來)

       灼後, 也是要瀝乾水份, 備用.

(5)  鑊中加入油, 爆香蒜茸及豆豉, 再加入洋蔥及青紅椒炒一會.

(6)  然後直接加入蟶子皇及指天椒炒炒炒, 贊入少許酒, 炒

(7) 再加入巳調好的調味料炒, 把所以調味汁與蟶子皇炒勻.

(8)  炒勻後, 熄火, 上碟, 灑上蔥花, 完成.

**若果汁料太多, 太稀, 可以準備生粉水埋芡.



 (嗚嗚嗚....今次唔夠靚呀>< , 因為無咗青紅椒....

有籍口可以再煮一次吃多次...KAKA

同埋補影番啲步驟)

煙三文魚蛋沙律三明冶

三明冶我多數每日返工 做早餐會吃

但若果要我lunch再吃包類, 我就不喜歡

因為我個人比較喜歡吃一些濕濕地的食物

例如: 粥, 粉, 飯等等

我想我不能在外國生活了

外國人多數也常吃包包的. :p

我很少有包類的食譜

但某天在mrs bear舉行garden party

敗婦芝做了這款三明冶

味道不錯啊, 又不會乾巴巴的

我又試著做

下次在家開high tea時

可以做這個了.

當然若果可以連包包也自己做的

會更加好呢!!!

謝謝敗婦芝的食譜!!

**************************

材料: 

方包                                  數片

煙三文魚                          4片 (視乎自己愛吃多少啦)

雞蛋                                  3隻

法國珍珠乾蔥(shallot)    1粒

酸豆/水瓜榴                     1湯匙

蛋黃醬                               隨意

雜香草                               隨意

黑椒碎                               隨意

鹽                                       少許 (我沒有加, 視乎個人味道, 因為我覺得煙三文魚巳經

                                                         好咸, 夠味了)

 (根據敗婦芝介紹, 這款法國珍珠乾蔥比一般的乾蔥甜, 且不會太辣,

 用來做冷盤及沙律非常合適) 

做法: 

先把乾蔥切碎, 備用

鍋加入蓋過雞蛋的水, 放入雞蛋, 開火, 水滾煮大約4分鐘,

熄火, 把雞蛋放到冷水中降溫, 

冷却後, 把雞蛋切碎/壓碎, 備用

將三文魚切粒, 備用

準備一個大碗 (我用LC Jar...kaka..)

放入乾蔥碎, 煙三文魚粒及雞蛋碎,

再加入酸豆拌勻

再加入蛋黃醬, 黑椒碎, 雜香草拌勻調味

把所有材料拌勻後, 試味, 味道OK了,  就完成嫁了...

然後把煙三文魚蛋沙律鋪在包包上, 完成.

切件, 放在碟上, 享用!!

係咪好鬼簡單呢, 下次希望我能HOMEMADE BREAD啦!

(不過真係唔知要等到幾時我先有心機做包包...嘻)

魔鬼蛋 (Devil Eggs)

魔鬼蛋一直也很想做, 未有機會

很久以前吃過敗婦mrs bear煮的靚靚魔鬼蛋

巳經好想做啦.

又是拖吓拖吓未有時間

直到早前幾位好友來小聚

就做了這款小吃

魔鬼蛋當中的醬,

最主要是蛋黃加幾款的調味料而調出來的,

所以可以根據自己喜愛的味道

調出自己的口味!!

*********************

材料:

雞蛋                       4隻

鹽                           少許

薄荷葉                   數片小葉 (FOR 裝飾用)

蛋黃醬調味材料:

蛋黃醬 

芥未醬

tabasco 辣椒仔

Paprika 甜椒粉

海鹽

黑胡椒碎

雜香草

做法: 

1)  準備一個鍋, 加入水及鹽, 加入雞蛋, 水要蓋過雞蛋. 煮至10分鐘左右至雞蛋熟透.

2)  把雞蛋拿出, 放在冰水裡泡一會, 使雞蛋冷却啊.

3)  冷却後, 把雞蛋去殼, 切一半, 把蛋黃取出. 放在碗中壓碎.

 

4)  然後加入所有蛋黃醬調味材料, 拌勻, 試味, 調較自己喜愛的味道.

 

5)  把調好的蛋黃醬放入唧花袋中, 填回蛋白中, 上面灑上少許PAPRIKE(甜椒粉),

      及加上薄荷小葉做裝飾, 完成!!