雪耳蘋果雪梨豬月展湯

這款湯水超級鐘意呀, 尤其在天氣炎熱的夏天又或者當感到咽乾口渴,脾虛濕困時飲用,最為理想.

雪梨,蘋果甘涼,具生津潤燥,清熱止渴之效. 雪耳滋陰潤肺. 再配合南,北杳潤止咳平喘.

紅蘿蔔,果皮健脾理氣化滯. 這款湯水是個健康滋補的生果湯.

材料:

雪梨及蘋果              各2個至3個

雪耳                          1/2兩

紅蘿蔔                      1個

豬月展                      1斤

果皮,南北杏            適量

做法:

(1) 豬月展洗淨,汆水,南北杏和果皮洗淨,備用.

(2) 雪耳用水浸軟至發大,瀝乾水份.切去深啡黃色硬底部份,切細,備用.

(3) 蘋果及雪梨洗淨,去蕊,每個分別切成四份. 紅蘿蔔洗淨,去皮切細塊.

(4) 湯鍋內注入清水, 同時放入蘋果,雪梨及紅蘿蔔, 果皮及南北杏.

(5) 水滾後加入雪耳及豬月展, 轉中火煲2小時,加鹽調味,即可.

萬千寵愛在一身

今日的標題是"萬千寵愛在一身

",點解我會咁講呢?係因為覺得自己實在太多人鍚自己了. 今年係我第一年派利是,通常結咗婚的,都會好少有機會收利是

啦,除咗自己的父母外,如果係朋友或者同事,知道你結咗婚都唔會再派利是的.但係.......我就唔係囉,我公司的Senior,佢哋真係好鍚我呀,其實我真係以為今年除咗只會收到自己父母,老爺,奶奶,阿婆的利是之外,應該都唔會收到利是啦,點知..........佢哋全部都當我未結婚咁,照派利是比我呀,個一刻,個心好開心

同好感動,佢哋真係好鍚我,對我好好.呢種感覺,真係好溫暖

.

 

有時候佢哋對我太好,都攪到我唔好意思,但係講真的,我真係好enjoy呢種感覺,因為覺得自己仲係好細,好多人鍚,好多人鐘意自己.所以有時,當我遇到一啲唔係幾開心的事時,諗到身邊有咁多人鍚自己,有咁多人對自己好,啲唔開心

的事,好快我都會盡量唔諗,咁我就會好快無事嫁啦.

 

赤柱廣場之心醉芝味情人節

今日是二月十日年初四,由於我的舊同事ifve公司舉辦活動,要邀請50對情侶

參加,她較早前就打電話

給我,問我有沒興趣,知道活動的內容後,好似幾好玩,我就答應參加了.

 

個活動的內容大致是:陳法拉及黃長興大唱動人情歌

、參與比併及與現場觀眾玩遊戲、送獎品、50對情侶一齊打芝士火煱並以芝士砌出巴黎鐵塔大併圖、芝士雕刻大師 Troy Landwehr表演.

 

 

 

當我哋嚟到活動的場地,氣氛好好喎,每一對情侶除了可以打芝士火煱外,還送上一支250ml的紅酒,一支紅玫瑰花

及一張情人節咭呢!當現場的工作人員在準備開場前,突然有位報章的攝影師很有善地請我同阿榮做模特兒影相

,哈哈,我哋見佢咁有善就影啦,好好玩呀,因為當時好似啲明星咁呀,比人影相. 跟住節目開始了,司儀請了陳法拉

及黃長興

出來,好多記者包圍着他們影相,我都唔例外,扮記者同佢哋影相.他們真人同上鏡都無分別,法拉好廋,長興就幾靚仔,兩位都好nice,好好笑容. 影完相之後,他們分別各自唱了一首歌

,ok喎,兩位都唱得不錯.唱完歌之後,就開始玩遊戲了,當然我一早巳被ifve內定玩遊戲啦,完咩,原來係分別有三對情侶,玩鬥快食雪條,哈哈,居然我哋勝出,得到冠軍,獎品是Love Rabby外套一件,價值港幣460元及Recosuke and Recogirl T-恤一件,價值港幣290元.節目到了尾聲,全場的情侶還同陳法拉及黃長興影番張大合照留念

.嘩!今日真好收穫,又食,又玩,又攞埋禮物

.

 

 

 

活動完畢後,我同阿榮正在執拾準備離開時,又突然有位新報女記者走埋嚟問我哋,介唔介意做個簡單的訪問,當然見到佢都係好有善,我同阿榮就做咗個簡單的訪問先離開.

 

好多謝ifve邀請我哋參加呢次的活動,如果第日再有呢啲活動,記得搵我哋呀!哈哈!

 

2008新年快樂!

新年快樂!

今年係我結婚的第一個新年,其實同平時都一樣的,只係多咗.............要派利是,少咗收利是囉!哈哈! 年三十同初一都去咗老爺同奶奶到,好開心,因為一家人食團年飯,傾吓,笑吓,雖然無咩特別節目,但我都好開心,我最鐘意一家人一齊的感覺,覺得好溫馨,好溫暖,簡簡單單就最好了,好開心老爺同奶奶都係一啲好容易話為的人,而且佢哋都鐘意簡簡單單,唔會好似其他的人咁煩囉.

 

年初二就要返去我鄉下了,因為我外婆係到,而且我又有好多親戚,中午飯就約咗啲姑姐一齊,大家吃過飯,傾咗一陣,影吓相咁囉. 要提一提的係,我爸爸好勁呀,佢親手建立咗自己的菜園,有相比你哋睇嫁,之前都聽過我爸爸講比我知,今次返去,親眼睇到,好靚呀,而且啲菜好新鮮,無農藥,仲好清甜呢? 爸爸的菜園有好多種菜,例如:有生菜,菜芯,波菜,四季豆,大菜等等....爸爸仲話過咗新年就可以種瓜類喎.爸爸真係叻!

