大家好嗎?

2009年5月14日(星期四)

 

大家好呀.好耐無見呀.

因為蕭C奶病到而家都未好番

今日剛好病夠半個月(15日)

痴線嫁...半個月呀....真係好悶

最慘係而家仲係好攰同埋....咳呀...

咳係最煩啦...

而家咩都唔食得, 大家都知蕭C奶好餵食嫁啦

好鐘意食嘢嫁嘛...

好想食壽司, 好想食泰國菜, 好想食韓燒,

好想食生果, 好想食有糖水的豆腐花,

好想食好多嘢呀......

嗚嗚嗚.....幾時先唔咳呀....

31號朋友仔約咗蕭少爺及蕭C奶BBQ,

距離仲有半個月, 我當然係好想去啦...

除咗因為好想BBQ外, 亦因為好耐無見呢堆朋友仔呢

好想大家一齊聚吓囉...

 

其實仲有一位朋友LUK LING搬咗新居

一次都未去過, 又係約去佢到BBQ

但都因為我未病好, 無份啊...

而另一位車厘子, 又係搬咗新居,

諗住去佢到攪大食會坐吓...又係因為病無得去...

 

除咗病, 攪到我食唔到好嘢之外

仲要係錢都去咗啲醫生到

精神又唔好, 又無MOOD

又要無得見媽咪, 奶奶佢哋

又無得去街, 去玩,

淨係係屋企....真係好悶呀..

 

最慘係蕭少爺囉

連帶佢都咩都無得食, 無得玩, 無得休息

仲要照顧埋我添...又要擔心我

又要返工, 又要煮飯, 又要做家務

仲要有時受吓我啲脾氣仔添...嘻嘻

(似病賣病!)

 

都唔知係咪風水唔好

可能真係要搵啲辦法攪攪佢先

因為我媽咪有病,

阿哥又工傷, 而家又輪到我....

好驚呀...下個會係邊個...我都唔想囉...

 

蕭C奶好想快啲好番

好想煮靚餸及整CAKE呀

仲想同大家吃喝玩樂啊....

婚姻中的學習

 

 

不經不覺和阿榮老公共同生活了兩年啊

時間過得真的很快

和阿榮老公像剛剛結婚似的

真不像兩年啊...

聽人家說過, 若果結了婚很多年,

但還是覺得像新婚

那就恭喜你了...

這証明你們的婚姻相當幸福美滿

是的....開心的時光永遠是最快過的

 

結婚週年會想到甚麼?

想到由拍拖變成夫婦

想到求婚的情境

想到當時倆人一起籌備婚禮的過程

想到婚禮當天的歡笑

想到很多...

回憶永遠是最美的

 

人世間的愛所追求的是[曾經擁有],

甚至有些人[一夜情]

但我倆所追求的乃是 [天長地久], 一生一世

有些人或許會取笑

但很多人心底裡仍很期朌

由倆人認識, 相戀至結合

是有目的

結婚也有目的

目的乃是學習 ''愛''

追求 [天長地久, 一生一世]的愛

 

於這兩年的結婚生活

我倆不繼學習夫婦的相處之道

使我倆更加了解對方

經過很多事情之後

彼此更加努力學習

學會用心

體諒,  體貼, 尊重, 包容, 愛, 付出, 忍讓, 扶持等等

從而增加了我倆的溝通及處事態度

倆人一起生活

各個方面都需要共同努力及付出

才可以擁有幸福美滿的婚姻

 

 

但願大家也一起努力吧!

好久不見自家煮

 

 

2009年5月8日(星期五)

 

琴晚又咳了....狂咳呀...又係無瞓過咁

真係想屎囉....

個鬧鐘一響...超唔想起身呀...

返到公司, 個精神都好好嫁喎...

但係無端端到咗十一點幾

個頭開始唔係好舒服

對眼集中唔到, 暈又唔係暈喎, 痛又唔係痛喎

總之就頭有啲唔舒服啦...

