慢慢的好起來

終於都食哂啲藥了

咁我個口腔就會開始慢慢的好起來

大家都知我係痱之王嚟嫁啦

咩有人會生痱之生到好似我咁

可以生到幾十粒

對於生痱之的經驗

我諗我會敢認第一囉

最近個口腫哂

少爺話搵到資料顯示

原來牛奶可以冶療到

所以少爺琴晚放咗學買咗啲牛奶比我

今日起身, 一於飲吓先

哦...又咪話唔神奇喎

真係飲咗個口舒服好多喎

無咁痛, 又無咁苦, 仲可以食到嘢, 講到嘢囉

嗱...第日你哋邊個生痱之, 記得飲牛奶呀...

 

報告一吓, 個身體比你哋知

琴日開始, 子宮無出咁多血了

所以個人都無咁虛

正常番囉

胃口方面, 都依然係無咩胃口

因為成口都腫哂又生哂痱之

因為開始唔駛食藥了

所以精神咗好多

不過都係比較容易攰

但係瞓得多, 個人啲骨頭就有啲痛

同埋有時個頭, 都會有輕微的頭痛/暈, 不過就係輕微

所以每做一樣嘢, 都唔可以咁專注

例如: 睇雜誌, 睇多一頁, 就要休息, 對眼同個頭會開始比啲反應你

你係時候抖抖, 唔可以再睇.

睇電視都一樣.  琴日因為太悶, 叫咗媽咪陪我出去行一陣,

又係囉, 只可以行一陣, 行到咁上下, 要坐一陣休息吓, 唔可以再行住

行的時候, 又唔可以行得太快太急, 如果唔係又會頭痛/暈.

打電腦又係, 打多兩打, 又要抖抖, 睇多兩睇, 又要抖抖先可以繼續.

 

休息埋下個星期, 再下個星期就要返工

唔駛講, 一定勁多手尾做

不過我會慢慢handle番, 唔會急

我話鬼知我老闆呀....我唔會咁笨嫁了.

 

破產

前晚同阿哥諗住好好咁商量

同佢講長遠計都唔係辦法

問咗做律師行的朋友仔---阿sam兄

我哥可唔可以申請破產

sam兄話, 可以. 你同你哥商量好,

如果真係的話, 搵我啦.

 

夜晚打比阿哥, 我當然知我哥的脾性

要用軟功的, 硬功只會令佢反效果

本來同佢都講得好好地

跟住比咗老公同佢講

見老公同阿哥的對話

就知死梗了...

我明白老公係好忟憎我阿哥

我亦知老公其實係好嬲我阿哥攪到咁

而要我呢個老婆咁勞氣

我知老公痛鍚我, 個心好肉痛我呢個老婆仔

但見唔對路, 我咪攞番個電話

諗住同阿哥傾

點知...阿哥一輪咀係咁x y z, 發哂脾氣

我反而禁低自己的脾氣

用好溫和的態度同佢講

哈....佢都仲係好嬲喎...係咁x y z喎

係對話當中, 我就唔係成日搭佢咀

不過聽到一啲佢比較過份的, 我都動咗氣

之後佢就斷咗我線添...

 

收線之後, 我就同老公講

你咁樣同佢講嘢, 只會反效果

我唔係要你低聲下氣同佢呢啲人講

只係唔好再怪佢

而家大家都係想諗辦法啫

我哋而家唔知佢住係邊

一間佢連電話都唔聽

我哋又搵唔到佢

咁咪仲難攪

我哋而家無非都係想佢去攪破產啫

若果佢發起脾氣上嚟

佢真係咩都唔攪

咁就仲麻煩

老公今次好叻叻, 佢見我咁講

無嬲我, 仲用手拍拍我的手背

話我都知的, 我都明白的

我知老公真係鍚到我好濃

老公真係愛屋及烏

佢不但愛我, 理我感受,

就算even而家講句老實話

係我阿哥有事呀

係我阿哥攪出呢啲咁的蘇州屎呀

老實講, 有啲男人/老公

可能好自私咁, 又唔係自己阿哥, 又唔係我欠債

可以咩都唔理

但係老公真係好好, 咩都幫我攪哂

就算同我阿哥阿嫂傾到好勞氣

佢都係叫我唔駛擔心, 唔好怕

愛屋及烏呢家嘢, 真係唔係人人都做到

老公我知你都受咗氣, 都受咗委屈, 但你仍然對我屋企人咁好

咁包容, 咁體諒.  感謝您!

