午茶時光

 

2009年7月15日（星期三）

 

蕭C奶琴晚又整香蕉MUFFIN

因為呢堆同事未食過呀

終於都可以整到比你哋品嚐了

 

哈哈。。同事阿慶唔LIKE出鏡喎。。所以蕭C奶幫佢攪到咁的鬼樣。

睇吓。。。有頭髮嫁。。呵呵

而呢張阿慶個樣係眉眉咀咁笑。。呵呵。。

無頭髮的。。

而呢張畫到個哈哈笑好大呀...

 

快快手送咗啲MUFFIN

影埋相留吓念

工作時有時都要少少輕鬆吓的

吃過美味的香蕉MUFFIN

做嘢都快手啲, 醒啲啦...

老細應該唔會炸型掛...係咪

 

多謝你哋幾位賞面呀!

下次又整第二樣比你哋食啦.

白蘿蔔煲咸豬手湯, 蕃茄煮紅衫魚, 蒜茸炒勝瓜

 

2009年7月15日(星期三)

 

蕭C奶今日好開心好開心

因為工作又完成了好幾樣

呢個星期好鐘意返工

實在太自由太舒服了

唔好以為老闆不在

蕭C奶會偷懶唔做嘢

錯了..反而增加了工作效率

更加專心工作

放工不用趕著回去煮飯

因為有愛心晚餐之媽咪煮意

媽媽煮意:

白蘿蔔煲咸豬手湯

 

第一次飲呢個湯, 就係媽咪煲比蕭C奶品嚐,

記得第一次飲完, 愛上它了, 十分喜愛,

呢個湯除咗好飲, 仲有好好味的白蘿蔔及咸豬手啊

咁就有湯飲之餘, 仲多咗一個餸添....

 

蕃茄煮紅衫魚

蕃茄蕭C奶一早買定, 最愛煮紅衫魚, 因為好味囉...嘻嘻

媽咪煮的梗加好食十倍啊....

蒜茸炒勝瓜

蕭C奶最愛這瓜, 愛它清甜及爽口啊...

 

食完飯....蕭C奶又趕住開工呀...

唔係做freelance呀...

係整cake呀...

實在有太多 '粉絲' 等食蕭C奶的homemade cake呀...

(真係唔知個醜字點寫..不過識打囉...)

唔講住了...開工呀...

再見!

貪心

 

最近蕭C奶很貪心

因為太多嘢想買了

新相機

新netbook

新蛋糕工具

新廚房玩意

新家居用品

等等等等

 

仲有好多嘢想學

學車

學日文

學烹飪

學番彈鋼琴

 

更加想

去旅行添呀...

 

oh.....太多太多...

但是現實的是

需要很多money及時間呢....

 

想了又想

少爺要加十倍努力賺錢

蕭C奶要二十倍努力儲錢

這樣才能實現以上的欲望啊...

黑椒香草牛仔骨配Sukiyaki Sauce (內附食譜) +豆角炆鯇魚+節瓜滾咸蛋廋肉湯

2009年7月14日(星期二)

 

蕭C奶今日好開心

因為工作的進度好好

完成咗三樣的工作

聽日又要繼續努力呀...

大家最近有無收到有關crabtree evelyn的問題啊

聽聞話crabtree evelyn會close好多間分店

可能財政或生意唔夠啊..

有朋友仔話如果手頭上仲有禮券的

要盡快用咗佢喎...

嚇得我呀....今日就去咗買咗幾樣嘢

因為之前結婚時, 朋友送了一張500大元的現金禮券

一直都好想買嘢, 不過一路都睇唔啱之嘛...

但係而家傳得咁勁, 都係快快手買咗佢

好過到時呢500元變咗廢紙

蕭C奶好叻叻呀...因為剛好買到500元,

一毫子都不用補啊....嘻嘻....

唔駛錢但又可以shopping

實在係一件好美妙的事啊....

放咗工, 當然返屋企啦..

落咗車諗住去街市到買個洋蒽返去煮

點之撞到媽咪....

點解媽咪係到呢? 原來佢嚟攞啲嘢趕住比阿姨喎

媽咪仲話幫我煲咗飯, 滾咗個湯, 仲煮咗個餸添...

哈哈...蕭C奶又慳番好多工夫了

不過因為今早將啲牛仔骨放定係下層雪櫃到溶

所以都要煮埋佢呢

好彩少爺係帶飯啫...