後來咪同老細講

無咩特別工作要做

我想下午放病假啊

咁老細話, 好呀, 唔舒服都係早啲返去休息吓

 

因為帶咗飯, 所以食埋先走囉

食完lunch, 執嘢諗住走人之制

突然發現...無帶鎖匙...

都好彩係未返到屋企時才發現囉

如果唔係....我一定超唔happy呀

即刻打比阿哥, 叫佢攞比我

返到去, 阿哥仲買咗啲餸

幫我洗好, 切好之後

我都無理佢, 因為我要瞓呀

所以我都唔知阿哥幾時走了

瞓到七點左右

超床, 煲飯先

等阿榮老公返嚟

咁就可以

 

蒸魚

蒸排骨

蒜茸炒菜心仔

結婚2週年@有情飲粥水飽

2009年5月6日(星期三)

 

今天是結婚週年

可是因為蕭C奶病了

所以今日的節目都要被迫取消

只可以靜靜地待在家中好好休息啊

 

可是蕭C奶很任性啊

要求阿榮老公去酒樓飲茶

因為蕭C奶實在太悶了

想到要食粥....oh.....唔想食啊

阿榮老公問: 你可以食得啲咩呢???

其實我一早諗到啦.....

嘻嘻...食腸粉囉....

點都好啦, 巳經好多日都未出過去

又未食過其他嘢...總之蕭C奶今日就一定要出外走走

 

飲過茶, 買咗啲日用品

今晚我哋無有情飲粥水飽

因為蕭C奶講明, 唔再食粥了

要食飯呀...

所以阿榮老公又要親自下廚了

 

就係咁樣...渡過咗我哋的結婚2週年日子

其實食咩, 做咩, 去邊都好

最重要係....

我哋倆個開心, 幸福就得了....

 

等我好番之後

再好好同老公慶祝番先.

病後第一天工作

2009年5月7日(星期四)

 

病後第一天返工

同事一見我帶口罩...就...怕咗我

今日精神好好啊....

可是還是不可以講話啊

只是還有咳, 故睡覺睡得不好啊

所以很早就起床返工了.

今日總算做番早幾日的手尾

媽咪好好呀...唉...應該係我照顧媽咪嫁嘛

媽咪知我病, 怕我們沒有時間買菜

又怕我沒有精神做菜

今天媽咪親自來了我家

為我們準備了今晚的餸菜

好讓我回家後, 不用花時間洗, 花時間煮

所以今晚的晚餐好好味呀

因為實在太久沒有吃住家飯了

媽咪永遠是最好的

 

差不多十天沒有見過媽咪啊

實在有點掛念

我想媽咪一樣吧

她除了掛念我還多了一份擔心

我這個女兒實在過份啊...

我想母親節我一定趕不及

和媽咪及奶奶慶祝

希望病快點好

這樣我就可以為倆位母親大人

好好慶祝一番!

 

 

咳到根本瞓唔到....好痛苦呀....

而家巳經係深夜的三點了

但係我真係瞓唔到

其實好想好想瞓...

但係頭先咳得好厲害

咳到我勁痛勁乾, 根本就瞓唔到

而且仲會嘈到阿榮老公啊...

所以索性起身

無咩做咪又睇吓啲blog友囉...

 

呢幾日我只可以用手語或嗯嗯聲去同老公溝通

好勁嫁...我哋而家可以唔講出嚟

用手語同嗯嗯聲就明白對方講咩....

至於同朋友仔, 當然係用文字嚟溝通了

都唔駛打比我, 因為我唔會聽

我連阿媽, 奶奶打嚟我都唔聽

因為我根本出唔到聲, 講唔到嘢..

而且佢哋啲老人家, 一向同佢哋講電話要好大聲,

佢哋先聽到

咁而家我根本就連雞仔聲都大唔過

我仲點同佢哋溝通呢...

所以我巳經叫咗屋企人, 有事就打比我老公

我真係唔想講嘢...