 

前晚同阿哥傾到咁火

琴日我無打比佢

想佢下咗啖氣先

今日趁媽咪出咗去買嘢

我即刻打比阿哥

第一句問佢, 嬲完未呀, 下咗啖氣未呀.

阿哥就話, 無嘢啦, 佢話其實我呢個阿妹點話佢都好,

佢都唔會出聲, 因為佢知係佢自己唔啱, 加上佢知對我唔住.

不過我答佢, 你無對我唔住, 你只係對你自己及個仔唔住啫.

我身為你妹妹, 我只係希望你可以重新做人, 重新開始,

為咗個侄, 我先幫你, 唔係為咗侄仔, 我鬼理你. 因為侄仔係無辜的.

我亦唔想你哋一家人分開, 似咩啫.

同佢傾咗我諗差不多十分鐘左右啦

問佢考慮攪破產好唔好好?

佢話既然無其他辦法, 真係ok的, 就叫我幫佢攪.

咁就得了....

我會搵sam幫忙的.

再問清楚佢, 有無借出面果啲黑市的財務公司

佢話真係無, 只係借咗銀行

咁我解釋比佢聽, 借銀行同借大耳隆係差好遠, 有好大分別

若果係借銀行, 就好攪好多

但係若果係大耳隆, 點死都要死啲錢比佢哋

同埋真係會攪出人命

聽到佢咁講, 我都無咁驚, 起碼唔係借大耳隆

今晚等老公放學返嚟

再同老公傾吓下一步點處理了

覆診@睇報告

講個好消息比你哋聽, 琴日去咗覆診, 陳醫生話個傷口好靚, 無發炎, ok.

同埋份化驗報告出咗, 暫時睇唔到係癌症, 唔駛擔心.

不過因為有啲細胞腺體都係睇唔到,

但係以佢的經驗及觀察, 都應該唔係癌症,

但係佢話最好每6個月就要將入面的細胞化驗,

以確保無事. 但佢有講, 因為我的子宮頸今次都切咗好多,

所以要好好休養,

同埋第日有bb, 真係要好小心, 因為會好容易流產.

同埋陳醫生同我老公講, 話我的扺抗力好差,

好番之後, 一定要做番運動同埋食番啲維他命c,

見完醫生後, 係出面坐等比錢時

老公就同我講, 佢話都係佢唔好,

以前老婆成日都做運動, 飲食習慣都好好

跟咗佢之後, 連帶運動都無做,

老公話, 聽到醫生咁講,佢好驚喎, 佢話等我好番哂,

真係要同我好好計劃做運動

佢話唔可以再咁樣比我身體咁差

唉....男人呢...真係要到有事先會知驚的

 

睇完知道唔係癌症就放心哂了.

病假放到23號, 24號星期一返工.

 

個心輕鬆咗好多

我諗過了, 身體係自己的

癌症係好多時都係個人唔開心而出嚟的

我都係要好好保護自己

無論咩事發生

我要好好學識平靜, 唔好咁激動, 咁上心

輕鬆啲面對囉...

唔係到時攪到自己有病

咪又係自己辛苦之餘

仲要埋愛我的家人及朋友擔心

 

放心啦....大家

我識諗嫁了

我心情好咗好多lu....

謝謝您們一直在我身邊, 無放棄我, 無離棄我.

 

食藥食到成個口都腫哂.....

唉....把鬼lor

食到星期一, 5月3日夜晚

個口腔即時feel到兩邊腫哂

入去照鏡, 開口睇...oh..

兩邊口腔腫哂, 連啲牙肉都係

條脷仲起哂花邊

咀唇生哂痱之

原來啲藥而家開始發出嚟

想屎....

