DaDa生日飯局@金山海鮮酒家

2010年1月22日(星期五)

 

是日為好友'dada'的生日飯聚

dada話今日好想好想食海鮮喎

原本dada係想去尖沙咀的海鮮站

可惜巳經滿座, 所以要改地點.

 

問咗好多次壽星女, 佢都係話只想食海鮮

咁蕭c奶就攪盡腦汁

四處上網找尋食海鮮的地方

多數食餐海鮮都係大排檔或者西貢呀, 東涌呀, 流浮山等等

呢啲地方....咁因為又要就一就大家的工作地點

最後上網搵到呢間

金山海鮮酒家

諗起有位朋友仔都食過

見佢份人咁咀刁, 都肯嚟呢間

咁即係話呢間, 應該唔會差啦.

以下所有菜式, 都係上網時, 見人哋的食評所講

所以蕭c奶一早就抄低所以好評如潮的正餸

一嚟到, 即刻比張紙dada, 問佢啱唔啱食

佢淨係落咗order要例湯及炸鱔粒

 

ivy姐係咁叫肚餓, 咁就叫咗

沙薑雞腳

夠淋身, 又大隻, 仲好夠味添, yummy yummy!

例湯

係木瓜雪耳唔知咩咩咩煲的湯???

唔記得咗個名..嘻

我自己就覺得一般啦...無咩特別.

雲英雞

一見到隻雞的雞皮就知好食

好滑咁, 而且黃油色澤, 我最like呀

而且仲有埋內臟添

食落去我自己覺得好味, 有雞味

不過我都認同dada所講

呢隻有少少過咗火

應該可以再滑啲的

不過都係高水準的

值得叫!

砵酒焗蠔

賣相一般, 唔係幾靚仔,

而且仲好似好細碟咁, 不過落order時, 巳問咗一客有幾多隻蠔,

都係話有五至六隻左右

焗咗出嚟, 唔會太縮水, 因為係桶蠔嚟的

不過味道呢, 就真係幾咸, 失色咗添

如果唔係因為太咸, 其實佢煮出嚟的味,

係幾金香嫁.

濃湯浸菜心

菜就必定要的, 見人哋個個都要呢個菜

咁梗係試吓了, 佢加咗啲頭菜, 及用濃湯上

所以個菜都幾鮮甜的

豉油皇鵝腸

呢碟一定要用

色, 香, 味 俱全呀

一個字.....正!

好耐都無食過咁新鮮的鵝腸

而唔係雪藏及漂過的鵝腸啊

好夠份量同埋好入味, 好有鵝腸味呀

鐘意食的人, 一定要食呀!

油鹽水花甲

一上碟佢哋見到個湯係橙色的, 以為係辣,

不過我同佢哋講, 唔係好辣嫁, 信我啦.

其實一啲都唔辣，個湯汁有大頭菜粒同蔥段，

仲有少少好似金不換的味添, 蜆很鮮甜，連個湯都好好味！

又係必食之選!

蒜茸粉絲蒸扇貝

大大隻, 好似係每隻14蚊,

蒸得剛好, 沒有過火, 又係好好味啊....

 

豉汁炒蟶子皇

76蚊四隻, 要咗兩份,

嘩...咁先似樣嫁嘛

肉多過殼, 賣相幾靚, 幾豐富

而且個汁不會太厚太濃, 又不太咸

味道不錯, 而且蟶子肉好爽口添, 抵食!

沙拉骨

甜酸度啱啱好，骨香肉滑, 食咗咁多正餸,

送來這款酸酸哋的, 好胃口呀!

薑蔥炒肉蟹

肉蟹新鮮, 好有蟹的鮮味, 只是如果大隻少少就最完美了

 

松子炒脆鱔粒

其實我係網上見到有人食呢個餸

不過我一睇就覺得唔好食, 所以無提議到呢味

不過ivy姐及dada又好想食鱔

佢哋話叫呢個, 咁就叫啦

可惜...真係只係普通到唔普通, 唔出色.

下次唔好叫呀....ok.

魚湯浸菠菜

係送的, 食食吓, 個待應係會自動送碟菜嚟的

服務真係好呀.

綠豆沙

平時酒樓送的湯水,

蕭c奶多數都唔飲的, 因為嫌佢煮得好甜

哈, 金山又唔係喎, 我試咗一啖,

好飲呀, 因為唔甜呀, 好少好少甜

好啱我呀, 好飲呀, 最後係飲哂成碗

 

呢間金山真係值得一試

貴錢又唔係好貴, 加上服務都好好

好快手嫁, 會主動換碟及沖茶

樓下勁多人等位呢!

地址係最後呀. 各位.

　

蕉蕉及謝主任早前又去咗日本玩

買來了箱根的小食給我們啊

係有關豆腐的小食啊...

多謝哂...

2036靈芝孢子????

咩嚟嫁....

 

dada打開...

原來係經埋親手做的生日蛋糕

係牛油蛋糕! 嚇得我呀..嘻嘻!

而家無咗我負責整蛋糕

全部都變哂由經理負責整

oh...辛苦你了..經理! 

dada祝你生日快樂, 開開心心, 順順利利!

