忙忙忙, 諗諗諗, 溫溫溫

蕭c奶呢排比較忙

日間忙於公務

中午忙於溫日文

放工忙於煮飯, 家務及看書

坐車又忙於溫五十音

有時個腦又忙於諗新屋的裝修

oh.....2010年又開始忙忙忙, 諗諗諗, 溫溫溫

而且2010年更是要用很多很多錢的一年啊...

 

日文生涯

終於都同少爺開始咗我哋的日文生涯

只係400蚊，報咗係工聯會到學， 係元朗分校

逢星期三，晚上八點四十分至十點十分

初級的日文，係無會話，簡單的會話可能都未必有啊。

只係讀五十音，平假名，片假名，羅馬音。

而家好似啲BB咁，要寫COPY BOOK，

要狂背，狂寫，狂讀。。。。。

根據幾位學過日文的師姐比我的意見

只要五十音的基本工夫，肯花時間及心機，讀好佢

咁之後就可以上手啲學日文嫁了

好。。。一定要聽幾位師姐的意見

我同少爺要努力啊。。。

上星期三係第一堂，教咗十五個音，

話讀都容易啲，話但係啲音的日文寫法，

真係要狂練習寫，同埋認字囉，

真係好鬼似嫁。。。嘻嘻

嗰幾位師姐，啲日文超勁，

可以做教師都得，佢哋學咗五至六年

而家仲有上堂KEEP住啲日文嫁

真係學海無崖。。

其實少爺真係好聰明，

佢只係聽咗老師譾幾次，

佢就巳經識讀，識寫了，

而我。。。比較笨啊，所以要死記爛記

好友謝住任，原來都報番讀日文嚟溫書

謝主任本身以前都讀過日文的

而家佢都想讀番好啲

YEAH。。。一齊努力

希望將來我同少爺都識講少少日文時

大家又一齊去日本旅行啊。

好似發夢咁

人生第二頭獎, 真不敢相信發生在自己身上,

好似發夢咁.....多謝上天的眷顧, 感恩, 感動!

 

聖誕時, 抽到頭獎

是一部 i phone 8G

開心到不得了

因為一直都無抽獎緣份

咁大個女未試過

超級興奮!

 

呢一種興奮仲未退

就接著有第二份頭獎到來

真係真係不敢相信

天意..天意....

 

琴日收到房屋署的信

我同少爺終於都抽到公屋了

yeah....

其實最驚喜的係

原本打咗去問房屋署問過

今年我大多數係抽唔到公屋的

當時聽到梗係有啲失望啦

但係抽唔到都無計嫁!

但係真係好驚喜, 居然係抽到呀...

興奮到我哋倆公婆

好似中六合彩咁呀.

 

 

點解咁想今年抽到

因為今年我哋擇的公屋

除咗係新興建的公屋, 係新族族外,

主要係地點好鐘意

第一 .....擇藍田

第二 .....擇石門

第三....擇秀茂坪

 

我同少爺及媽咪及奶奶

都分別一齊去過呢三個地點

藍田係最正, 係最鐘意

因為交通方便, 配套做得好好

最重要係近藍田地鐵站, 勁方便

仲有吉之島超市, 街市, 商場

加上新建的藍田邨的位置

又好開揚, 所以梗加鐘意啊...

 

琴晚即刻返媽咪到攞信

然後帶住封信返去屋企

同少爺一齊拆信

少爺打開咗封信

佢勁開心, 碌大雙眼

同我講..老婆..老婆

我哋抽到係....藍田呀....

嘩...嗰一刻, 心諗...唔係呀, 真嫁

真係有啲唔信

我即刻走去攞封信

碌大對眼望真啲...

真係呀.....嘩...上天真係對我好好

以為無咗的嘢

好似得而復得的感覺

勁開心....即刻打比奶奶及媽咪報喜

亦都打咗比幾位朋友仔

因為太夜, 所以有啲朋友都未能即時報喜啊...

 

今日真係勁happy

因為confirm媽咪無事

然後同媽咪及少爺高高興興

一齊去攞聖誕頭獎

及

出去藍田邨睇吓個單位的方向及環境

 

confirm媽咪無事

今日早上十一點, 收到私家醫生來電,

 醫生睇咗媽咪份報告,

話我哋唔駛擔心,

因為報告顯示:只係媽咪的骨有退化,

唔係癌細胞! yeah.....聽到張醫生咁講,

confirm唔係,

真係好呀. 有張醫生咁講, 咁就係放心哂呀.

 

實在太好, 多謝上天及各位的祝福.