攪到我無哂胃口, 咩都食唔q到呀

連帶嚨喉都痛埋呀

飲水又痛, 食嘢梗家唔駛講啦....

唔想出聲, 唔想講嘢

無哂心機....成個人都好唔開心呀.

唉...以我的經驗, 起碼都要成個幾星期先會好

而家晚晚都早晚或者無嘢做時

就用一匙鹽直接放入口到囉

無計, 痛係好痛嫁, 不過反而會紓緩到一陣囉

今日好好咁休息咗一日

心情明顯好過之前

平伏咗個人, 係會好啲的

聽日就要覆診了

要睇報告了

我反而無咩特別緊張

算啦, 唔諗了, 打到嚟先算了

反正諗都無用

係咪先.

幫手

因為蕭c奶有私事要處理

所以早前的新居裝修暫停

私事未處理好

不過都唔想再遲了

所以同咗少爺商量

請老爺出手幫忙跟一跟裝修

 

星期一, 少爺放工約咗老爺到新居

少爺交低咗個地同個wall比老爺幫忙跟一跟

呢個星期四, 就約番裝修師父上嚟

就等老爺跟了

多謝老爺啊...要你老人家咁老遠走嚟跟裝修

但係我知老爺明白的

佢都知我哋發生咩事

咁就好了, 有老爺幫吓手

我會放心啲, 又少咗一樣煩事先

好攰囉

星期一, 五月十日, 奶奶放假

一大早突然聽到開門聲

起身望吓...以為係媽咪

點知原來係奶奶

奶奶仲話, 我巳經專登好細嫁喎

咁都嘈醒你.

其實唔係奶奶嘈醒我, 只係我都無瞓過

不過我開始眼瞓, 奶奶去洗手間

咁我同佢講, 我好攰, 我想瞓

佢話, 係囉..你瞓啦

跟住我就即刻打比媽咪

同媽咪講聲奶奶過咗嚟

跟住我上咗床瞓一陣

聽到奶奶出問聲

我無問奶奶去邊, 我估佢係唔想嘈到我, 所以走先啦

之後過多半個鐘左右

今次真係媽咪嚟到

媽咪問奶奶呢, 我話唔知呀, 佢可能唔想嘈我, 出咗去行吓掛.

跟住我就打比奶奶, 問佢係邊

佢真係去咗樓下行吓

我話, 媽咪嚟咗, 你上唔上嚟

奶奶話, 好呀, 咁我買少少嘢就上嚟啦

跟住奶奶同媽咪就係咁傾

又叫我小心啲, 放心, 好好養好身體

跟住我見佢哋咁好傾

我就自己煮咗個粉及灼咗啲菜比佢地食

跟住我又開始攰了

我就都唔鬼理佢哋兩個老人家了

我話...你哋慢慢傾啦, 我想休息

咁佢哋就話, 好啦好啦, 你去瞓吓啦

跟住....唔知幾點佢哋就一齊出咗去了

 

其實唔知係咪日日都係屋企

無出過去, 個人無咩精神咁

總之就係好攰囉

唔係瞓床 , 就係食, 坐唔得幾耐, 又想攤係床到抖吓

日日都係咁, 好悶

好想返工嫁, 起碼可以分散吓啲注意力

等個人唔駛成日係屋企到亂諗嘢

不過都無精神又攰, 都唔知點做嘢

返到佢公司, 成日都要左走右走, 又要搬嘢

咁的體力, 點鬼做啊....

唉...都係好好甘為自己身體打算

盡量唔好諗太多.

在家休息

老公而家返五日工作

星期六唔駛返工了

不過因為早前老公的手機有少少問題

攞咗去維修

琴日手機公司打嚟話維修好, 可以攞走

老公今日都只係可以瞓到十點左右

就要出荃灣攞手機啊...