許個願先...笑得咁甜的, 唔知許咗個咩願呢!

好嘢...happyt birthday, 祝你, 願望成真!

 

點少得一張大合照啊

好好味, 好香, 經理用咗第二個牌子的牛油,

真係勁正呀, 有機會我又要整呀.

 

 

 

地址 :

金山海鮮酒家 佐敦吳松街66號   Kam Shan Seafood Restaurant 66 Woosung Street,, Jordan

電話 : 2332 7366

 

仲有叧一間分店係附近.
 
地址 : 佐敦彌敦道219號莊士倫敦廣場7樓

蕭家姐新居入伙@容龍酒家

 

2010年1月10日(星期日)

 

可喜可賀....蕭家繼蕭大哥榮升業主後

今次輪到蕭家姐了...yeah!

蕭家姐今日的入伙酒

擇咗容龍海鮮酒家

蕭家姐話好想幫襯容龍好耐嫁了

一於豪一豪佢先喎...

一直以嚟, 我自己都好想試呢間酒家

不過好早前都聽過人話好貴

難得蕭家姐咁大方

佢自己都好想試

所以佢自己一諗到餐入伙酒

就決定嚟容龍

只可惜...對於容龍呢間酒家

以後都唔會再幫襯

超級失望

就算有人請我都唔會嚟

寧願去第二間好過

都係嗰句啦....貴唔緊要

最重要係質素

 

係容龍到, 你只會搵到:

無質素

無服務

無味道

無水準

大家不妨睇睇以下的餸菜

就會明白.

有錢都唔好咁嘥

咁的價值及服務

不如去五星級酒店豪一次好過.

芒果牛肉甜豆

嘩...淨係個賣相都唔得啦, 個碟仲大過啲餸,

好心啦, 咁出名的酒家, 都唔好咁孤寒啦,

嚟到, 叫嗰果(即係我哋)都尷尬,

整嗰個(即係容龍) 真係知唔知個 '醜'字點寫啊.....

再講味道, 奶奶一食, 即刻講:

阿bi, 呢碟餸你一定識整, 仲會好食過佢.

奶奶, 真係醒呀, 不過唔好同我比, 因為我蕭c奶

一定會好食過佢千萬倍及賣相精緻過佢囉!

蚊比同牛比, 容龍勁唔掂, 邊有得同我蕭c奶比!

呢碟餸咁簡單, 都可以煮到咸到屎,

仲有無味道可言.....

呢碟嘢...收...98蚊...oh...發屎佢囉

重新一句, 貴無所謂, 最重要質素!

豉椒炒蟶子

唉, 送到嚟, 只係見殼, 不見蟶子肉,

要咗一斤, 我都知唔係蟶子皇, 係無得比

咁講味道, 嘩, 又係得個咸字,

其實又係啲普通炒海鮮的餸啫,

但都可以炒到咁, 無試味嫁..唔該入面位廚師

攪邊科呀?????

 

睇落好似好靚...可惜又一劣作!

白灼九蝦

要咗一斤灼九蝦, 食咗以上兩味,

終於有一道係好味...

但各位別忘記

九蝦本身係靚蝦, 甜及爽,

而且我哋係白灼, 所以一定係好食啦

因為白灼本身係唔駛用其他配菜或調味料煮

所以係九蝦本身新鮮及靚

所以呢碟好食唔好食, 都唔關容龍事啦!

西蘭花帶子玉環

又係好細碟, 都唔知點解要咁大隻碟,

既然知道啲餸係咁小份量,

好心唔好用咁大隻碟上菜啦,

真係好肉酸嫁.

大家以為好大, 其實係我zoom埋去影到咁大咋.

講味道, 西蘭花都算ok, 不過無咩特別,

上面的蛋白麻麻地, 唔夠蛋白香,

加上所謂的帶子, 只係將原本一粒厚的帶子

再切成幾片的薄片...超級慳家..

呢碟盛惠: 98元. 又係發到容龍屎囉....

斑球兩味

要咗一條老鼠斑, 一款用嚟炒,

一款用作蒸.

又講味道, 見個樣以為好得好食

點知...又失望多次.

斑球唔爽口, 仲有啲酶酶哋,

唔知係條魚唔新鮮

定係個廚師咁唔掂.

未食過咁差的斑球.

話明斑球兩味,

唔見第二碟的....稍後公佈.

炸芝士豬扒

蕭大哥好想試呢款有芝士的炸豬扒

咁見佢個名好似感覺唔錯

一於試吓囉...

送到嚟, 個樣好乾好乾,

賣相好唔吸引, 之前嚟咗幾款餸菜

巳經好失望又無水準,

諗住再比機會容龍...超級超級失望

食過日本菜的炸豬扒

你哋就會知又係無得比

嘩...人哋炸到的豬扒表面, 好鬆脆, 好靚仔

但係呢間容龍想學整, 又整唔到人哋咁有水準

個表面的真係好難食, 好似食緊啲又乾又硬的唔知咩咩咩.