 

黑椒香草牛仔骨配Sukiyaki Sauce

蕭C奶再戰牛仔骨，因為之前試過整，唔好食，又韌又咸，

掌握唔到煮牛仔骨的方法，

蕭C奶梗係唔憤氣啦，一於試整。。。

終於都煮到了，不過蕭C奶覺得仍有進步的空間

因為都覺得韌咗啲啲，係真係啲啲，點樣可以做到鬆啲呢。。。

各位。。請多多指教呀。

材料：牛仔骨

醃料:  香草，黑胡椒 (適量)

汁料: 日本酒, 日本麻油, 豉油, Sukiyaki Sauce (適量)

 

做法： (1) 牛仔骨解凍，抺乾後,  用刀背拍鬆牛仔骨肉及切件

(2) 用黑胡椒及香草醃20至30鐘

(3) 燒熱煎PAN, 加入油, 放入巳醃的牛仔骨, 每邊咯煎轉色,

記著不要煎得太耐及太熟, 因為會韌

(4) 煎至兩邊轉色後, 加入日本酒,麻油, 豉油

及Sukiyaki Sauce 炒勻, 即可

(5) 上碟後, 可按個人喜好, 再加黑胡椒才吃.

 

如果有埋洋葸仲好呀......如果你哋加埋洋葸, 就係第3個步驟時,

燒熱PAN後先炒洋葸至軟身, 才加入牛仔骨. 其後步驟一樣, OK.

 

媽咪煮意：

節瓜滾咸蛋廋肉湯

最愛媽咪的靚湯，唔之點解媽咪滾的湯真係好鬼屎好飲囉。。

而且仲好夠料添呀。。。

豆角炆鯇魚

其實蕭少爺同蕭C奶唔係好LIKE豆角類，

不過唶，煮到嚟我哋都會食的， 因為都知有益呀嘛

真係結咗婚兩年都未煮過喎。。呵呵

通常都係媽咪煮到我哋先會食囉。。

媽咪炆得條鯇魚好好味呀。。唔知點整嫁呢。

得閒要問吓媽咪先得。

 

 

食完飯, 快手洗好碗,

因為蕭C奶又整香蕉MUFFIN啊...

因為仲有幾組同事未食呢...

好鐘意整香蕉MUFFIN,

實在太容易整又唔需要太多工具

而且焗的時候

全間屋都充滿香蕉味...好香呀....

星期五約咗一堆朋友仔打邊爐

蕭C奶早一晚都要整定嚟送比佢哋先得...

好忙呀, 好忙呀..仲有好多嘢食好想整呀....

 

無皮雞翼炒一丁

 

 

2009年7月13日(星期一)

 

今日蕭C奶返工做嘢好有衝勁

完成咗幾樣工作

當然最重要的工作

係未做的...

因為太多鎖碎的工作了...

我會努力的....

叫咗媽咪呢幾日唔好過嚟住

因為想佢都陪吓侄仔及阿哥囉...

所今晚要自己煮了.

 

橫掂蕭少爺唔駛帶飯

而且都係嗰句啦, 天氣熱呀...

嗯...諗起好耐無食過炒出前一丁

好...一於就炒一丁比少爺嘆吓先

 

蕭C奶當然照舊將啲雞翼去皮啦....

如果唔咁就, 少爺就會食咗啲雞皮落肚嫁了....

除咗有雞翼, 仲有彈彈吓魚蛋及牛丸...當然唔少得菜啦...

 

食飽飽後, 買咗本旅遊雜誌

少爺係到做freelance

我就係到好嘆咁睇雜誌囉....

咁又過咗一晚簡單的一天

日式冷麵+日式炭燒雞軟骨漢堡+灼菜心

2009年7月12日(星期日)

 

今日奶奶放假

約咗12點陪家姐睇樓啊...

睇完之後, 我哋就去咗大興到食個lunch先

然後傾吓講吓....天氣太熱,

我哋就坐車返老爺到

坐咗一陣間

我話要買餸, 跟住就返天水圍

老爺聽到就話要同我哋一去買喎...

呢個組合被蕭C奶形為

老爺壓住個新抱去街市買餸

嘻嘻....

返到天水圍屋企

我哋又開始追日劇 ---boss呀

睇咗兩集話咁快又到六點lu...

又要準備晚餐比蕭少爺啊...

日式炭燒雞軟骨漢堡

大大件, 26元到有四大件, 係sogo到買嫁

見阿姐比我試食, 好好味, 只需要煎一陣就食得

咁方便梗係要買啦....

好得意嫁, 食落時內裡有好多雞軟骨, 好爽口啊..