根本無心機, 一講嘢就痛到我屎

 

阿哥今日攞咗湯比我

我都無氣又無精神去招呼佢

佢見我唔出聲, 又無心機

問我係咪要瞓覺, 我話係呀...好攰呀

佢見到咁, 佢擺低啲湯

就走咗lu....

 

聽日我同阿榮老公都一早攞咗假

目的就係.....聽日係我哋的結婚週年

原本打算開開心心去海洋公園

然後夜晚就去食好嘢

而家....無啦....咩都無lu...

唯有要等我好番啦...

老公仲講笑咁講

結婚週年食粥水

唉.....

仲有發燒....睇咗中西醫

 

2009年5月3日(星期日)

 

病的第四日了

琴日以為好咗啲....

到咗今日早上都還可以的...

但到咗晚上呢....開始嚴重咗喎...

個屎人喉嚨feel到 '慶慶哋' 咁, 而且仲好痛...

個咀的入面的上下唇仲紅哂及勁多菲滋

脷底又係紅哂有菲滋....

oh no...oh no....又係咁....呢一個情況....

係我最驚最怕及最痛苦的...

因為食又痛, 飲又痛, 就算唔飲唔食, 都係勁痛呀....

如果打個噴嚏仲屎呀, 痛到真係好似攞咗條命

超級超級憎病到咁..

發燒, 頭痛都好啲呀...個口腔一攪到咁

就真係影響到全部嘢....

 

今晚照樣都係阿榮老公煮飯

今日無心機, 所以無影相

煲咗湯, 係合掌瓜紅蘿蔔牛蒡煲豬月展湯

有蒸師頭魚, 有灼生菜及梅菜蒸豬肉

今餐真係無咩胃口

早幾日都仲有胃口

今日因為口腔攪到咁

真係食唔到...好痛苦...

 

聽日就返工了

而家咪早啲休息, 最日要去睇睇中醫先得

因為食啲西藥, 攪到個人好似好熱, 好火咁

 

 

2009年5月4日(星期一)

 

今日一起身...就巳經feel到勁唔掂呀

因為個口腔係勁勁勁...勁痛呀...

照鏡睇吓個口腔攪咩啦...

oh no ...oh no...oh no..變咗條孖潤腸咁呀....

因為成個口腫哂, 紅哂, 個喉嚨勁痛, 勁乾

大家可以想像吓....點刷牙, 點飲水, 點食嘢, 仲點講嘢?????

望到咁...我巳經好唔開心, 好無心機

因為我知起碼要一個星期先會好番...

呢啲係我生菲滋的經驗....

而且真係撞鬼了....琴晚全晚都瞓唔到

一來咳啦...二來就真係唔知係咪因為肝火勁

攪到個人想瞓, 但係瞓唔著

成晚都無瞓過....今日仲要返工

 

横掂都要帶口罩...咁就唔駛化妝了

而且諗住早啲返去公司的超級市場

買定餃子(用作中午食)及川貝批把膏

返到公司, 啲同事見到我帶口罩

就知我病, 而且我跟本講唔到嘢

係用手語或者真係唧少少聲出嚟答佢哋

到咗12點, 我去咗睇中醫

探吓熱...原來我仲有發燒

 醫師話而家係非常時期,

佢叫我三點鐘嚟飲藥

但係好攪笑囉...佢要我今晚一定要再睇個西醫

因為佢都怕我唔退燒呀

佢知西醫一定快啲, 不過就散啲囉...

佢話有發燒, 唔可以返工

比咗兩日病假, 要我一定好好休息

跟住我返去公司, 交低啲重要工作

之後我二點半就走咗, 去咗飲中藥

飲完, 原本想返去睇開的西醫...

但係好煩呀...巳經開始個頭有啲唔舒服

如果係銅鑼灣到, 仲要坐車返灣仔,

再轉巴士, 坐一個鐘返入去屯門到睇醫生

然後又要坐返35分鐘的屎人輕鐵返天水圍屋企..