其實我真係唔識形容,

總之就好難食, 又乾又硬.

再講豬扒的肉質, 無豬味, 無汁, 仲有個芝士超唔得,

唔知用咗邊隻芝士去炸. 無芝士味.

食落口, 表皮還表皮, 芝士還芝士, 豬扒還豬扒,

即係唔似人哋日本菜的炸芝士豬扒,

人哋一啖咬落去, 係會入口即溶,

將係個表皮,芝士及豬扒溶為一體

而容龍呢到...真係超勁呀

可以將溶為一體, 變成三個獨立的口感, 超級分明.

真係不得不寫個 '服' 字比容龍.

我諗想搵勁唔好食的豬扒, 非容龍莫屬!

焗龍蝦

呢味餸仲加離譜, 簡真係食到火起.

話說, 蕭家姐想食芝士龍蝦加伊麵底,

同個待應落order,

點知.....待應話: 我哋呢到無芝士加伊麵底.

如果要伊麵底, 就無之芝士.

我眼都突埋...吓

....咁攪笑.

待應再答: 咁你哋想點邊款龍蝦呢! (態度勁唔好呀, 好悔氣嫁)

咁我問完蕭家姐, 無芝士伊麵, 你仲想唔想食啊.

要得芝士就無伊麵, 要得伊麵就無芝士.

蕭家姐就話: 算啦, 咁我要芝士, 放棄伊麵囉.

就係咁...我哋就要咗容龍的煮法

就當試吓囉. 

唉, 唉, 唉, 一見到碟龍蝦,

個龍蝦表面, 咁似之前炸豬扒的表面的

唉...一見到咁

, 就知唔好食啦...肯定.

果然無錯, 個表皮炸粉, 又係同豬扒一樣,

再重複, 又乾又梗, 好難食.

開始食了, 睇吓塊表皮...嗯...真係好唔得呀

真係無芝士嫁...好難食.

仲有係...又係得個咸字, 係勁咸嗰種呀.

我就直頭飛起個塊又乾又硬的表皮

都好彩仲有龍蝦肉...

不過食落就龍蝦的鮮味,

我哋懷疑佢唔係用新鮮龍蝦,

係用雪藏, 容龍專登用呢個方法去焗,

係想掩飾

唔係用新鮮的龍蝦,

老實講, 就算佢係用新鮮龍蝦,

用咗個咁差的煮法, 真係嘥咗隻龍蝦

我覺得用蒜茸蒸會好食好多

同埋會食得到龍蝦的鮮味

斑球兩味

再次出現....記唔記得之前介紹咗炒斑球的一味

食到食哂以上的餸菜

等咗成20分鐘, 都未見最後一味,

差啲自己都唔記得.

中間吹咗佢哋兩次了

終於前後等咗差不多30分鐘

嘩...蒸斑嚟了

估唔到食咗成晚, 除咗係個九蝦最好食

仲要係唔關煮法呀,

呢碟蒸斑, 算係最好味嫁了

蒸得剛好, 味道係最淡的一碟

之前的, 咸到好難頂嫁, 要狂飲水

呢碟最後係奶奶掃哂, 因為最淡口.

總括嚟講, 容龍真係好唔掂,

我未食過一間咁差勁的餸菜

服務態度仲要唔休做, 唔想做, 唔想郁咁呀.

啲經理的語氣, 真係好無禮貌, 又好似覺得你好唔識嘢咁囉

好似好睇小人咁. 

最討厭係呢啲人, 狗眼看人低咁的態度!

 

呢篇真係寫到我一肚氣

唔寫又唔憤氣, 真係唔想再有人去幫襯

好食的食店, 一路寫會一路回味當時美味的餸菜

會好開心....but

而家我一路寫就一路火起

, 回想起當晚的

差到爆的餸菜, 真係勁唔like囉.

點解今次咁有心機寫,

係因為大家估吓我哋食咗呢幾款餸

盛惠幾多錢?????

係二千幾蚊呀....

見到個價值, 真係差啲暈低咗.

二千幾蚊呀...唔係二百蚊呀

食啲咁的水準, 真係好垃圾呀

二千幾, 我哋可以要半圍食鮑, 蔘, 翅, 肚都得啦

仲可以去啲環境勁高貴的

服務質素好good的都得

雖然唔駛我蕭c奶比錢啫,

但係真係好戥蕭家姐唔抵及肉赤呀.

所以話呢, 預咗肯洗錢,

都要你比到個水準我先得嫁

貴唔緊要, 最緊要係質素.

無水準, 無服務, 無質素,  無味道,

物非所值!

仲要收人咁貴, 真係食人唔 '舌累' 骨呀!

 

奉勸各位,  唔好幫襯

***容龍海鮮酒家***

除非你有討厭的人

咁你就要介紹容龍比佢去了.

 

　　　

而我一定唔會再嚟! 認真怕怕lu...

 

從來都未嚟過一間咁差勁的食店!

容龍海鮮酒家 屯青山公路19咪半  Dragon Inn Seafood Restaurant 19.5 Miles, Castle Peak Road,, Tuen Mun

電話 : 2450 6366