下次見到都會再買... 

日式冷麵

天氣咁熱最好就係食啲凍凍哋的嘢....

所以又整冷麵食, 而且清清哋...

灼菜心

當然唔小得菜啦.....

 

最近蕭C奶好鬼忙呢....

不過最開心係....老闆放咗假,

可以靜靜哋做好手頭上的工作

聽日返工, 一定要專心咁做嘢呀....

輕鬆拍拖日

 

2009年7月11日(星期六)

 

是日蕭少爺蕭C奶都要返工啊..

蕭C奶先放工, 立刻坐車回家等少爺呢

天氣很熱之餘仲好鬼眼瞓添

蕭C奶一回家, 換過一套舒服的衣服後

便在sofa一邊看電視一邊嘆午睡啊

大約兩點半左右, 少爺回家了.....

倆公婆每逢星期六下午都會很優閒地渡過

通常會嘆吓下午茶, 談吓心, 睡覺, 睇碟等等..

今日蕭少爺蕭C奶就擇咗睇一套新的日劇啊...

由天海祐希及竹野內豐主演的-----BOSS

係一套偵探及心理的戲

估唔到幾好睇呀...我哋又開始好忙咁追日劇了...

睇咗兩集, 五點幾了,要出門了,

而今晚蕭C奶一早約定要去元朗食壽司

田中就一定會好多人, 通常蕭C奶都會擇隔離的

谷川日本料理

之前食過幾次都覺得好好食

而且又唔駛等位等到好似田中咁

仲要限住45分鐘時間

不過, 咁耐無嚟, 今次再幫襯,

覺得份量少咗, 而且仲要無以前咁新鮮及好味

下次都未必再嚟lu...

有啲失望啊....keep 唔到水準...

三文魚刺身

2位惠顧可以28元要一份半磅三文魚刺身

價錢雖然合理, 但係唔係好靚, 一般

甘蝦刺身

雖然夠冰凍, 但係真係食得出無咁新鮮了, 好似係38元

三文魚壽司

普普通通, 無咩特別, 唔係好食又唔係難食, 飯就有點微微暖

鮮帶子及劍魚腩壽司

真係有啲失望, 帶子唔夠鮮甜唔夠新鮮, 劍魚腩都一樣...無特別囉...

蒜香一口牛

超級失望到暈....以前食過真係好有牛味, 又juicy, 又大碟..

送到來...啲牛係'鞋鞋哋'好乾, 好韌...

老實講, 蕭C奶自己煮的牛肋條粒仲好食好多倍添呀...

盛惠42元, 仲要係話特價咗喎....超級唔抵呀...

鹽燒牛舌

終於都有一樣係保持水準的, 好彩燒得牛舌好味啫...

蕭C奶比咗一件蕭少爺食咗後,

蕭C奶一個人不知不覺全部食哂..

到蕭少爺發覺時...望住我咁講: 啲牛舌你食哂呀!

哈哈...好嘢喎..仲留比你呀...傻佬!

盛惠25元

鹽燒雞皮

呵呵呵...想屎了...蕭C奶keep緊fit, 仲學人叫咗燒雞皮

一次咁多啫...試吓嘛...

都幾得意嫁喎...不過就真係肥咗少少, 係少少, 可以接受嫁

燒到個皮脆脆哋, 都幾好味, 但係蕭少爺就no good喎...

盛惠12元

什錦天婦羅---3蝦5菜

見到人哋食天婦羅, 個樣又好似幾靚, 又多人叫,

我哋又叫咗, 都炸得唔錯, 而且份量都好多,

又唔貴喎...只需要45元

 

咁就食完我哋的日本餐了,

係有啲失望, 下次就一於去田中到買外賣返屋企食,

唔想得45分鐘時間及係到等位..

睇吓係咪咁好食先....

以前都食過田中, 不過都係好耐好耐的事

印象係平及超級大件囉....

 

食完嘢, 仲好早, 少爺話想去對面街的幾間書店

行吓行吓咁又九點lu...

但係蕭C奶諗起係千色廣場門口

有一間叫 Taipei 的珍珠奶茶店

成日都好多人幫襯

少爺未試過, 所以我就帶咗佢去品嚐

少爺要了 ----布滌珍珠奶茶

C奶要了 --- 香竽珍珠奶茶

大家都要了中size, 都係每杯10呀....好抵飲呀...

 

買完奶茶我哋就坐小巴返屋企lu.....

好耐都無同少爺行街行到咁夜lu...

變番初初拍拖時咁添....嘻嘻