 

爸爸親手摘了一些菜芯及白菜給我帶回香港,明天可以帶一些給老爺佢哋試吓了.

 

 

 

 

到了下午,我就過去我外婆家,這邊又有驚喜了,我舅母又係好鬼叻的,年年都有親手做年糕,所以我又唔客氣咁,攞咗少少返嚟囉,因為今年奶奶其實有同我講想要年糕的,不過,我無買呀,其實係唔想佢哋食咁多呢啲嘢,而家好了,可以有年糕比奶奶,而且仲係自己人做的,仲好啦!

 

明天晚上約了奶奶去元朗食壽司,而家每晚都做'和味濃情',同家姐傾開,晚晚見到都想食,咁我提議,不如搵日一齊去食,咁家姐話不如年初三啦,大家都未返工,奶奶又收早,就係咁..........

 

係喎,另外一件事都好開心,就係家姐升職呀,副經理呀.........太好了,在此恭喜家姐了.

曼谷旅行

16號至19號同咗'叻叻','愛肥'及'愛麗詩'去咗四日曼谷,嘩,今次都好辛苦呀,唔係relax團嚟嫁,係shopping團嚟的,淨係第一天都巳經用咗我哋七成的氣力,淨番三成留番之後的三日,平均每晚我哋都成兩號點鐘先訓,好攰呢?不過,當然係好開心的,因為日日都唔駛返工,只係顧住每日去邊到買嘢,去邊到食嘢,去邊到玩咁. 但係我就慘了,由於晚晚太夜訓,我的體質係好多'火'的,終於係第三晚,就開始生痱滋了,我自己心諗,唉!死梗,一定會生到成口都係,點知到最後一日,果然不出我所料啦,又攪到成個口都係囉,真係好辛苦呀!飲水又痛,食嘢唔駛講啦,仲痛,呢啲痛法,真係仲慘過你發燒,感冒囉!講嘢又講唔到,唉!起碼都要成個星期先好到,好啦,以為啲痱滋好啲啦,無啦啦又作感冒,係咁留鼻水,又心諗.....唉!中招.嗰晚返到去呀,食咗啲藥就訓,點知,食到連鬧鐘都聽唔到,老公七點半先叫我,剛好我這個星期六要返工,唉,攪到遲到囉,返到去,有三位同事以為我有咩事,打鑼咁搵我,攪到我好唔意思囉!

去曼谷,雖然係平,由於平,你就會用得多咗錢,因為當你見到每樣嘢都平過香港,你就會好自然,買啦,買吓買吓.....就會.......哈哈!其實我哋四日都好唔夠時間,有啲商場其實都係用咗好短的時間去睇,去買,今次我連家品及男裝部等等都無時間去睇呀,好彩我係夜市到買到好多平靚正的衫比我老公呢?如果唔係,好似無嘢比佢唔係咁好喎....曼谷真係一年去一次都得呀,因為太多嘢買,太多好嘢食,食啲法國餐,意大利餐,平均一個人只需要一百元左右,你話,香港點食到呢?

請工人！

嘩，我真係成個月無寫BLOG了，實在太忙了，自從我愛上咗跳FUNKY DANCE之後，因為我每星期都有三晚去咗跳，所以只得二晚會同老公食飯，所以跟本都無時間去睇電視，行街 ，上網，連返老爺同我媽咪到食飯的時間都少咗呀！有時都覺得唔係幾好咁，唉，而家一日二十四小時其實真係好唔夠用囉，最少要三十六小時就差不多了。又或者，都唔知邊鬼個定的規律，每天要工作八至九個小時的工作時間，講真，無論係單身的，結婚的都好唔夠用囉。放咗工，返到屋企都平均七點，食過晚飯都要四十五分啦，跟住到八點，沖吓涼，坐吓，又話 要早睡早起喎，十一點鐘訓好未，中間由八點至十一點呢啲時間，可以做到幾多嘢先，唉，單身都好啲呀，好似我哋呢啲結咗婚的，食完飯仲有好鬼多家務到呢，做完就剛好十一點，你哋話了，我邊仲有時間做其他嘢，我而家都少睇咗書了，因為真係無時間囉！

 

而家一個星期，最多只可以有一晚可以約朋友食吓飯，因為又想KEEP住跳FUNKY DANCE，但又想盡量其餘二晚陪老公食飯，但又好想返去見吓啲老人家喎，所以最多只可以一晚囉，而且都要留返啲時間嚟做家務。老實講，我的目標係請工人囉，希望可以淨多少少錢，真係唔想咁辛苦自己。請 工人或者鐘點都好好啦，真係顧少好多嘢，做少好多嘢，到時真係可以多番好多時間比自己囉！

 

日月魚淮山杞子煲豬月展湯

有次媽媽煲這款湯水給我飲用時,我第一次見日月魚, 我從未見過喎,問媽媽啦,媽媽說: 好不好飲呢? 這是日月魚,好有益的,有明目滋潤功效. 我答: 哦, 媽媽好好飲呀. 就是這樣我又識多一樣湯水的材料了. 謝謝媽媽.

材料:

淮山               1兩

杞子               半兩

日月魚           6隻

豬月展           1斤

龍眼肉           半兩

做法:

(1) 豬月展洗淨,汆水,備用.

(2) 淮山,杞子與龍眼肉洗淨,備用.

(3) 日月魚洗淨,用溫水浸約30分鐘,瀝乾水份,備用.

(4) 湯鍋注入清水,下淮山,龍眼肉與日月魚. 水滾後加入豬月展,轉中火煲2小時,

      然後加入杞子,煲約30分鐘. 最後下鹽調味,即可.