諗到咁...我想暈囉...轉嚟轉去, 到時唔暈就真係屎了

諗到不如打比 '叻叻' 先,

因為佢住係銅鑼灣區, 等我問吓佢睇開的醫生係咪係附近

咁我可以睇完, 係銅鑼灣到直接坐一個鐘返屋企呀嘛

打咗比 '叻叻' , 佢幫我打咗去掛號

不過都要等成個鐘, 因為剛巧醫生出咗去做手術

而家趕緊返診所, 而仲有兩位病人輪緊,

我係第三位, 但都無計啦, 都好過坐車轉嚟轉去

 

但係姑娘好好, 佢見我咁唔舒服

佢都怕醫生會遲到, 返唔到嚟, 要我等好耐

佢好攪笑, 佢話介唔介到樓上15樓的睇吓

佢幫我打電話問....

問咗話仲有6至7個人, 上面嗰位醫生,

姑娘話聽啲客人話都好好

咁姑娘話上面應該會快啲, 叫我上去試吓

咁都好, 因為我真係好攰, 好唔舒服, 好想快啲走呀...

咁我咪上去囉...登記咗, 見坐咗三至四位病人

心諗都應該快啲啩....點知...等吓等吓...都成個鐘喎

而且見到多咗幾個人入嚟診所...

佢哋又唔駛掛號....先知...原來佢哋一早掛咗號

係出咗去行吓....

跟住我就忍唔住問姑娘, 仲有幾多個到我啦...

oh no...仲有5至6位...我計過時, 頭先入咗三個人

平均一個人入去要10至15分鐘...咁我仲有成5至6個

咪即係仲要等多個幾鐘....吓...唔係呀....

橫掂都係等...我不如去番 '叻叻' 睇開嗰個

咁我即刻走番落去, 姑娘見到我, 佢以為我睇完

我話唔係呀, 我想嚟睇吓, 而家你呢到有無得睇呀

佢話, 有呀, 下一個可以到我...嘩..咁我梗係係到睇啦

我話比姑娘知, 上面15樓個位醫生, 我仲要等多5-6個人呀

佢話: 吓....咩咁多人呀....真係唔好意思呀, 要你走嚟走去.

我話唔緊要, 你都係想我快啲啫....

咁跟住我終於有得睇了.....

醫生話, 我唔係豬流感, 只係一般的流感

不過要勁飲多啲水, 因為個喉嚨乾又發燒

啲水份會比較容易流失

千吩咐萬吩咐我, 一定要勁飲水, 同去洗手間

咁先可以快好....

我都知, 咪就係因為我勁飲水, 好快又要去洗手間

睇完都巳經係五點半...即係好似平時咁放工時間...

返到去, 咩都唔好理...快手沖涼, 要即刻瞓一陣

阿榮老公返到嚟都七點半左右了

原來佢今日叫咗老爺買咗煲粥的料

佢一返嚟就即刻入咗去煲粥比我食

佢叫我瞓啦....煲好會就叫我起身

就係咁....到咗差不多九點, 終於有得食嘢了

我好想快啲食藥呀...嘩..不過真係好痛

啲水同啲粥一定要灘到得番啲啲熱先可以食到同飲到

如果唔係....個口腔同喉嚨痛到你屎呀....

食咗第一次藥, 跟住就瞓了...

雖然瞓得唔 '冧', 因為要經常飲水及去洗手間

但係都feel到啲藥都好有效, 因為好似無痛得咁勁

所以我好想一間半夜再食多次

半夜一點, 起床, 老公煲熱番啲粥比我食少少

跟住我又食第二次藥, 然後又瞓lu.....

果然今晚瞓得好啲, 起碼有瞓過....

不過個喉嚨同口腔當然仲有發炎及痛啦

而且仲有咳...

不過都feel到好咗好多...希望快啲唔好咁痛啦.....