 

 

攞報告

星期二 (5/1/2010) 陪咗媽咪去做p.e.t. scan,

星期三(6/1/2010)早上, 媽咪打比我,

話有得攞報告了....(咁快...個心又有啲驚)

因為琴日先去做, 今日晨咁早就通知有...

個心又亂諗...唔通真係..真係有癌細胞!!!

 

不過點諗都好, 都係要去攞嫁啦...

一於唔駛諗, lunch time飯都唔食, 即刻搭地鐵去攞報告.

攞咗份報告返嚟, 即刻fax咗去私家醫生到先,

不過私家醫生未覆我. 攞咗報告返嚟,

 叻叻及millia小姐分別都幫我初步睇咗個結果,

應該唔係癌細胞, 反而可能係媽咪啲骨退化.

而且叻叻仲幫我睇哂成份report, 以佢有限的醫學英文,

份報告話媽咪由頭, 頸, 心, 肝, 脾, 肺, 腎, 所有器官都正常

最重要有一句係:

第五節尾龍骨的陰影, 反而係退化多過係癌細胞

話一講到呢一句重心, 成個人鬆哂

叻叻及millia小姐話睇唔到係唔好嘢, 咁我即時都安心好多.

不過佢倆位都話, 佢哋唔係專業人仕,

只係表面咁睇係無事. 咁我都會等埋醫生詳細的分析先.

後來may姐都幫我睇, 佢都係同叻叻及millia小姐一樣

都係話見唔到唔好嘢.

多謝叻叻, may 姐及millia呀, 以及多謝各位的祝福!

 

咁我都即刻打個電話比媽咪

講比媽咪知叻叻佢哋睇咗份報告

解咗比我聽, 我咪同媽咪講

唔駛擔心咁多, 應該無問題

等媽咪都唔駛呢幾日個心囉囉攣

咁當然都係等到14號返去

聽醫生講一次, confirm先, 咁個心要安定啲.

我的2009

我的2009

 

2008年因為無時間, 所以一直好想將每年所發生的事記下來

都無做到. 今年2009年了, 時間過得好快, 快到我都唔想咁快, 因為太多太多嘢我都仲未完成, 亦都好多事我都處理好. 不過, 時間係唔會等人的, 只有反思自己做事太慢.

2008年年尾至2009年9月

媽咪證實患有乳癌, 亦作出適當的治療, 雖然當中大家都好唔開心, 亦都好驚, 不過到咗最後, 因為一家人努力, 樂觀, 朋友的支時, 祝福, 媽咪到最後都捱過咗呢一次的難關.

亦都因為媽咪患癌, 令到阿哥有所改變, 起碼開始懂得關心家人, 當然都係未合格啦, 不過阿哥有少少改變, 巳經令到媽咪及我開心到屎了, 希望來年阿哥進步多啲, 就好了.

亦都因為媽咪的病, 令到我又成長咗, 睇嘢唔同咗, 心態又唔同咗, 更加令到我覺得要珍惜現時所擁有的一切.

2009年3月

踏出咗人生第一步...就係由多年的長捲髮look, 變成短頭髮, 之後仲變成短直look添.

仲有就係做咗一件叫做 '321'的事件, 係好有意義的.

2009年4月

阿哥一直以來都唔係好多陪媽咪, 今次令到我又好開心, 因為阿哥主動提議一齊去行山, 真係好, 呢種感覺實在太滿足太幸福了, 雖然我知唔係時時會有, 我只在乎曾經擁有.

2009年5月

蕭家姐榮升業主, 好替家姐高興, 雖然我同少爺都好想擁有自己的安樂窩, 但係見到自己的家人擁有, 成功成為業主, 我都好開心. 我同少爺都要努力啲先得.

仲有就係好友'哥哥'升職呀, 真係替他高興呢, 若果另外三位好友, 蕉蕉,謝主任及叻叻都係, 咁就仲皆大歡喜啊.

2009年7月

好朋友'luk ling'一家人搬咗去新居, 仲要係村屋, 好戥佢高興, 亦都希望佢生活開心.

2009年8月

整理好另外一個房, 比媽咪一個驚喜, 搬入嚟同我及少爺一齊生活. 希望可以多啲見到媽咪及好等媽咪同少爺相處吓.

多年來一直都好恨一家人去旅行, 尤其係可以同到阿哥一家三口, 一齊去. 雖然今次我哋唔係去坐飛機個種旅行, 但係今次我哋一家人成功可以一齊去咗兩日一夜的澳門之旅, 巳經令到我開心咗好耐, 亦都令到我好滿足. 當然..若果有埋老豆仲最好...不過...那怕要再長啲時間比大家了. 但係點都好啦, 我都好滿意嫁了.