 

而我咪係屋企到休息吓

個人好似無咩

不過就唔知係咪藥物的影響

好似好攰咁, 要成日瞓瞓瞓

等到老公返嚟

我就煮飯食了

食完咪又攤係到

 

但係到咗夜晚

突然覺得子宮果度出咗好多血

由做完手術到出院的呢兩日

都好少血嫁喎

即刻入洗手間望一望

嘩...好多喎....好似平時經期嚟咁多

坐坐吓, 你會feel到佢流出嚟

個心有啲驚

巳經食緊啲止血藥, 但點解都仲有咁多

加上係突然喎

老公見我面色唔係幾好

又見我好似仲攰過頭兩日

問我咩事

我就話佢知, 多咗血

跟住老公話不如打比陳醫生問問

但係我話, 不如睇多一陣先啦

到咗再夜啲, 都係有血, 不過就唔係話之後又多咗

咁我話, 睇埋聽日先啦

 

到咗第二日, 星期日

發覺都係仲有好多血

老公就打比陳醫生

問清楚, 陳醫生解釋, 因為呢啲手術唔係話有連針

做子宮刮宮手術電死咗個色肉及刮去壞去細胞

係無得連針, 做完手術的兩三日係無咩血出

反而係之後, 就會開始出血, 係正常的

咁我問呢個出血情況會大約維持幾耐

陳醫生就話, 都要兩至三個星期

我話...吓...咁耐呀

陳醫生再問, 因為我唔會知你平時係有幾多經血,

所以比較唔到你係咪好多, 不過咁, 你呢幾日, 每日用咗幾多塊衛生巾?

咁我答: 大約三塊左右.

陳醫生就回答: 咁都係正常, 唔駛驚.

跟住我又問, 咁我瞓覺時, 側瞓得唔得?

陳醫生話: 咩姿態都得.

咁我話, 好啦, 唔該陳醫生, 咁我問清楚無咁驚.

之後就收咗線了.

 

唉....個心係定啲

不過咁多血, 好鬼煩呀

一feel到佢出血的時候

就覺得個身體就會弱咗好多

個人好似無咩力氣咁

又可能因為心情唔係幾好的問題啦

但點都好啦, 問咗醫生都係定啲的

 

之後咪成日都瞓瞓瞓

其實有時係瞓唔著嫁

但又唔鬼知點解會覺得個人好虛咁

好攰, 又好似無咩力

咪係張床到攤吓囉

 

到咗下午, 蕭家姐嚟咗探我

傾咗好耐, 多謝蕭家姐的問候及安慰

叫我唔好咁擔心屋企的事

亦都唔好亂諗嘢

唔好成日亂諗好似欠咗我哋蕭家咁

大家一家人, 有事梗係會幫啦

最緊要係好好咁養身體

咪都假, 你大佬的事一定要方法解決的

慢慢嚟, 唔好急.

聽到蕭家姐咁講, 我梗係又喊啦

不過跟住老公出去買嘢,

返咗嚟, 我就即刻收聲

唔想比佢見到

 

蕭家姐坐咗一陣就走了

跟住我哋倆個就煮飯食

不過未食之前, 收到媽咪來電

話有兩個追佬嚟咗

搵阿嫂的

媽咪咪話唔識呢個人

個倆個人仲兇我媽

你唔好話唔識呀, 係咪你啲親人呀

你係咪叫陳xx呀

我媽聽到對方知自己叫咩名

好彩媽咪夠冷靜及轉彎

答番佢哋, 咁間屋係我的, 我係到住到幾十年,

你去田土廰到一查都查到我係屋主啦, 你梗係知我叫咩名嫁.

總之而你搵呢個人, 佢係要報我地址, 我都無乎嫁.

跟住佢哋話 , 你打呢個電話比周生, 同佢講啦.

 

就係咁.....呢一晚, 我同老公從未識過食唔哂啲飯餸

但係我哋兩個都無胃口

即刻打比阿哥同阿嫂問清楚

不過...咪就係一句, 唔駛理佢哋, 佢哋唔會做啲咩嫁...

就係咁, 成晚兩公婆都無攪好瞓

之後, 都係怕媽咪及侄仔有事1

就叫咗佢哋明天開始過嚟我哋呢邊到住

呢一晚係咁攬住老公喊喊喊

我又忍唔到了, 又要老公為我擔心

我亦知咁樣, 我會好傷身

我知我唔應該咁, 因為而家咁樣

會對個身體唔好

但我真係控制唔到