2009年9月

好友'叻叻' 升職, 一直都等咗呢個好消息好多年, 一直都好想見証叻叻升職, 終於等到了, 真係好替叻叻高興呢, 如果下年可以見証埋佢榮升業主的話, 我呢更加開心了.

好友cherry 新居入伙, 抽到居屋, 仲要向海景添, 希望快啲飲到佢個喜酒, 然後再睇埋佢生仔, 咁就好lu...

2009年10月

夾到時間, 可以同好友'蕉蕉'及謝主任一齊去咗十日沖繩自駕遊. 由於好耐都無一齊同蕉蕉去旅行, 加上各人放假都難, 有次同蕉蕉傾開, 趁大家都未有bb, 真係覺得大家就到時間的話, 好想一齊去relax一吓. 加上同少爺拍拖至結婚, 都未同我去過超過五日的旅行.一直又好恨可以同少爺去長啲時間, 今次除咗少爺難得有假, 仲可以夾到蕉蕉一pair, 勁開心呀. 仲要係我恨咗好耐的自駕遊添.

2009年11月

11月2日收到少爺送給蕭c奶的生日禮物, 就係少爺今日去考車牌, 路試pass咗呀, 不過泊位就肥咗, 但係我都好開心呀, 努力呀, 少爺出年年頭考埋泊位, 咁我哋第日可以自己自駕遊lu...

一直陪咗我幾年的數碼相機仔, 終於陪完我去沖繩旅行之後, 壞了. 咁我就買咗一部新相機 --- CANNON G11.

終於的起心干, 報讀了學日文, 而且少爺都陪我一齊報讀添, 一齊努力啦.

咁多年嚟亦都未試過參加百萬行, 首次同少爺及好友叻叻一齊參加咗呢個咁有意義的活動.

好友dada的奶奶發現有癌症, 為朋友擔心, 因為自己都經過這樣的心情, 只好默默祝福她們及支持她們.

同時亦都得知好友'經理'的爸爸入咗醫院, 都希望世伯平安無事啦.

2009年12月

好友'陳米米'書店開張, 替她高興, 祝願她生意興隆, 一本萬利.

收到朋友的喜訊, 有咗bb, 替她高興.

另一個收到同事monica榮升業主, 又係替她高興.

同時亦收到阿e的好消息, 都係榮升做業主呀, 咁我呢位姨生女當然有受惠啦, 就係可以去會所到玩呀.

一向都無抽獎緣的我, 竟然可以係李國能法官手上接過頭獎, 獎品係 i phone 3G, 8G版, 開心到飛起.

同埋都知道大姑姐做咗手術, 手術好成功, 希望姑姐早日康復啦.

開心事過後, 無想過係2009年12月31日, 醫生發現媽咪的尾龍骨第五節, 照到有陰影, 但係唔知係咩, 唔肯定係好事定壞事. 不過點都好, 係2009年的最後呢一日, 我哋一家都好安靜咁渡過呢一日, 準備迎接2010年.

係呢一年, 有起有落, 但係當中所發生的事, 無論係好事定壞事都好啦. 我的心情都係正面的. 其實2009年定咗好多目標都未完成, 或者係自己太懶散了. 2010年真係要好好咁把握時間及機會, 好好咁完成自己的目標.

係新的一年, 我祝願大家

平平安安, 身體安康,

珍惜, 感恩, 快樂!

那怕要再接受一次挑戰

話說媽咪於12月22日冬節, 返回屯門醫院覆診

醫生問: 你有無咩特別邊到唔舒服呀?

媽咪答: 咩都無, 只係左手, 手臂有時會痛, 好似有針吉咁的痛, 又唔係成日痛嫁喎,

               一時時痛囉. 醫生, 咁樣有無問題嫁.

醫生回答: 嗯, 呢啲係做完手術後正常的反應, 唔駛擔心.

媽咪就再問: 但係我都係好擔心喎, 會唔會有啲咩事?

(當時醫生見到媽咪咁擔心)

醫生就話: 咁啦, 如果你咁擔心, 不如我幫你安排去照一照, 好唔好?

媽咪就答: 好呀, 照吓啦, 安心啲.

就係咁, 過多兩日, 就係24號平安夜那天, 媽咪就返去屯門醫院到照吓了.

之後25日, 聖誕節, 我同少爺及媽咪三人返去鄉吓探望婆婆, 而媽咪諗住今次留係婆婆到, 住到過咗新一年, 即係2010年1月3日先返香港.

就係12月28日, 我如常返工, 係下午的時候, 收到屯門醫院腫瘤科的護士來電.

對話如下:

護士問: 請問係咪陳xx的家人呀?

我就答: 係呀, 唔知咩事呢, 護士?

護士答: 醫生想約陳女士明天, 即係12月29日下午返嚟屯門醫院到見一見醫生.

我就回答:  吓...唔好意思呀, 護士, 我係陳女士個女, 我媽咪而家唔係香港, 返咗去鄉吓喎.

護士就問: 咁請問陳女士幾時返呀?

我就答: 聽日比較急喎, 我要今晚先通知到我媽咪, (而且當時個心, 唔想媽咪咁急咁的心情) 護士呀, 可唔可以改遲兩日呀.

護士就即刻好快答我: 咁呀, 31號啦.

咁我即刻回答: 好呀, 但係護士我想問吓, 點解突然咁急call我媽咪返去見醫生, 係咪有咩事發生咗呀?

護士就回答: 咁呀...我都唔係好清楚, 因為係醫生叫我打嚟約你媽咪的. (咁當時真係唔知個護士係真唔知, 定係假唔知, 又或者係因為私隱的關係而唔可以透露比我聽)

咁我回答: 係呀, 咁....咁...唔緊要啦.

跟住就掛線了.

就係咁....隨即個心當然係好唔安心啦, 大老細當時咁橋係我前面, 所以佢聽住我當時的對話, 即刻都有問咩事, 唔係有事呀嘛. 我咪答, 唔知.

之後, 細老細鄧小姐, 都知, 佢好好人, 即刻叫我31號放假, 但係可惜每逢年尾的31號, 最好都唔好放假, 因為要入數. 我就同鄧小姐講, 唔緊要啦, 到時或者叫我哥哥陪媽咪啦.

但係成個下午個心都好唔定, 個腦又係咁諗, 咩事呢, 咩事呢....

加上通常醫院無事係唔會打嚟的, 而家咁急call, 一定係唔好啦, 盡管身邊同事, 朋友的好話, 安慰, 好老實講, 大家心知啦, 當然我知大家都係想幫我減輕不安的情緒, 係到好多謝你哋. 不過, 我都巳經諗定咗啲方案嫁了, 唔好好, 就係唔好嫁啦.  點都好, 若果結果係無事的, 咁無需多講. 但係若果結果不如意, 咁都要繼續樂觀去面對及理智冷靜地處理.

但係成個下午都好唔安心, 最後我諗吓諗吓, 都係唔放心, 都想陪住媽咪一齊去見醫生. 所以最後我就同大及細老細講, 我都係需要放假, 不過我放下午, 我上午完成有關的入數工作. 而且真係唔好意思, 因為自己的事, 我出咗一個電郵比各位同事, 同佢哋講所有入數的事, 請大家係上午12點前交到, 對於呢個改動, 不便之處, 敬請原諒了.

 

終於到咗今日見醫生了.

醫生講: 呀, 陳女士上個星期同你照咗, 發覺你話左手臂的痛, 反而照唔到有咩問題. 但係, 反而我哋照到你尾龍骨第五節照到有個陰影, 而呢個陰影我哋而家睇唔清楚係咩, 照唔到, 所以想你去照p.e.t. scan, 照清楚啲.

咁我哋就問: 咁係咪即係有唔好的意思呀,醫生.

醫生答: 因為陰影有可能係癌細胞, 我哋怕係有癌細胞走咗去你媽咪的其他身體部位, 所以要佢照清楚, 等知道係咩嚟. 苦果係無嘢, 咁當然係好. 但係, 若果出咗個結果係唔好的, 咁都可以盡快做出適當的治療, 及早解決.

咁我哋就回答: 咁又係.

然後醫生就幫我哋book埋出去私家醫院到再做一次p.e.t. scan.

然後我哋就離開咗醫院了.

途中, 我發覺我哋倆母女都無喊, 又無話好唔開心, 咁大家心裡面當然係有諗啦, 亦一定有擔心. 不過, 我就同媽咪講, 唔好諗咁多, 反正諗都無用, 照咗出嚟先算啦, 有啲嘢打到嚟先算lu...之後就一齊返屋企了.

各位朋友仔, 真係放心啦, 最難過的頭一關, 媽咪都過到, 若果真係唔好彩,

我哋都唔會怕, 唔會埋怨, 亦都唔會唔開心,

反而仲要比前更加強, 更加樂觀, 更加平靜咁去面對.

不過咁...我當然唔客氣, 都請各方好友繼續支持及祝福媽咪.

好等我媽咪可以平安渡過.